AB News – ဇူလိုင် ၁၁၊ ၂၀၂၆
ရက္ခိုင်ပြည်နေရာအနှံ့အပြားတွင် ဇူလိုင်လ ၈ ရက်နေ့မှစတင်ကာ မိုးသည်းထန်စွာ အဆက်မပြတ် ရွာသွန်းမှုကြောင့် မြစ်ရေမြင့်တက်ပြီး ကျေးရွာအများအပြား ရေကြီးရေလျှံမှု အန္တရာယ်နှင့် ရင်ဆိုင်နေရသည်။
အဆိုပါ ရေဘေးသင့်ဒေသများအနက် မင်းပြားမြို့နယ်အတွင်းရှိ ကျေးရွာများဖြစ်ကြသော အသေကာလ၊ မင်းဖူး၊ ကပ်ပဲ၊ ပွဲရကန်ဆိပ်၊ အိုးပျံတောင်၊ ငတာ၊ ထိန်ပင်၊ ပေါက်တော၊ ခွဆုံ၊ ရွှေတောင်၊ ရွှေကျန်၊ ဒုံးသား၊ ဒုံးကြီးရွာ၊ လက်ခုပ်၊ တောတန်း၊ ချင်းဆိပ်၊ တံခွန်တိုင်၊ သလူချောင်းနှင့် ငတက် စသည့် ကျေးရွာများမှာ ရေဘေးဒုက္ခကို ပြင်းထန်စွာ ခံစားနေရကြောင်း သိရသည်။
ထိုသို့ ပြည်သူများ အခက်အခဲကြုံတွေ့နေရသဖြင့် ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) က ကွင်းဆင်းကာ ရေဘေးသင့်ပြည်သူများအား ဘေးလွတ်ရာနေရာများသို့ ရွှေ့ပြောင်းပို့ဆောင်ပေးခြင်း၊ စားနပ်ရိက္ခာနှင့် အရေးပေါ်လိုအပ်သည့် အထောက်အပံ့များ ပေးအပ်ခြင်းတို့ကို အရှိန်အဟုန်မြှင့် ဆောင်ရွက်ပေးလျက်ရှိသည်။
ဒေသခံများ၏ ပြောကြားချက်အရ ရေကြီးရေလျှံမှုကြောင့် ကျေးရွာအချို့တွင် လမ်းပန်းဆက်သွယ်ရေး ပြတ်တောက်ပြီး သွားလာရေး အခက်အခဲများ ဖြစ်ပေါ်နေသဖြင့် ကယ်ဆယ်ရေးအဖွဲ့များက စက်လှေများ အသုံးပြု၍ ဘေးလွတ်ရာသို့ ကူညီရွှေ့ပြောင်းပေးနေရကြောင်း သိရသည်။
လက်ရှိတွင် ရက္ခိုင်ပြည်မြောက်ပိုင်း၌ မိုးဆက်လက်ရွာသွန်းနိုင်၍ မြစ်ချောင်းများအနီးနှင့် မြေနိမ့်ပိုင်းဒေသများတွင် နေထိုင်ကြသည့် မိဘပြည်သူများအနေဖြင့် ရေကြီးရေလျှံမှုအန္တရာယ်ကို အထူးသတိပြုကြရန် နှိုးဆော်ထားပါသည်။