AB News – ဇူလိုင် ၁၀၊ ၂၀၂၆
ရက္ခိုင်ပြည်၊ မြောက်ဦးမြို့နယ်၊ ဝေသာလီကျေးရွာတွင် ငှက်ဖျား၊ သွေးလွန်တုပ်ကွေးရောဂါ ကူးစက်ခံရသူ ၁၅၀ နီးပါးအထိ ရှိလာပြီး ရောဂါကြောင့် သေဆုံးသူများလည်း ရှိနေကြောင်း AB News ၏ ကွင်းဆင်းသတင်းရယူမှုအရ သိရသည်။
ပြီးခဲ့သည့် မေလလယ်ပိုင်းမှစ၍ အဆိုပါကျေးရွာတွင် သွေးလွန်တုပ်ကွေးရောဂါ စတင်ဖြစ်ပွားခဲ့ခြင်းဖြစ်ပြီး ယခုဇူလိုင်လအတွင်း ကူးစက်မှုနှုန်း ပိုမိုမြင့်တက်လာကာ လက်ရှိတွင် ကိုယ်ခံအားနည်းနေသည့် နို့တိုက်မိခင် အမျိုးသမီး ၂ ဦး ဆက်တိုက်သေဆုံးခဲ့ကြောင်း သိရသည်။
ယမန်နေ့ ဇူလိုင်လ ၉ ရက်နေ့က အသက် ၃၅ နှစ်အရွယ် ကလေး ၃ ဦး မိခင် ဒေါ်ဦးမြသန်း သေဆုံးခဲ့ပြီး၊ ဇူလိုင်လ ၈ ရက်နေ့ကလည်း နို့စို့အရွယ်ကလေးမိခင် မကြည်ကြည်ဝင်း အသက် ၂၇ နှစ်သည် တိုက်နယ်ဆေးရုံတွင် ၂ ရက်ကြာ ဆေးကုသမှုခံယူနေစဉ် သေဆုံးခဲ့ကြောင်း မိသားစုဝင်များ က ပြောသည်။
“သမီးက ရောဂါလက္ခဏာပြပြချင်း ဆေးရုံကို သွားခဲ့တာပါ။ တိုက်နယ်ဆေးရုံမှာ တစ်ရက်ပဲ နေလိုက်ရတယ်။ ဆရာဝန်က ဒီရောဂါအတွက် ကုသဖို့ ဆေးမရှိဘူးလို့ ပြောပါတယ်။ မသေခင်မှာ သမီးက တစ်ကိုယ်လုံး အမဲစက်တွေပေါ်လာပြီး အသက်ရှုကျပ်လာတယ်လို့ ပြောရင်း ဆုံးသွားခဲ့တာပါ။ အခုတော့ ကျောင်းနေအရွယ် ကလေး ၂ ယောက်နဲ့ နို့စို့အရွယ် ကလေးတစ်ယောက် ကျန်ရစ်ခဲ့ပါတယ်” ဟု သေဆုံးသူ ဒေါ်ဦးမြသန်း၏ဖခင် ဦးလှမောင်က ပြောကြားသည်။
ဝေသာလီကျေးရွာမှာ တောတောင်နှင့် နီးစပ်ပြီး သစ်ပင်များ ထူထပ်ကာ ခြင်ပေါက်ပွားမှု အလွန်များပြားကြောင်း ဒေသခံများက ဆိုကြသည်။
ယခုကဲ့သို့ မိခင် ၂ ဦး ဆက်တိုက် သေဆုံးခဲ့မှုကြောင့် ကျန်ရစ်သည့် နို့စို့အရွယ် ကလေးငယ်များ၏ ကျန်းမာရေးနှင့် ပြုစုစောင့်ရှောက်မှု အပိုင်းအတွက်ပါ မိသားစုဝင်များမှာ အခက်အခဲကြုံတွေ့နေရကြောင်း သိရသည်။
၎င်းအပြင် ကျေးရွာအတွင်း နေ့စဉ်နှင့်အမျှ ဖျားနာသူ အရေအတွက် တိုးပွားလာနေပြီး ထပ်မံ၍ အသက်အန္တရာယ် ဆုံးရှုံးရမည်ကို ရွာလုံးကျွတ် ထိတ်လန့်စိုးရိမ်နေကြကြောင်း ဝေသာလီရွာသားများက ဆိုကြသည်။
ကျေးရွာအတွင်း ရောဂါကူးစက်မှုနှုန်း အရှိန်အဟုန်ဖြင့် မြင့်တက်နေပြီး အသက်ဆုံးရှုံးမှုများပါ ရှိလာသဖြင့် ရောဂါကူးစက်ပြန့်ပွားမှုကို အချိန်မီ ထိန်းချုပ်နိုင်ရေးအတွက် အရေးပေါ်ဆေးဝါးနှင့် ကျန်းမာရေးဆိုင်ရာ စောင့်ရှောက်မှုများအား အရှိန်မြှင့်ဆောင်ရွက်ပေးရန် ဒေသခံများက ကျန်းမာရေးအဖွဲ့အစည်းများထံသို့ ဝိုင်းဝန်းတောင်းဆိုနေကြကြောင်း သိရှိရသည်။
(ဓာတ်ပုံ – Arakan Bay News)