AB News – မတ်လ ၁၆၊ ၂၀၂၄
ရက္ခိုင်ပြည်၊ ပုဏ္ဏားကျွန်းနယ်တွင် ယမန်နေ့ မတ်လ ၁၅ ရက်နေ့က အကြမ်းဖက် စစ်ကောင်စီမှ ပစ်ခတ်သည့် လက်နက်ကြီးကျည်ထိမှန်ပြီး ပြည်သူ ၉ ဦးထက်မနည်း ပြင်းထန် ဒဏ်ရာရရှိသွားကြောင်း သိရသည်။
ဒဏ်ရာရရှိသူများမှာ ပုဏ္ဏားကျွန်းမြို့နယ်၊ ကုန်တန်းကြိမ်ချောင်းရွာမှ အသက် ၅၄ နှစ်အရွယ် ဒေါ်မနွဲ့ရီ၊ အသက် ၂၇ နှစ်ရွယ် ဒေါ်နှင်းနှင်းဝေ၊ အသက် ၅ နှစ်အရွယ် မခိုင်သဇင်ဦး၊ အသက် ၃ နှစ်အရွယ် မနှင်းယုခိုင်၊ အသက် ၁၀ နှစ်အရွယ် မခင်ဆန်းဦး၊ အသက် ၁၆ နှစ်အရွယ် မဇင်ဇင်မိုး၊ အသက် ၄၆ နှစ်အရွယ် ဒေါ်အေးခင်မေ၊ အသက် ၅၃ နှစ်အရွယ် ဦးသန်းနွဲ့ နှင့် အသက် ၇၃ နှစ်အရွယ် ဦးဦးသိန်းထွန်းတို့ဖြစ်သည်။
ထို့အပြင် တချိန်တည်းတွင် ပုဏ္ဏားကျွန်းမြို့နယ် ကျောက်သံရွာတွင်လည်း လက်နက်ကြီးကျည်ထိမှန်ပြီး ၄ ဦးထက်မနည်း ဒဏ်ရာရရှိသွားကြား ကြားရသော်လည်း ABN အနေဖြင့် သီးခြားအတည်မပြုနိုင်သေးပါ။
စစ်တွေအခြေစိုက် စစ်ကောင်စီ ပါဒလိတ် ခလရ ( ၃၄၄) တပ်ရင်းမှ ယမန်နေ့ မတ်လ ၁၅ ရက်နေ့ နံနက် ၁၀ နာရီကျော်တွင် ပုဏ္ဏားကျွန်းနယ်သို့ လက်နက်ကြီးများဖြင့် တရစပ်ပစ်ခတ်ခဲ့ရာတွင် ထိုရွာများတွင် လက်နက်ကြီးထိမှန်ကာ အပြစ်မဲ့ပြည်သူများ ဒဏ်ရာရသွားခြင်း ဖြစ်သည်ဟု သိရသည်။
အဆိုပါလက်နက်ကြီးသည် ရွာအတွင်းသို့ ကျရောက်ပေါက်ကွဲခဲ့ခြင်းဖြစ်ပြီး အိမ်ထဲတွင်ရှိနေသည့် သူများ ကျည်ထိမှန် ဒဏ်ရာ ရရှိသွားကြောင်း ဒေသခံတစ်ဦးက AB News သို့ ပြောသည်။
“လက်နက်ကြီးက ရွာထဲမှာ ကျတယ်။ အိမ်မှာထိုင်နေတဲ့သူတွေ လက်နက်ကျည်စ ထိမှန်သွားတယ်။ ဒဏ်ရာပြင်းတဲ့လူတွေလည်း ရှိတယ်” ဟု ဆိုသည်။
၎င်းတို့ထဲတွင် အသက် ၃ နှစ်အရွယ်ရှိ မနှင်းယုခိုင်မှာ ဦးခေါင်းနှင့် ရင်ဘတ်တွင် ဒဏ်ရာပြင်းထန်စွာရရှိခဲ့ပြီး အသက်အန္တရာယ်စိုးရိမ်ရသည့်အခြေအနေတွင် ရှိနေကြောင်း သိရသည်။
ထို့အပြင် ဒေါ်ခင်အေးမေမှာလည်း ညာဖက်ဝမ်းပိုက်၌ပြင်းထန်ဒဏ်ရာရရှိသွားခဲ့ကာ ဦးဦးသိန်းထွန်းမှာ ဘယ်ဖက်နားထင်ပြင်းထန်ဒဏ်ရာရရှိခဲ့သည်။
ထိခိုက်ဒဏ်ရာရရှိသူများအား နီးစပ်ရာဆေးရုံတွင် အရေးပေါ်ဆေးကုသမှုခံယူလျက်ရှိကြောင်း သိရသည်။
ပြီးခဲ့သည့် မတ်လ ၁၄ ရက်နေ့ကလည်း စစ်တွေမြစ်တွင် အခြေချတပ်စွဲထားသည့် စကစ နေဗီမှ လက်နက်ကြီး ၁ လုံးသည် ပုဏ္ဏားကျွန်းမြို့ပေါ်တွင် ကျရောက်ပေါက်ကွဲ ပြီး ပေါက်တောမြို့နယ်က စစ်ဘေးရှောင်လာသည့် ပြည်သူ ၁၄ ဦး လက်နက်ကျည်ထိမှန်ပြီး ၃ ဦးသေဆုံးသွားခဲ့ကာ ၁၁ ဦးပြင်းထန်ဒဏ်ရာရှိသွားခဲ့သည်။
အကြမ်းဖက် စစ်ကောင်စီအဖွဲ့သည် ရက္ခိုင်ရှိပြည်သူများကို လက်နက်ကြီးများဖြင့် နေ့စဥ်ရက်ဆက် ပစ်ခတ်နေသည့်အတွက် သေဆုံးသူနှင့် ဒဏ်ရာ ရရှိသူများစွာရှိလာသည်။
Website
www.arakanbaynews.com
Facebook
https://www.facebook.com/arakanbaynewsinfo?mibextid=ZbWKwL