AB News- မေ ၂၀၊ ၂၀၂၆
ပလက်ဝမြို့နယ်၊ ဆမီးမြို့တွင် ယမန်နေ့ မေ ၁၉ ရက်နေ့ မွန်းလွဲပိုင်းအချိန်တွင် လေပြင်းပြင်းထန်ထန် တိုက်ခတ်ခဲ့မှုကြောင့် မြို့ပေါ်ရှိ ယာယီဈေးဆိုင်တဲတချို့ အမိုးလန်ပျက်စီးခဲ့ပြီး သစ်ကိုင်းများကျိုးကျကာ ပျက်စီးဆုံးရှုံးမှုများရှိခဲ့ကြောင်း သိရှိရသည်။
ယမန်နေ့ မေလ ၁၉ ရက်၊ မွန်းလွဲ ၂ နာရီ၊ ၄၀ မိနစ်မှ စတင်ကာ ၃ နာရီ၊ ၁၀ မိနစ်ခန့်အထိ နာရီဝက်နီးပါးကြာ မိုးသက်လေပြင်း တိုက်ခတ်ခဲ့ခြင်းဖြစ်ပြီး မြို့ပေါ်ရပ်ကွက်များရှိ ယာယီဈေးတဲတချို့ ပျက်စီးသွားခဲ့ခြင်း ဖြစ်သည်။
”မနေ့က ညနေပိုင်းအချိန်မှာ လေ တော်တော်ကြမ်းတယ်။ မိနစ် ၃၀ လောက် တရစပ် တိုက်တာ။ မြို့ပေါ်က ယာယီဆောက်ထားတဲ့ ဈေးဆိုင်တချို့ အမိုးတွေ လန်ကုန်တယ်။ သစ်ပင်ကိုင်းတွေ ကျိုးကျတာလည်း ရှိတယ်” ဟု ဆမီးမြို့ခံတစ်ဦးက AB News သို့ ပြောသည်။
အဆိုပါ လေပြင်းတိုက်ခတ်မှုကြောင့် မြို့ပေါ်တွင် ထိခိုက်ပျက်စီးမှုအချို့ရှိခဲ့သော်လည်း ဆမီးမြို့နယ်အတွင်းရှိ အခြားကျေးရွာများတွင် ပျက်စီးဆုံးရှုံးမှုနှင့် ထိခိုက်ဒဏ်ရာရရှိမှု ရှိ/မရှိ အခြေအနေ အသေးစိတ်ကိုမူ လက်ရှိအချိန်ထိ အတည်မပြုနိုင်သေးပေ။
ဖုန်းလိုင်းနှင့် ဆက်သွယ်ရေး အခက်အခဲများကြောင့် ကျေးရွာများဘက်မှ အခြေအနေကို လတ်တလောတွင် အသေးစိတ် မသိရသေးဘဲ ထိခိုက်မှုအခြေအနေကို ဆက်လက်စုံစမ်းနေဆဲဖြစ်သည်။
ပလက်ဝမြို့နယ်အတွင်းရှိ ဆမီးဒေသသည် ကုန်းမြင့်ဆန်ပြီး ရာသီဥတုအကူးအပြောင်းကာလများတွင် မိုးသက်လေပြင်းနှင့် မုန်တိုင်းဒဏ်ကို မကြာခဏ ရင်ဆိုင်ရလေ့ရှိသည့် ဒေသတစ်ခု ဖြစ်သည်။
ရုပ်သံ – CJ (ပေးပို့)