AB News – ဇွန် ၁၆၊ ၂၀၂၆
ကျောက်ဖြူမြို့နယ်တွင် စစ်ကော်မရှင် လေကြောင်းတိုက်ခိုက်မှုနှင့် လက်နက်ကြီးပစ်ခတ်မှုကြောင့် ဘုန်းကြီးကျောင်း အပါအဝင် လူနေအိမ် ၄ လုံးခန့် ပျက်စီးခဲ့ရကြောင်း သိရသည်။
ယမန်နေ့ ဇွန်လ ၁၅ ရက်နေ့၊ နံနက် ၁၀ နာရီခန့်အချိန်တွင် စစ်ကော်မရှင်လေတပ်မှ ကျောက်ဖြူမြို့နယ်၊ အောင်သပြေကျေးရွာအတွင်းသို့ ဗုံးသီး ၂ လုံး ကြဲချတိုက်ခိုက်ခဲ့ကြောင်း သတင်းရင်းမြစ်များက ဆိုကြသည်။
အဆိုပါ ဗုံးကြဲတိုက်ခိုက်မှုအတွင်း ဗုံးသီး ၁ လုံးမှာ အောင်သပြေကျေးရွာမှ ဘုန်းတော်ကြီးကျောင်းဝန်းအတွင်း ကျရောက်ပေါက်ကွဲခဲ့၍ ဘုန်းကြီးကျောင်းဆောင် ပျက်စီးခဲ့ရကြောင်း သိရသည်။
ထို့ပြင် နောက်ထပ် ဗုံးသီး ၁ လုံးမှာ ကျေးရွာအတွင်း ကျရောက်ပေါက်ကွဲခဲ့၍ လူနေအိမ် ၂ လုံး ပျက်စီးခဲ့ရကြောင်း သိရသည်။
ထို့အတူ ယနေ့ နံနက် ၈ နာရီခွဲအချိန်တွင်လည်း အောင်သပြေကျေးရွာအတွင်းသို့ စစ်ကော်မရှင် နေဗီမှ လက်နက်ကြီး ၄ လုံး ပစ်ခတ်တိုက်ခိုက်ခဲ့သည်။
စစ်ကော်မရှင် နေဗီမှ ပစ်ခတ်လိုက်သည့် လက်နက်ကြီးကျည် ၂ လုံးမှာ အောင်သပြေကျေးရွာအတွင်း ကျရောက်ပေါက်ကွဲ၍ လူနေအိမ် ၂ လုံး ပျက်စီးခဲ့ပြီး နောက်လက်နက်ကြီးကျည် ၂ လုံးမှာ ကျေးရွာအနီးဝန်းကျင်တွင် ကျရောက်ပေါက်ကွဲခဲ့သောကြောင့် နွား ၈ ကောင် သေဆုံးခဲ့ကြောင်း သိရသည်။
ဓာတ်ပုံ – APM