AB News – ဇွန် ၁၅၊ ၂၀၂၆
ရက္ခိုင်ပြည်၊ ပုဏ္ဏားကျွန်းမြို့နယ်တွင် စက်လှေတစ်စီး တိမ်းမှောက်မှုဖြစ်ပွားခဲ့ပြီး ခရီးသည် ၈ ဦး သေဆုံးကာ ၂ ဦး ပျောက်ဆုံးနေကြောင်း ဒေသတွင်း ကယ်ဆယ်ရေးအဖွဲ့များထံမှ သိရှိရသည်။
ယနေ့ နံနက် ၁၁ နာရီ၊ ၄၅ မိနစ်ခန့်အချိန်တွင် ရသေ့တောင်မြို့နယ် မိုးစဲကမ်းမှ ကျောက်တော်မြို့သို့ ဈေးဝယ်ရန် ထွက်ခွာလာသည့် ခရီးသည်တင် စက်လှေတစ်စီးသည် ပုဏ္ဏားကျွန်းမြို့ ကြိုးတံတားအနီးရှိ ကင်းချောင်းအတွင်း တိမ်းမှောက်ခဲ့ခြင်း ဖြစ်သည်။
အဆိုပါ စက်လှေပေါ်တွင် စုစုပေါင်း ခရီးသည် ၃၅ ဦး လိုက်ပါလာခဲ့ပြီး လက်ရှိအချိန်တွင် အမျိုးသမီး ၅ ဦးနှင့် အမျိုးသား ၃ ဦးအပါအဝင် ၈ ဦး သေဆုံးခဲ့ပြီး ၂ ဦး ပျောက်ဆုံးနေကြောင်း သိရသည်။
စက်လှေတိမ်းမှောက်၍ သေဆုံးခဲ့သူများမှာ ရသေ့တောင်မြို့နယ်၊ ကူတောင်ကျေးရွာမှ မောင်ဇီ (ခ) ကျော်စိုးနိုင်၊ ဦးခင်မောင် (၆၇)နှစ်၊ မဘုဘုချေ (ခ) နီနီဝင်း၊ ဒေါ်အမှုံချေ၊ မခင်စိုးဝေ၊ ဒေါ်မသောင်း၊ ဒေါ်ရီရီဆန်း၊ ပြူးတောင် (ခ) ဉာဏ်လင်းနိုင် တို့ဖြစ်ကြောင်း သိရသည်။
အသက်ရှင်ကျန်ရစ်သူ ၂၄ ဦးအနက် ဒဏ်ရာပြင်းထန်စွာ ရရှိခဲ့သည့် အမျိုးသား ၃ ဦးမှာ နီးစပ်ရာ ဆေးရုံတွင် အရေးပေါ်ဆေးကုသမှုခံယူနေရကြောင်း သိရသည်။
ရက္ခိုင်ပြည်သည် မြစ်ချောင်းများ ပေါများသော ဒေသတစ်ခု ဖြစ်သည့်အတွက် ယခုကဲ့သို့ မိုးဦးကာလတွင် လေပြင်းတိုက်ခတ်ခြင်းနှင့် လှိုင်းလေထန်ခြင်းတို့ကြောင့် လှေတိမ်းမှောက်မှုများ မကြာခဏ ဖြစ်ပွားလေ့ရှိသည်။
လက်ရှိတွင် အာရက္ခပြည်သူ့တော်လှန်ရေးအစိုးရ၊ သယ်ယူပို့ဆောင်ရေးဌာနကလည်း ရေယာဉ်ပိုင်ရှင်များနှင့် ခရီးသည်များအနေဖြင့် မိုးလေဝသနှင့် ဇလဗေဒအခြေအနေများကို အစဉ်မပြတ် ဂရုပြုစောင့်ကြည့်ပြီးမှ ခရီးသွားလာရန်၊ ရေကြောင်းခရီးသွားလာရာတွင် အသက်ကယ်အင်္ကျီ (Life Jacket) များကို မပျက်မကွက် ဝတ်ဆင်ကြရန်၊ ရေယာဉ်များပေါ်တွင် ခရီးသည်နှင့် ကုန်ပစ္စည်းများကို သတ်မှတ်ပမာဏထက် အလွန်အကျွံ တင်ဆောင်ခြင်း မပြုကြရန် ထုတ်ပြန်ထားသည်။
ရုပ်သံ – Zaw Ko Oo(Facebook)