AB News – မေ ၁၈၊ ၂၀၂၆
ရက္ခိုင်အပါအဝင် မြန်မာနိုင်ငံတစ်ဝန်းတွင် ကုန်ဈေးနှုန်းကြီးမြင့်မှု၊ ပဋိပက္ခများနှင့် နေရပ်စွန့်ခွာရမှုများကြောင့် လူသားချင်းစာနာမှုဆိုင်ရာ လိုအပ်ချက်များ တစ်နေ့ထက်တစ်နေ့ ပိုမိုများပြားလာနေမှုကြောင့် ဥရောပသမဂ္ဂ (EU) နှင့် ကမ္ဘာ့စားနပ်ရိက္ခာအစီအစဉ် (WFP) တို့က အရေးပေါ်လိုအပ်နေသော စားနပ်ရိက္ခာနှင့် အာဟာရအထောက်အပံ့များ ပေးအပ်နိုင်ရန် ယူရို ၈ သန်း ကူညီလိုက်ကြောင်း ယနေ့တွင် ပူးတွဲကြေညာလိုက်သည်။
မြန်မာနိုင်ငံတစ်ဝန်းတွင် လက်ရှိဖြစ်ပွားနေသော ပဋိပက္ခများကြောင့် နေရပ်စွန့်ခွာတိမ်းရှောင်နေရသူ ဦးရေ ၃ ဒဿမ ၇ သန်း ထိ ရှိလာပြီး စုစုပေါင်းလူဦးရေ၏ ၄ ဦးတွင် ၁ ဦးနှုန်း ( ၁၂ ဒဿမ ၄ သန်း) မှာ လတ်တလော ဆာလောင်မွတ်သိပ်မှုဒဏ်ကို ပြင်းထန်စွာ ရင်ဆိုင်နေရသည်။
ထို့အပြင် တစ်နိုင်ငံလုံး အတိုင်းအတာဖြင့် အခြေခံစားသောက်ကုန်ဈေးနှုန်းများသည် ပျမ်းမျှ ၁၈% ထိ မြင့်တက်နေသော်လည်း ရက္ခိုင်ပြည်အပါအဝင် အချို့ဒေသများတွင် ပိုမိုဆိုးရွားသော အခြေအနေနှင့် ရင်ဆိုင်နေရကြရသည်။
အခြေခံကုန်စျေးနှုန်းမြင့်မားမှုမှာ မကွေးတိုင်းဒေသကြီးတွင် ၃၈%၊ ကရင်ပြည်နယ်တွင် ၃၂%နှင့် ရက္ခိုင်ပြည်တွင် ၃၁% အထိ အသီးသီး မြင့်တက်လျက်ရှိနေကြောင်း ထုတ်ပြန်ချက်အရသိရသည်။
ဥရောပသမဂ္ဂ (EU) နှင့် ကမ္ဘာ့စားနပ်ရိက္ခာအစီအစဉ် (WFP) တို့၏ ယူရို ၈ သန်း ထောက်ပံ့မှုမှာ ပဋိပက္ခ၊ နေရပ်စွန့်ခွာရမှု၊ စီးပွားရေးအခက်အခဲနှင့် ပိုဆိုးရွားလာသည့် စားနပ်ရိက္ခာအကျပ်အတည်းကြောင့် ထိခိုက်ခံစားနေရသည့် မိသားစုများထံသို့ အရေးပေါ်ရိက္ခာများ ဖြန့်ဝေပေးသွားမည်ဖြစ်ပြီး ကုန်ဈေးနှုန်းကြီးမြင့်မှုကြောင့် အာဟာရချို့တဲ့မှုဒဏ် ခံရနိုင်ခြေရှိသည့် ကိုယ်ဝန်ဆောင်မိခင်များ၊ နို့တိုက်မိခင်များနှင့် ကလေးငယ်များအတွက် အထူးအာဟာရ အထောက်အပံ့များ ပေးအပ်သွားမည်ဖြစ်သည်။
ထို့အပြင် မြေပြင်တွင်လည်း စားနပ်ရိက္ခာဖူလုံရေး ကူညီကယ်ဆယ်မှုများ ပိုမိုထိရောက်ပြီး အချိန်မီရောက်ရှိနိုင်ရန် လူသားချင်းစာနာမှုအဖွဲ့အစည်းများအကြား ပေါင်းစပ်ညှိနှိုင်းမှုများကို မြှင့်တင်ဆောင်ရွက်သွားမည်ဖြစ်ကြောင်းလည်း ပြောဆိုထားသည်။
ဥရောပသမဂ္ဂ (EU) နှင့် WFP တို့သည် ရက္ခိုင်ပြည်အပါအဝင် မြန်မာနိုင်ငံအတွင်း ဆာလောင်မွတ်သိပ်မှု ကင်းဝေးစေရေးနှင့် အသက်ကယ်ဆယ်ရေးအကူအညီများ ပေးအပ်နိုင်ရန်အတွက် ခိုင်မာသော မိတ်ဖက်များအဖြစ် ဆက်လက်ရပ်တည် ဆောင်ရွက်သွားမည်ဖြစ်ကြောင်း ထုတ်ပြန်ထားသည်။