AB News – အောက်တိုဘာ ၁၁၊ ၂၀၂၆
ရက္ခိုင်ပြည်၊ ဝီရဌာနီမြို့နယ်၊ ဆင်အိုင်ရွာကို စစ်ကော်မရှင်တပ်က အောက်တိုဘာ ၁၀ ရက် ညနေပိုင်းတွင် လေကြောင်းမှ ဗုံးကြဲတိုက်ခိုက်ခဲ့ရာ မူဆလင်များအပါအဝင် အရပ်သား ၇ ဦး သေဆုံးပြီး ၁၇ ဦးထက်မနည်း ဒဏ်ရာရရှိခဲ့ကြောင်း သိရသည်။
ယမန်နေ့ အောက်တိုဘာ ၁၀ ရက်၊ ညနေ ၆ နာရီကျော်တွင် စစ်ကော်မရှင်တပ်၏ လေကြောင်းတိုက်ခိုက်မှုကြောင့် ဆင်အိုင်ရွာ ဘောလုံးကွင်းအနီး ဗုံးကျရောက်ပေါက်ကွဲခဲ့ခြင်းဖြစ်သည်။
အဆိုပါ လေကြောင်း ဗုံးကြဲတိုက်ခိုက်မှုကြောင့် သေဆုံးသူများမှာ ဆင်အိုင်ရွာမှ ဒေါ်မခင်သန်း (၆၅ နှစ်)၊ ဒေါ်ဦးမြသန်း (၆၄ နှစ်)၊ ဒေါ်ရီရီသန်း (၄၁ နှစ်)၊ ဒေါ်ဝင်းမ (၁၀၀ နှစ်) ၊ဝီရဌာနီမြို့နယ်အတွင်းရှိ အနောက်ရဲ မူဆလင်ဒုက္ခသည်စခန်းမှ မာမောက်ချော်ရိပ် (၂၀ နှစ်)၊ ကျောက်ဖြူ မူဆလင်စစ်ရှောင်စခန်းမှ ဒေါ်ညီညီ (၂၇ နှစ်) နှင့် ၎င်း၏သား ဆာဟာတ် (၆ နှစ်) တို့လည်း သေဆုံးခဲ့ကြောင်း သိရသည်။
စစ်ကော်မရှင်တပ်သည် ဝီရဌာနီမြို့နယ်၊ ငပြီကျွန်းကို အောက်တိုဘာ ၇ ရက်မှစ၍ ထိုးစစ်ဆင်နေပြီး တိုက်ပွဲများနှင့် တိုက်ရိုက်သက်ဆိုင်မှုမရှိသည့် အရပ်သားများ နေထိုင်ရာ ကျေးရွာများကိုပါ လေကြောင်းမှ ဗုံးကြဲတိုက်ခိုက်မှုများ လုပ်ဆောင်နေကြောင်း သိရသည်။
ထို့ပြင် စစ်ကော်မရှင်တပ်သည် ရက္ခိုင်ပြည်အတွင်းရှိ ပြည်သူ့ဆေးရုံများ၊ စစ်ဘေးရှောင်စခန်းများနှင့် အရပ်သားများ ခိုလှုံရာနေရာများကို ပစ်မှတ်ထား၍ လေကြောင်းမှ ဆက်တိုက် ဗုံးကြဲတိုက်ခိုက်လျက်ရှိသည်။
Photo – APM