စစ်ကော်မရှင်၏ တန်ပြန်ထိုးစစ်ကို ပူးပေါင်းတန်ပြန်မည်

​AB News- နိုဝင်ဘာ ၁၁၊ ၂၀၂၅
ဒေဝီ

​ရက္ခိုင်အမျိုးသားအဖွဲ့ချုပ် (ULA/AA) နှင့် ချင်းညီနောင် (Chin Brotherhood – CB) အဖွဲ့တို့သည် စစ်ကော်မရှင်၏ တန်ပြန်ထိုးစစ်များကို ပူးပေါင်း တန်ပြန်ရန်အတွက် စစ်ရေးကိစ္စများကို အဓိကထား တွေ့ဆုံဆွေးနွေးခဲ့ကြပြီး၊ ရေရှည်အတွက် စစ်ရေး၊ နိုင်ငံရေးနှင့် စီးပွားရေး မဟာမိတ်အဖြစ် ချိတ်ဆက်ပူးပေါင်းဆောင်ရွက်ရန်အထိပါ ဆွေးနွေးခဲ့ကြောင်း CB ၏ ပြောရေးဆိုခွင့်ရှိသူ ဆလိုင်းယောမန်က ထုတ်ဖော်ပြောဆိုလိုက်သည်။

​အဆိုပါ တွေ့ဆုံဆွေးနွေးပွဲကို ပြီးခဲ့သည့် အောက်တိုဘာလအတွင်း ရက္ခိုင်ပြည်နအတွင်း၌ ပြုလုပ်ခဲ့ခြင်းဖြစ်ပြီး၊ အာရက္ခတပ်တော် (AA) စစ်ဦးစီးချုပ် ဗိုလ်ချုပ်ထွန်းမြတ်နိုင် အပါအဝင် ထိပ်ပိုင်းခေါင်းဆောင်များနှင့်အတူ တွေ့ဆုံ ဆွေးနွေး ခဲ့ခြင်းဖြစ်ကြောင်း ဆလိုင်းယောမန်က နိုဝင်ဘာ ၈ ရက်က ကျင်းပသည့် ချင်းညီနောင် ရန်ပုံငွေရှာဖွေပွဲတွင် ပြောကြားခဲ့သည်။

​ဆွေးနွေးပွဲအတွင်း ULA/AA နှင့် CB တို့အကြား စစ်ကော်မရှင်၏ တန်ပြန်ထိုးစစ် ဆင်လာနိုင်သည့် အခြေအနေများကို ခန့်မှန်းခြင်း၊ ပြင်ဆင်ခြင်းနှင့် ပူးပေါင်းဆောင်ရွက်နိုင်သည့် ကိစ္စများကို ပူးပေါင်းဆောင်ရွက်ကြရန် အဓိကထား ဆွေးနွေးခဲ့ကြောင်း သိရသည်။

​“ပြီးခဲ့တဲ့လကပဲ တွေ့ကြတယ်။ ဆုံကြတယ်။ ဆွေးနွေးကြတယ်။ အဓိကတော့ တော်လှန်ရေးနဲ့ ပတ်သက်လို့ပါ။ တော်လှန်ရေးနဲ့ ပတ်သက်လို့ စစ်ရေးမှာ ဘယ်လိုရှိမလဲ၊ ဘယ်လိုပူးပေါင်းကြမလဲ။ ဘယ်လိုမျိုး အပြန်အလှန် ကူညီကြမလဲပေါ့။ အဓိကတော့ စစ်ကော်မရှင်ရဲ့ တန်ပြန်ထိုးစစ်ဆင်လာနိုင်တာကို ခန့်မှန်းကြတာပေါ့။ ပြင်ဆင်ထားကြတာပေါ့။ အဲဒီအတွက် ပူးပေါင်းကြတာပေါ့” ဟု ဆလိုင်းယောမန်က ဆိုသည်။

​ယင်းတွေ့ဆုံမှုသည် ခဏတာတွေ့ဆုံခြင်းမျိုး မဟုတ်ဘဲ အချိန်များစွာ တွေ့ဆုံ၍ အပြန်အလှန် လက်ဆောင်များပေးအပ်ခြင်း၊ မှတ်တမ်းပုံများ ရိုက်ကူးခြင်းတို့ ပြုလုပ်ခဲ့ကြပြီး တွေ့ဆုံမှုများအတွင်း သင်ယူစရာ သင်ခန်းစာများ၊ လေ့လာစရာများလည်း ရရှိခဲ့ကြောင်း ပြောသည်။

ရက္ခိုင်ပြည်သို့ တွေ့ဆုံဆွေးနွေးရန် လာရောက်ခဲ့သည့် ခရီးစဉ်အတွင်း အာရက္ခတပ်တော် ထိန်းချုပ်ထားသည့် မြို့ကြီး ၅ မြို့ကိုလည်း လွတ်လပ်စွာ သွားလာခဲ့သည်ဟု ဆလိုင်းယောမန်က ဆိုသည်။

​နယ်နိမိတ်ချင်း ထိစပ်နေသော ပြည်နယ်များဖြစ်သည့် ရက္ခိုင်ပြည်နှင့် ချင်းပြည်တို့အကြား အနာဂတ်တွင် အပြန်အလှန် ပူးပေါင်းချိတ်ဆက်ရန် ကိစ္စများကိုပါ ဆွေးနွေးခဲ့ကြောင်း သိရသည်။

​“စစ်ရေးမဟာမိတ်အပြင် နောက်နောင်ကျရင် နိုင်ငံရေးမဟာမိတ်၊ စီးပွားရေးမဟာမိတ်အထိ အဲဒီလိုမျိုး ပူးပေါင်းချိတ်ဆက်ဖို့။ လူမျိုးချင်း အပြန်အလှန် ကူညီဖေးမကြဖို့ပေါ့” ဟု ၎င်းက ပြောသည်။

​ULA/AA ၏ သဘောထားမှာ ရက္ခိုင်လူမျိုးများ ကြီးပွားတိုးတက်လျှင် ချင်းလူမျိုးများပါ အကျိုးခံစားခွင့် ရရှိနိုင်ရန်နှင့် ချင်းလူမျိုးများ ကြီးပွားတိုးတက်ပါကလည်း ရက္ခိုင်လူမျိုးများပါ အကျိုးခံစားနိုင်ရန် အပြန်အလှန် အကျိုးစီးပွား ရှိစေလိုခြင်းဖြစ်ကြောင်း ဆလိုင်းယောမန်က ပြောကြားသည်။

​ချင်းညီနောင် (CB) အနေဖြင့် ချင်းပြည်နယ်က ကျင်ဒွေး၊ မတူပီ၊ မင်းတပ်၊ ကန်ပက်လက်နှင့် ဖလမ်းမြို့နယ်များကို မဟာမိတ်များဖြင့် ပူးပေါင်းတိုက်ခိုက်သိမ်းပိုက်မှုအတွင်း အာရက္ခတပ်တော် (AA) ၏ စစ်ရေးအကူအညီများစွာ ရရှိခဲ့ကြောင်းကိုလည်း မြို့သိမ်းစစ်ဆင်ရေး အောင်ပွဲများတွင် ပြောဆိုခဲ့သည်။

​ချင်းညီနောင်အဖွဲ့တွင် ချင်းအမျိုးသားကောင်စီ – မင်းတပ်/ CDF – မင်းတပ်၊ ချင်းအမျိုးသားအဖွဲ့ချုပ် (CNO/ CNDF)၊ ဇိုမီးဖက်ဒရယ်အစည်းအရုံး -ZFU / PDF – Zoland၊ ချင်းကာကွယ်ရေးတပ် ကန်ပက် လက်/ CDF – ကန်ပကလက်၊ မတူပီတော်လှန်ရေးအဖွဲ့ချုပ် – MRO/ CDF – မတူပီ နှင့် မရာနယ်မြေ အုပ်ချုပ်ရေးကောင်စီ (MTC/ MDF) တို့ ပါဝင်ကြောင်း သိရသည်။