AB News – ဇွန် ၅၊ ၂၀၂၆
ရက္ခိုင်ပြည်၏ လက်ရှိ စစ်ရေး၊ နိုင်ငံရေးပဋိပက္ခနှင့် လမ်းပမ်းဆက်သွယ်ရေး အခက်အခဲများကြောင့် ကုန်စျေးနှုန်းများ အဆမတန် မြင့်တက်နေပြီး လက်လုပ်လက်စား မိသားစုများအနေဖြင့် ၎င်းတို့၏ သားသမီးများကို ကျောင်းဆက်မထားနိုင်ဘဲ ကျောင်းထုတ်လိုက်ရသည့် အခြေအနေများအထိ ကြုံတွေ့နေရကြောင်း သိရသည်။
“ကျမမှာက ပညာသင်အရွယ် ကျောင်းသား ၄ ယောက်ရှိတယ်။ ၇ တန်း ၂ ယောက်၊ ၉ တန်း ၁ ယောက်၊ ၁၂ တန်း ၁ ယောက်ပါ။ ဒါပေမဲ့ ကျောင်းသုံးစာအုပ်နဲ့ စာရေးကိရိယာတွေက အလွန်စျေးကြီးနေတော့ ၇ တန်း ၂ ယောက်ကို ကျူရှင်မထားဘဲ ခေတ္တရပ်နားထားရတယ်။ ကျောင်းကြီးဖွင့်ရင် စာအုပ်တွေ အကူအညီရမလားဆိုတဲ့ မျှော်လင့်ချက်နဲ့ပေါ့။ ၉ တန်းနဲ့ ၁၂ တန်း ၂ ယောက်ကိုတော့ မနှစ်က တက်ထားတဲ့ သူတွေရဲ့ စာအုပ်တွေကို ဝယ်ပြီး ပေးတက်နေရတယ်။ အခက်အခဲဆိုတာကတော့ အကုန်လုံးပါပဲ။ ကျမက တစ်ကိုယ်တည်းသမားဆိုတော့ အစစအရာရာ ရုန်းကန်နေရတယ်။ ဒါကြောင့် ကျောင်းသုံးစာအုပ်တွေ၊ စာရေးကိရိယာပစ္စည်းကိရိယာတွေ ထောက်ပံ့ပေးမယ်ဆိုရင်တော့ နည်းနည်းအဆင်ပြေမယ်” ဟု မိခင်ဖြစ်သူ မပိုးဝါဖြူက AB News သို့ ပြောသည်။
လက်ရှိတွင် ပုံမှန်ကျောင်းဖွင့်ရာသီ ဇွန်လသို့ ရောက်ရှိနေပြီဖြစ်ပြီး ဈေးကွက်အတွင်း ကျောင်းသုံးစာအုပ်စျေးနှုန်းများမှာ KG တန်း ကျောင်းသုံးစာရေးစာအုပ် ၆ အုပ်ကို ၂၅,၀၀၀ ကျပ်အထိ ရှိနေသည်ကို တွေ့ရှိရသည်။
ထို့အပြင် မူလတန်းအဆင့် (Grade 1 မှ Grade 5) စာအုပ်အတွဲများမှာ ၃၀,၀၀၀ ကျပ်မှ ၅၀,၀၀၀ ကျပ်အထိ ရှိပြီး၊ အလယ်တန်းနှင့် အထက်တန်းအဆင့် (Grade 6 မှ Grade 12) ကျောင်းသုံးစာအုပ်အတွဲများမှာ အနည်းဆုံး ၅၅,၀၀၀ ကျပ်မှ အမြင့်ဆုံး ၈၀,၀၀၀ ကျပ်အထိ အသီးသီး စျေးနှုန်းမြင့်တက်လျက်ရှိနေသည်။
ဤကဲ့သို့ ကျောင်းသုံးစာအုပ်၊ ဗလာစာအုပ်နှင့် စာရေးကိရိယာများ၏ ဈေးနှုန်းများ အလွန်မြင့်တက်နေမှုကြောင့် ယခုနှစ်တွင် သားသမီး ၅ ဦးအနက် KG တန်းအရွယ်သမီးငယ်နှင့် ၃ တန်းအရွယ် သားငယ်တစ်ဦးကိုသာ ပညာသင်ကြားပေးနိုင်တော့မည်ဖြစ်ကြောင်း ကျပန်းအလုပ်လုပ်ကိုင်ရင်း မိသားစုဝမ်းရေးကို ဖြေရှင်းနေရသည့် ကိုခိုင်ဇော် က ဆိုသည်။
“ကျနော်က တွန်းလှည်းနဲ့ ရေတွန်းပြီး မိသားစုရဲ့ စားဝတ်နေရေးကို ဖြေရှင်းနေရသူပါ။ ဒီနှစ်မှာ သားသမီးတွေကို စာသင်ကြားပေးဖို့အတွက် စာအုပ်တွေလည်း မဝယ်နိုင်သေးပါဘူး။ ကျောင်းသုံးစာအုပ်နဲ့ စာရေးကိရိယာတွေကလည်း ဈေးကြီးနေတယ်။ ဒါကြောင့် ကလေး ၂ ယောက်ကိုပဲ ကျောင်းဆက်ထားနိုင်တော့ပါမယ်။ ကျန်တဲ့သူတွေကိုတော့ ကျောင်းထုတ်လိုက်ရတော့မယ်” ဟု ၎င်းက ဆိုသည်။
ကျောင်းသုံးပုံနှိပ်စာအုပ်များသာမက နေ့စဉ်သုံး စာရေးကိရိယာများနှင့် ဗလာစာအုပ် စျေးနှုန်းများမှာလည်း ယခင်ကထက် သိသိသာသာ မြင့်တက်နေကြောင်း ကျောင်းသားမိဘများက ဆိုကြသည်။
ယခုကဲ့သို့ စာရေးကိရိယာနှင့် ကျောင်းသုံးပစ္စည်း စျေးနှုန်းများ အလွန်အမင်း မြင့်တက်လာခြင်းသည် ဆင်းရဲနွမ်းပါးသည့် မိသားစုများမှ ကလေးငယ်များ၏ ပညာသင်ကြားခွင့် အခွင့်အလမ်းကို ထိခိုက်နေကြောင်း ပညာရေးအသိုင်းအဝိုင်းမှ မှတ်ချက်ပြု ပြောဆိုနေကြသည်။
ရက္ခိုင်တွင် အာရက္ခပြည်သူ့တော်လှန်ရေးအစိုးရမှ အာရက္ခပညာရေးကို တစိုက်မတ်မတ် ဆောင်ရွက်နေသော်လည်း အကြမ်းဖက် စစ်ကော်မရှင်တပ်၏ လေကြောင်းတိုက်ခိုက်မှုကြောင့် စာသင်ကျောင်းများကို လုံခြုံနိုင်ဖွယ်ရာ နေရာများတွင်သာ ဖွင့်လှစ်နေရကြောင်း ဒေသခံများက ဆိုကြသည်။
ဓာတ်ပုံ – Arakan Bay News