AB News – ဇွန် ၁၇၊ ၂၀၂၆
ရက္ခိုင်ပြည်၊ ပုဏ္ဏားကျွန်းမြို့နယ်၊ ကျောက်ဆိပ်ကျေးရွာမှ ဆယ်ကျော်သက်အရွယ် မိန်းကလေးငယ် ၂ ဦးမှာ ကျေးရွာအနီးရှိ မြစ်တွင် ရေးဆင်းကူးစဉ် ရေနစ်သေဆုံးခဲ့ကြောင်း သတင်းရင်းမြစ်များက ဆိုကြသည်။
ရေနစ်သေဆုံးခဲ့သူများမှာ ကျောက်ဆိပ်ကျေးရွာမှ ဦးဇော်နိုင်ချေ၏ သမီး မဝင်းမြတ်သူ (၁၃)နှစ်နှင့် ဦးမောင်သန်းလွင်၏ သမီး မသန်းအေးနွယ် (၁၂)နှစ် တို့ဖြစ်ကြောင်း သိရသည်။
ရေနစ်သေဆုံးသူခဲ့သူ ၂ ဦးအနက် မဝင်းမြတ်သူ ၏ ရုပ်အလောင်းအား ယမန်နေ့ ဇွန်လ ၁၆ ရက်နေ့တွင် ရှာဖွေတွေ့ရှိခဲ့ပြီး မသန်းအေးနွယ်၏ ရုပ်အလောင်းအား ယနေ့အချိန်ထိ ရှာဖွေ၍ မရသေးကြောင်း ကူညီကယ်ဆယ်ရေးအဖွဲ့ဝင်များက အတည်ပြုပြောဆိုထားသည်။
လက်ရှိတွင် ပျောက်ဆုံးနေသည့်် မိန်းကလေးငယ်၏ ရုပ်အလောင်းအား ဒေသခံပြည်သူများနှင့် လူမှုကူရေးအသင်းများမှ ရှာဖွေရေးလုပ်ငန်းများကို ဆက်လက်လုပ်ကိုင်လျှက်ရှိကြောင်း ပုဏ္ဏားကျွန်းလူငယ်များ အစည်းအရုံး(PYA)မှ
ဥက္ကဌ ကိုပြည့်ဖြိုးနိုင် က AB News သို့ ပြောသည်။
“ရေနစ်သေဆုံးခဲ့သူ ၂ ဦးထဲက မိန်းကလေးငယ်တစ်ဦးရဲ့ ရုပ်အလောင်းကိုသာ ရှာတွေ့ပါသေးတယ်။ နောက်တစ်ဦးရဲ့ ရုပ်အလောင်းကိုတော့ ရှာမတွေ့သေးပါဘူး။ ဒီမနက်လည်း ကျနော်တို့ ရှာဖွေရေးလုပ်ငန်းတွေကို ဆောင်ရွက်နေပါတယ်” ဟု ဆိုသည်။
အလားတူ ပြီးခဲ့သည့် ဇွန်လ ၁၅ ရက်နေ့ကလည်း ပုဏ္ဏားကျွန်းမြို့၊ ဦးရာဇ်တောင် ကြိုးတံတား အနီးရှိ ကင်းချောင်းတွင် ခရီးသည်တင် စက်လှေတစ်စီး တိမ်းမှောက်မှုကြောင့် ခရီးသည် ၁၁ ဦး သေဆုံးခဲ့ရသည်။
လက်ရှိတွင် အာရက္ခပြည်သူ့တော်လှန်ရေးအစိုးရ၊ သယ်ယူပိုဆောင်ရေးဌာနကလည်း ရေယာဉ်ပိုင်ရှင်များနှင့် ခရီးသည်များအနေဖြင့် မိုးလေဝသနှင့် ဇလဗေဒအခြေအနေများကို အစဉ်မပြတ် ဂရုပြုစောင့်ကြည့်ပြီးမှ ခရီးသွားလာရန်၊ ရေကြောင်းခရီးသွားလာရာတွင် အသက်ကယ်အင်္ကျီ (Life Jacket) များကို မပျက်မကွက် ဝတ်ဆင်ကြရန်၊ ရေယာဉ်များပေါ်တွင် ခရီးသည်နှင့် ကုန်ပစ္စည်းများကို သတ်မှတ်ပမာဏထက် အလွန်အကျွံ တင်ဆောင်ခြင်း မပြုကြရန် ထုတ်ပြန်ထားသည်။
(ဓာတ်ပုံ – ပေးပို့)