သတင်းမီဒီယာ - ရခိုင် ၊ အာရကန် ၊ အာရက္ခ

Generic selectors
Exact matches only
Search in title
Search in content
Post Type Selectors
‎မြောက်ဦးမြို့နယ်၊ ပါးတော်ရွာ၌ ဖြစ်ပွားခဲ့သည့် လူသတ်မှုတွင် တရားခံကိုဖမ်းဆီးရမိပြီဖြစ်ကြောင်း ဒီလပ် ထုတ်ပြန်‎


‎AB News – နိုဝင်ဘာ ၁၃၊ ၂၀၂၆
‎
‎ရက္ခိုင်ပြည်၊ မြောက်ဦးမြို့နယ်၊ ပါးတော်ရွာတွင် အောက်တိုဘာလ ၁၉ ရက်နေ့၌ ဖြစ်ပွားခဲ့သည့် လူသတ်မှုဖြစ်စဉ်မှ ကျူးလွန်သူ တရားခံကို ဥပဒေလုပ်ထုံးလုပ်နည်းများနှင့်အညီ ဖမ်းဆီး အရေးယူထားပြီး ဖြစ်ကြောင်း ဒီလပ်ဌာနမှ ထုတ်ပြန်ထားသည်။
‎
‎ပါးတော်ရွာတွင် အောက်တိုဘာ ၁၉ ရက်က ကွမ်းသီးခင်းစောင့် အောင်ကျော်သိန်း (၃၂ နှစ်)မှာ လည်ပင်း၌ ဓားဒဏ်ရာတစ်ချက်ဖြင့် သေဆုံးနေသည်ကို တွေ့ရှိခဲ့ပြီး ယင်းလူသတ်မှုနှင့်ပတ်သက်၍ ဒီလပ် က စုံစမ်းစစ်ဆေးမှုများ ပြုလုပ်ခဲ့သည်။
‎
‎စုံစမ်းစစ်ဆေးချက်အရ အောင်ကျော်သိန်းနှင့် အရက်အတူသောက်စားခဲ့သူ နေကျော်လင်း (၂၄ နှစ်) က ယခင်က စကားများရန်ဖြစ်ခဲ့မှုအပေါ် အငြိုးထားကာ အောက်တိုဘာလ ၁၉ ရက်နေ့ ည ၁၁ နာရီခွဲအချိန်တွင် ဓားဖြင့် ခုတ်သတ်ခဲ့ကြောင်း ဝန်ခံထွက်ဆိုခဲ့သည်။ 
‎
‎နေကျော်လင်းသည် အောက်တိုဘာ ၂၃ ရက်တွင် မြောက်ဦးမြို့နယ်တရားရုံး၌ ဖြောင့်ချက်ပေးခဲ့ပြီး ပြစ်မှုနှင့်မသက်ဆိုင်သည့် အခြားသံသယရှိသူ ၆ ဦးကို ရာဇဝတ်ကျင့်ထုံးဥပဒေပုဒ်မ ၁၆၉ အရ ပြန်လည်လွှတ်ပေးခဲ့ကာ နေကျော်လင်းကို ဥပဒေအကြံပြုချက်နှင့်အညီ တရားစွဲတင်ရန် ဆောင်ရွက်နေကြောင်း သိရသည်။
‎
‎ဓာတ်ပုံ – အာရက္ခမှုခင်းနှင့် ဆက်စပ်သတင်းများ ထုတ်ပြန်ရေးအဖွဲ့
‎

ထင်မြင်ယူဆချက်‌‌ပေးရန်

ဆက်စပ်သတင်းများ