ABN-ဟိန်းထွန်း
သြဂုတ် ၂ ရက်
ရခိုင်တွင် AA နှင့်ဆက်စပ်သည်ဟုဆိုပြီး မတရားအသင်းဆက်သွယ်မှုပုဒ်မ ၁၇/၁ ဖြင့် တရားရင်ဆိုင်နေရသည့် တေးရေးဆရာ ဦးစန်းကိုအပါအဝင်စုစုပေါင်း ၅၅ ဦးသည် ယနေ့တွင်လွတ်မြောက်လာကြောင်းသိရသည်။
လွတ်မြောက်လာသူများမှာ သံတွဲထောင်မှ ၁၅ ဦး၊ ကျောက်ဖြူထောင်မှ ၁၀ ဦး၊ စစ်တွေထောင်မှ ၁၁ ဦး၊ ကျောက်တော်အချုပ်ခန်းမှ၂ ဦး၊ ဘူးသီးတောင်နှင့် မောင်တောအချုပ်မှ ၁၇ ဦးတို့ဖြစ်သည်။
တေးရေးဆရာဖြစ်သော ဦးစန်းကိုကို ပြီးခဲ့သည့် နိုဝင်ဘာလ ၂၃ ရက်နေ့က ငပလီအခြေစိုက် ခလရ -၅၅ မှ ၎င်း၏နေအိမ်သို့ သွားရောက်ပြီး AA နှင့်ဆက်စပ်သည်ဟု မေးမြန်းစရာရှိသည်ဆိုပြီး ဖမ်းဆီးသွားခဲ့ကာ ဗိုလ်ကြီးရဲလင်းထွန်းက တရားလိုပြုလုပ်ပြီး သံတွဲရဲစခန်းတွင် ပုဒ်မ ၁၇/၁ဖြင့်အမှုဖွင့်ခဲ့ကြောင်းသိရသည်။
မတရားအသင်းဆက်သွယ်မှုပုဒ်မ ၁၇/၁ ဖြင့်လွတ်မြောက်လာမည့်သူ ၇၂ ဦးရှိကြောင်း သိရှိရသော်လည်း ယနေ့တွင် ၅၅ ဦးသာလွတ်မြောက်လာသေး၍ ကျန်ရှိနေသည့်အကျဥ်းသားများလည်း ရှိနေသေးကြောင်းသိရသည်။
အဆိုပါ ၇၂ ဦးမှာ ရခိုင်ပြည် (သို့)မြန်မာတစ်နိုင်ငံအတိုင်းအတာဖြင့် လွတ်မြောက်လာမည်လားကိူမူ တိတိကျကျ ဖော်ပြမထားကြောင်း နိုင်ငံရေးအကျဥ်းသားဟောင်း တစ်ဦးက ပြောသည်။
ဓာတ်ပုံ-ကျောက်ဖြူထောင်မှ လွတ်လာသူများကို တွေ့ရစဥ်/ထွန်းထွန်းနိုင်