AB News- သြဂုတ် ၁၆၊ ၂၀၂၆
ရက္ခိုင်ပြည်တွင် ယခုနှစ် မိုးရာသီ မိုးသည်းထန်စွာ ဆက်တိုက်ရွာသွန်းပြီး ရေကြီးရေလျှံမှုများ ဖြစ်ပေါ်ခဲ့ရာ မြောက်ဦးမြို့နယ်၊ ကျောင်းတောင်ကျေးရွာတွင် ကွမ်းခြံများ တစ်ရွာလုံးနီးပါး ပျက်စီးခဲ့သည်ဟု ဒေသခံများထံမှ သိရသည်။
ကွမ်းခြံစိုက်ပျိုးရေးကို အဓိကအသက်မွေးဝမ်းကျောင်းအဖြစ် မှီခိုနေကြသည့် ကျောင်းတောင်ကျေးရွာသားများအတွက် ကွမ်းခြံများ ပျက်စီးသွားခြင်းသည် တစ်နှစ်စာဝင်ငွေကို ထိခိုက်စေသည့်အပြင် ပျက်စီးသွားသည့် စိုက်ခင်းများ ပြန်လည်တည်ဆောက်ရန်အတွက်လည်း ငွေကြေးထပ်မံရင်းနှီးရမည့် အခြေအနေ ဖြစ်လာခဲ့သည်။
ကျောင်းတောင်ဒေသခံ အသက် ၆၀ နှစ်အရွယ် ကွမ်းခြံစိုက်ပျိုးသူ ဦးဦးစောမောင်၏ ကိုယ်ပိုင်ကွမ်းခြံလည်း ရေကြီးမှုအတွင်း ပျက်စီးခဲ့ပြီး ရင်းနှီးမြှုပ်နှံထားသည့် ကွမ်းခြံတန်ဖိုး ကျပ်သိန်း ၅၀ ကျော် ဆုံးရှုံးခဲ့သည်ဟု ၎င်းက Arakan Bay News ကို ပြောသည်။
“ကွင်းခြံစိုက်ပျိုးတာက အသက် ၃၀ လောက်ကတည်းကစိုက်ပျိုးတာပါ။ စီးပွားရေးအဆင်ပြေတယ် မပြေဘူးဆိုတာထက် စားဝတ်နေရေးတော့ ဖုံလုံတာပေါ့။ကွမ်းရွက်စျေးကောင်းရင်ကောင်း ကောင်းသလို မကောင်းမကောင်းသလို ခံရတာပါဘဲ။ ကွမ်းခြံဆုံးရှုံး သွားတဲ့တန်ဖိုးက လက်ရှိစျေးနဲ့ဆိုရင် သိန်း ၅၀ တန်ဖိုးထိ ဆုံးရှုံးတယ်” ဟု ဦးဦးစောမောင်က ပြောသည်။
ကွမ်းခြံတစ်ခြံ စိုက်ပျိုးရန်အတွက် အလုပ်သမားငှားရမ်းကာ မြက်ရှင်းလင်းခြင်း၊ ကွမ်းတိုင်နှင့် ကွမ်းညွှန့်များ ပြင်ဆင်ခြင်း၊ သစ်ရွက်ဆွေးနှင့် မြေဩဇာများ ထည့်သွင်းခြင်းတို့ ပြုလုပ်ရပြီး ဝါး ၁၅ ပြန် (ပေ ၂၇၀) နှင့် ကွမ်းညွှန့် ၆,၀၀၀ ခန့်ပါဝင်သည့် ကွမ်းခြံတစ်ခြံလျှင် ကျပ်သိန်း ၅၀ ကျော်ခန့် ကုန်ကျသည်ဟု ဦးဦးစောမောင်က ဆိုသည်။
ယခုနှစ် ရေကြီးမှုကြောင့် ရက္ခိုင်ပြည်အတွင်း ကွမ်းခြံအများအပြား ပျက်စီးခဲ့သည့်အတွက် ကွမ်းရွက်ဈေးနှုန်းမှာလည်း ယခင်နှစ်များထက် မြင့်တက်လာခဲ့သည်။
ယခင်က ကွမ်းရွက်တစ်ပိဿာလျှင် ကျပ် ၂၀,၀၀၀ ကျော်ခန့်သာ ရှိခဲ့သော်လည်း ယခုနှစ်တွင် ကျပ် ၁ သိန်းနီးပါးအထိ မြင့်တက်ခဲ့ပြီး လက်ရှိတွင် ယာကွမ်းတစ်ပိဿာလျှင် ကျပ် ၆၀,၀၀၀ ခန့် ရှိနေသည်ဟု ဒေသခံများက ပြောသည်။
သို့သော် ကွမ်းရွက်ဈေးနှုန်း မြင့်တက်လာသော်လည်း ကွမ်းခြံပျက်စီးမှုကြောင့် ထွက်ရှိသည့် ကွမ်းရွက်ပမာဏ လျော့ကျသွားခြင်းနှင့် စိုက်ခင်းများ ပြန်လည်တည်ဆောက်ရန် ကုန်ကျစရိတ်များ ရှိနေခြင်းကြောင့် ယခုနှစ်တွင် ယခင်နှစ်များကဲ့သို့ အမြတ်အစွန်း မရရှိနိုင်ကြောင်း ကျောင်းတောင်ဒေသခံ ကွမ်းခြံစိုက်ပျိုးသူ ဒေါ်ဘုမချေက ပြောသည်။
“လွန်ခဲတဲ့နှစ်က ကွမ်း ၁ ပိဿာ ကိုပေါက်စျေး ၅ထောင်သာ ရှိပြီး ဒီနှစ်ကွမ်းခင်း မပျက်စီးခင်က ကွမ်း ၁ ပိဿာ ကို ၂၅၀၀၀၊ ၃၀၀၀၀ စျေးနှင့်ရောင်းလိုက်ရသေးတယ်။ ကွမ်းရွက်ကို တစ်လမှာ ၂ ခါ ခူးပြီး တစ်ခါခူးရောင်းရင် သိန်း ၁၀ ကျော်လောက်ရတယ်။ ရေမကြီးခင်ကတော့ ကွမ်းခြံက အရမ်းလှတယ်။ တစ်ခါခူးရင် ပိဿာ ၃၀
ကျော်ရတယ်။ အဲ့တုန်းကကွမ်းဈေးက မတက်သေးဘူး။ အခုဆိုရင် ကွမ်း ၁ ပိဿာ ၇ သောင်းရှိတယ်။ ကွမ်းစျေး ၇ သောင်းရတဲ့အခါ ကွမ်းခင်းက ပျက်စီးသွားပြီ။ ရေမကြီးဘူးဆိုရင်ရှိနေမှာ ရေကြီးတော့ မရှိတော့ဘူး။ ကွမ်းပင်တွေက အရမ်းလှနေတာ။ နေ့ချင်းပျက်စီးသွားတော့ စျေးကောင်းတဲ့အခါ မရောင်းရတော့ဘူး။” ဟု ၎င်းက AB News သို့ပြောသည်။
ကျောင်းတောင်ကျေးရွာတွင် ကွမ်းစိုက်ပျိုးရေးအပြင် တောင်တန်းနှင့် သစ်တောထွက်ပစ္စည်းများကိုလည်း မှီခိုအသက်မွေးကြပြီး မျှစ်ချိုးခြင်း၊ ဝါးခုတ်ခြင်းနှင့် သင်္ဘောဥ (ကတက်ဥ) တူးခြင်းတို့ကိုလည်း လုပ်ကိုင်ကြသည်။
သို့သော် အဓိကအားထားရသည့် ကွမ်းခြံများ ပျက်စီးသွားခြင်းကြောင့် ရင်းနှီးမြှုပ်နှံနိုင်သည့် ကွမ်းခြံရှင်အချို့သာ စိုက်ခင်းအသစ်များ ပြန်လည်တည်ဆောက် စိုက်ပျိုးနိုင်ကြသည်။
ကွမ်းခြံမှ ထွက်ရှိသည့် ကွမ်းရွက်များကို ပန်းမြောင်းဈေးသို့ သွားရောက်ရောင်းချကြပြီး ရေကြီးမှုမတိုင်မီက ကွမ်းစိုက်ပျိုးရေးမှ ရရှိသည့် ဝင်ငွေသည် ဒေသခံများအတွက် အဓိကအသက်မွေးဝမ်းကျောင်းတစ်ခု ဖြစ်ခဲ့သည်။
ယခုနှစ် ရေကြီးမှုအတွင်း ကျောင်းတောင်ဒေသရှိ ကွမ်းခြံများမှာ ခါးကျော်အထိ ရေမြုပ်ခဲ့ပြီး ကွမ်းပင်များ ပျက်စီးခဲ့ကြောင်း ဦးဦးစောမောင်က ပြောသည်။
လက်ရှိတွင် ပျက်စီးသွားသည့် ကွမ်းခြံများကို ပြန်လည်စိုက်ပျိုးနေကြသော်လည်း ကွမ်းပင်များတွင် ရောဂါပိုးမကျရောက်စေရန်နှင့် ပြန်လည်အောင်မြင်စွာ စိုက်ပျိုးနိုင်ရန်အတွက် စောင့်ရှောက်မှုများ ထပ်မံပြုလုပ်ရမည်ဖြစ်သည်။
ရေကြီးမှုကြောင့် တစ်ရွာလုံးနီးပါး ပျက်စီးခဲ့သည့် ကွမ်းခြံများကို ပြန်လည်တည်ဆောက်ရန် အချိန်နှင့် ငွေကြေးများ ထပ်မံလိုအပ်နေသည့်အတွက် ကျောင်းတောင်ကျေးရွာမှ ကွမ်းစိုက်တောင်သူများအနေဖြင့် အသက်မွေးဝမ်းကျောင်းလုပ်ငန်း ပြန်လည်ထူထောင်နိုင်ရေးမှာ စိန်ခေါ်မှုတစ်ရပ် ဖြစ်နေသည်။
Photo – AB News