AB News – စက်တင်ဘာလ ၂၁၊ ၂၀၂၆
ရက္ခိုင်ပြည်၊ အဉ္ဇနပူရမြို့နယ်၊ သစ်ပုတ်တောင်ရွာအနီး တောင်တန်းကို အကြမ်းဖက် စစ်ကော်မရှင်က ယနေ့ မွန်းလွဲတွင် လေကြောင်းမှ ဗုံး ၂ လုံး ကြဲချတိုက်ခိုက်ခဲ့ကြောင်း ကနဦး သိရှိရသည်။
စက်တင်ဘာ ၂၁ ရက် မွန်းလွဲ ၁၂ နာရီ ၄၀ မိနစ်ခန့်တွင် စစ်ကော်မရှင်၏ တိုက်လေယာဉ်သည် အဉ္စနပူရမြို့ပေါ်တွင် ဝဲပျံပြီးနောက် သစ်ပုတ်တောင်ကျေးရွာ အရှေ့ဘက် တောင်တန်းသို့ ဗုံးကြဲတိုက်ခိုက်ခဲ့ခြင်းဖြစ်သည်။
“ဂျက်တိုက်လေယာဉ်က ၁၂ နာရီ ၄၀ မိနစ်က ကြဲတာဗျ။ မြို့ထဲဘက်မှာလဲ သုံးကြိမ်လောက်ဝဲနေခဲ့တယ်လို့ပြောတယ်။ ဗုံးက နှစ်လုံးကြဲတာ ရွာအရှေ့ဘက်တောင်တန်းကိုကျတယ်၊ ခန့်မှန်းရသလောက်ဆို ရွာဘုန်းကြီးကျောင်း နောက်ဘက် တောင်တန်းကိုကျတာထင်တယ်” ဟု သစ်ပုတ်တောင်ကျေးရွာနေ ဒေသခံတစ်ဦးက AB News သို့ ပြောသည်။
အလားတူ ပြီးခဲ့သည့် မေလ ၇ ရက်နေ့ နေ့လည် ၂ နာရီခန့်အချိန်က သစ်ပုတ်တောင်နှင့် ကျောက်ခုတ်ကျေးရွာအနီးဝန်းကျင်ရှိ တောင်တန်းများကို ဂျက်ဖိုက်တာ ၃ စီး၊ Y-12 ၂ စီးဖြင့် ဗုံးကြဲတိုက်ခိုက်ခဲ့သည်။
အကြမ်းဖက် စစ်ကော်မရှင်တပ်က စက်တင်ဘာလ ၃ ရက်နေ့မှ၍ ယနေ့ အချိန်အထိ ရက္ခိုင်ပြည်က မြို့နယ်အများစုကို ဂျက်တိုက်လေယာဉ်များနှင့် ဒရုန်းများအသုံးပြုကာ အကြိမ်ကြိမ် ဗုံးကြဲတိုက်ခိုက်လာခြင်းကြောင့် အပြစ်မဲ့အရပ်သားပြည်သူများထိခိုက် သေဆုံးမှုများနှင့် သာသနိကအဆောက်အအုံများ ထိခိုက်ပျက်စီးမှုများ ရှိနေသည်။