AB News – ဇွန် ၆ ၊ ၂၀၂၆
ဘင်္ဂလားဒေ့ရှ်နိုင်ငံ၊ ကော့ဘဇားခရိုင်မှ ရက္ခိုင်ပြည်ဘက်သို့ ငါးဖမ်းစက်လှေများဖြင့် ဘိလပ်မြေအိတ် ၁,၄၀၀ ကျော် မှောင်ခိုတင်သွင်းလာသည့် မူဆလင် ၅၂ ဦးကို ဇွန်လ ၅ ရက်နေ့၊ ညနေပိုင်းအချိန်တွင် ဘင်္ဂလားဒေ့ရှ် ကမ်းခြေစောင့်တပ် (BCG) က ဖမ်းဆီးလိုက်ကြောင်း ဒေသတွင်းသတင်းများအရ သိရှိရသည်။
ဘင်္ဂလားပင်လယ်အော်အတွင်းရှိ စိန့်မာတင်ကျွန်းအနီး ကင်းလှည့်နေသည့် ကမ်းခြေစောင့်တပ်ဖွဲ့သည် သံသယဖြစ်ဖွယ် ငါးဖမ်းစက်လှေများကို တားဆီးစစ်ဆေးရာမှ ဤကဲ့သို့ ဖမ်းဆီးရမိခဲ့ခြင်းဖြစ်ကြောင်း သိရသည်။
ဘိလပ်မြေအိတ်များ တင်ဆောင်လာသည့် ငါးဖမ်းလှေ ၂ စင်းနှင့်အတူ မူဆလင် ၂၂ ဦးကို ကနဦး ဖမ်းဆီးရမိခဲ့ပြီး ဖမ်းဆီးရမိသူများ၏ ထွက်ဆိုချက်အရ ဆက်လက်ရှာဖွေရာ နောက်ထပ် ဘိလပ်မြေတင်လှေ ၃ စင်းနှင့် မူဆလင် ၃၀ ဦးကို ထပ်မံဖမ်းဆီးခဲ့ခြင်းဖြစ်သည်။
ငါးဖမ်းစက်လှေ ၅ စင်း၊ ဘိလပ်မြေအိတ် ၁,၄၅၀ အိတ်နှင့်အတူ မူဆလင် ၅၂ ဦးကို ဖမ်းဆီးရမိခဲ့ကြောင်း ကမ်းခြေစောင့်တပ်ဖွဲ့က ဆိုထားသည်။
ကမ်းခြေစောင့်တပ် မီဒီယာအရာရှိ Shabbir Alam Sujan ၏ ပြောကြားချက်အရ ရက္ခိုင်ပြည်ဘက်တွင် ဘိလပ်မြေအိတ်များ စျေးကောင်းရရှိပြီး အကျိုးအမြတ် ပိုမိုရရှိနေသည့်အတွက် ဤကဲ့သို့ မှောင်ခိုသယ်ဆောင်ခြင်းဖြစ်ကြောင်း ဆိုသည်။
လက်ရှိတွင် BCG က ဖမ်းဆီးရမိသည့် သက်သေခံပစ္စည်းများနှင့် တရားခံများကို ဥပဒေအရ အရေးယူနိုင်ရန် တက်နက်ဖ် (Teknaf) ရဲစခန်းသို့ လွှဲပြောင်းထားကြောင်း သိရပြီး ဘင်္ဂလားဒေ့ရှ်သတင်းများ၏ ဖော်ပြချက်အရ ပြီးခဲ့သည့် မေလ တတိယအပတ်မှ ဇွန်လ ၅ ရက်နေ့အထိ ဘင်္ဂလားဒေ့ရှ်-ရက္ခိုင်နယ်စပ် ပင်လယ်ပြင်အတွင်း ဘိလပ်မြေအိတ် ၅၀၀၀ နီးပါးနှင့်အတူ မှောင်ခိုကူးသူ မူဆလင် ၉၀ နီးပါးအထိ ဖမ်းဆီးရမိထားကြောင်း သိရသည်။
Photo – The Daily Times of Bangladesh