AB News – သြဂုတ် ၂၄၊ ၂၀၂၅
နွယ်စိုး
အာရက္ခတပ်တော် (AA) သည် ဩဂုတ်လ ၂၃ ရက်နေ့တွင် ဘင်္ဂလားပင်လယ်အော်၊ နတ်မြစ်ဝရှိ အာရက္ခရေပိုင်နက်အတွင်း ခွင့်ပြုချက်မရှိဘဲ ဝင်ရောက်ငါးဖမ်းနေသည့် ဘင်္ဂလားဒေ့ရှ် ငါးဖမ်းစက်လှေ ၄ စီးနှင့်အတူ ငါးဖမ်းသမား ၁၂ ဦးကို ဖမ်းဆီးခဲ့ကြောင်း သတင်းရရှိသည်။
ဖမ်းဆီးခံရသူများသည် ဘင်္ဂလားဒေ့ရှ်နိုင်ငံ၊ ကော့စ်ဘဇားခရိုင်၊ တက္ကနက်မြို့နယ်ဘက်မှ ဖြစ်ပြီး အာရက္ခရေပိုင်နက်အတွင်း မကြာခဏဆိုသလို ကျူးကျော်ဝင်ရောက်လေ့ရှိကြောင်း ဒေသခံများက ပြောသည်။
ဒေသခံတစ်ဦးက “ဘင်္ဂလားဘက်က ငါးဖမ်းစက်လှေတွေက ကျနော်တို့ရေပိုင်နက်ထဲကို အမြဲတမ်း ခိုးဝင်ငါးဖမ်းကြပါတယ်။ ဒီတစ်ခါလည်း ထပ်ဝင်လာလို့ AA က ဖမ်းသွားတာပါ” ဟု ဆိုသည်။
ဘင်္ဂလားဒေ့ရှ် မီဒီယာအချို့တွင်လည်း “နတ်မြစ်ဝမှ ငါးဖမ်းပြီး ပြန်လာစဉ် AA က ဖမ်းသွားသည်” ဟု ဖော်ပြထားပြီး၊ ဖမ်းဆီးခံရသူများ လုံခြုံစွာ ပြန်လည်လွတ်မြောက်ရေးအတွက် တက်ကနက်မြို့နယ်အာဏာပိုင်များက ဆောင်ရွက်နေကြောင်းလည်း ဖော်ပြထားသည်။
တရားမဝင်ပိုင်နက် ကျူးကျော်မှုများသည် နေ့စဥ် ရှိနေသည့်အတွက် အာရက္ခတပ်တော်မှ လည်း ထိုကဲ့သို့ ခိုးဝင်လာသည့် စက်လှေများကို အချိန်နှင့်တပြေးညီ ဖမ်းဆီးအရေးယူလေ့ရှိကြောင်း တွေ့ရသည်။
ပြီးခဲ့သည့် ၂၀၂၄ ခုနှစ်၊ ဒီဇင်ဘာလကတည်းက နတ်မြစ်ဝတွင် ခိုးဝင်ငါးဖမ်းခဲ့သည့် စုစုပေါင်း ၂၁၁ ဦးကို အာရက္ခတပ်တော်က ဖမ်းဆီးခဲ့ပြီး၊ ၎င်းတို့ထဲမှ ၁၈၉ ဦးနှင့် စက်လှေ ၂၇ စီးကို ပြန်လွှတ်ပေးခဲ့ကြောင်းလည်း သိရသည်။