AB News – ဇွန် ၂၊ ၂၀၂၆
ရက္ခိုင်ပြည်၊ ပုဏ္ဏားကျွန်းမြို့နယ်တွင် ဆေးဝါးနှင့် လူမှုကူညီရေးလုပ်ငန်းများ လုပ်ဆောင်ပေးနေသည့် စေတနာ့ဝန်ထမ်းတစ်ဦး ယမန်နေ့ ဇွန်လ ၁ ရက် ညပိုင်းက ယာဉ်တိုက်မှုဖြစ်ပွားကာ နေရာ၌ပင် ပွဲချင်းပြီး သေဆုံးသွားကြောင်း သိရသည်။
သေဆုံးသူမှာ “စေတနာအာရက္ခ ပြည်သူအကျိုးပြုဆေးခန်း” မှ စေတနာ့ဝန်ထမ်း ကိုဝင်းဘု (ခ) ဦးဝင်းမောင်သိန်း (၄၃ နှစ်) ဖြစ်ကြောင်း သိရသည်။
၎င်းသည် ဇွန်လ ၁ ရက်နေ့၊ ညနေ ၇ နာရီကျော်အချိန်က ဗုံးကြဲတိုက်ခိုက်ခံခဲ့ရသည့် ပုဏ္ဏားကျွန်းမြို့နယ်၊ ယိုးငူကျေးရွာရှိ ဆွေမျိုးဖြစ်သူထံ သွားရောက်ပြီးနောက် ဆိုင်ကယ်ဖြင့်အပြန် လမ်းခရီးတွင် တေဘာကားတစ်စီးက မျက်နှာချင်းဆိုင်လမ်းကြောဘက်သို့ ကျော်တက်မောင်းနှင်ရာမှ ဝင်တိုက်မိခဲ့ခြင်း ဖြစ်သည်။
ယာဉ်တိုက်မှုဖြစ်ပွားရာ လမ်းမပေါ်တွင် ဘရိတ်အုပ်ထားသည့် တာယာရာများ ၁၃ ပေခန့်အထိ ထင်ကျန်ခဲ့သည်ဟု မြေပြင်တာဝန်ရှိသူများ၏ ပြောဆိုချက်အရ သိရသည်။
သေဆုံးသူ ကိုဝင်းဘုသည် စစ်တွေမြို့နယ်၊ ဝါဘိုကျေးရွာဇာတိဖြစ်ပြီး စစ်ဘေးရှောင်ရင်း ၂၀၂၅ ခုနှစ်၊ ဧပြီလ ၂၄ ရက်နေ့မှစတင်ကာ အဆိုပါဆေးခန်းတွင် စေတနာ့ဝန်ထမ်းအဖြစ် ဝင်ရောက်ကူညီပေးနေသူ ဖြစ်သည်။
၎င်းကွယ်လွန်ချိန်တွင် ဇနီးဖြစ်သူနှင့်အတူ KG တန်း၊ နဝမတန်း (Grade-9) နှင့် ဒွါဒသမတန်း (Grade-12) တွင် ပညာသင်ကြားနေသည့် သားသမီးသုံးဦး ကျန်ရစ်ခဲ့သည်။
လက်ရှိတွင် ယာဉ်ကို မဆင်မခြင် မောင်းနှင်သည့် ယာဉ်မောင်းအား DLEPS တပ်ဖွဲ့က ဖမ်းဆီးစစ်ဆေးကာ အရေးယူနိုင်ရန် ဆောင်ရွက်နေကြောင်း သိရသည်။
ကွယ်လွန်သူ ကိုဝင်းဘု၏ ရုပ်အလောင်းကို ယနေ့ ဇွန်လ ၂ ရက်နေ့၊ မွန်းတည့် ၁၂ နာရီအချိန်တွင် သင်္ဂြိုဟ်သွားမည်ဖြစ်ကြောင်း သိရသည်။
ပုဏ္ဏားကျွန်းမြို့နယ်အတွင်း ယာဉ်မတော်တဆမှုများ မကြာခဏ ဖြစ်ပွားလျက်ရှိရာ ပြီးခဲ့သည့် မေလ ၃၁ ရက်နေ့၊ ည ၈ နာရီခန့်ကလည်း အဝေးပြေးလမ်းမကြီးပေါ်တွင် ဆိုင်ကယ်နှင့် ဘေးတွဲဆိုင်ကယ် တိုက်မိမှုဖြစ်ပွားခဲ့ပြီး ဒေသခံ လေးဦး ထိခိုက်ဒဏ်ရာရရှိခဲ့သည့် ဖြစ်စဉ်တစ်ခု ရှိခဲ့သည်။