AB News – မတ် ၂၇၊ ၂၀၂၆
ကမ္ဘာ့ရေနံကုန်သွယ်မှု၏ ငါးပုံတစ်ပုံခန့် ဖြတ်သန်းရာ မဟာဗျူဟာကျသည့် ဟော်မုဇ်ရေလက်ကြား (Strait of Hormuz) ကို အသုံးပြုမည့် သင်္ဘောများထံမှ “ဖြတ်သန်းခကြေး” အဖြစ် အမေရိကန်ဒေါ်လာ ၂ သန်းအထိ ကောက်ခံရန် အီရန်လွှတ်တော်က ဥပဒေကြမ်းတစ်ရပ် ရေးဆွဲနေကြောင်း သိရသည်။
တစ်ဖက်တွင်လည်း အဆိုပါရေလမ်းကြောင်းကို ဘေးကင်းစွာ ဖြတ်သန်းခွင့်ရမည့် မိတ်ဖက် ၆ နိုင်ငံစာရင်းကို အီရန်က ထုတ်ပြန်လိုက်ပြီး ယင်းနိုင်ငံများမှာ တရုတ်၊ ရုရှား၊ အိန္ဒိယ၊ ပါကစ္စတန်၊ အီရတ်နှင့် ဘင်္ဂလားဒေ့ရှ် တို့ ဖြစ်ကြောင်း အီရန်နိုင်ငံခြားရေးဝန်ကြီး အဘတ်စ် အာရတ်ချီက အတည်ပြုပြောကြားခဲ့သည်။
နိုင်ငံခြားရေးဝန်ကြီးက အမေရိကန်အနေဖြင့် အီရန်၏ ရေလက်ကြားအပေါ် ထိန်းချုပ်နိုင်စွမ်းကို လျှော့တွက်ခဲ့သော်လည်း ယခုအခါ လက်တွေ့လုပ်ဆောင် ပြခဲ့ပြီးဖြစ်ကြောင်းနှင့် ရန်သူ့နိုင်ငံများနှင့် ၎င်းတို့၏ မဟာမိတ်များအတွက်မူ ရေလမ်းကြောင်းကို ဆက်လက်ပိတ်ထားမည်ဖြစ်ကြောင်း ဆိုသည်။
Bloomberg သတင်းဌာန၏ ဖော်ပြချက်အရ ဘေးကင်းစွာ ဖြတ်သန်းလိုသည့် သင်္ဘောများထံမှ ဒေါ်လာ ၂ သန်း (မြန်မာငွေ ကျပ် ၁၆ ဘီလီယံခန့်) ကောက်ခံမှုကို တရားဝင်ဖြစ်စေရန် အီရန်လွှတ်တော်က ဥပဒေကြမ်းကို လာမည့်အပတ်တွင် အပြီးသတ်နိုင်ရန် မျှော်မှန်းထားသည်။
ရေလမ်းကြောင်း ပိတ်ဆို့မှုကြောင့် ကမ္ဘာ့ရေနံဈေးနှုန်းမှာ သိသိသာသာ မြင့်တက်လာခဲ့ပြီး Brent ရေနံစိမ်းဈေးမှာ တစ်စည်လျှင် အမေရိကန်ဒေါ်လာ ၁၀၄ အထက်သို့ ခေတ္တရောက်ရှိသွားခဲ့သည်။
ယခုကဲ့သို့ သယ်ယူပို့ဆောင်စရိတ်များ အဆမတန် မြင့်တက်လာခြင်းသည် စက်သုံးဆီကို ပြည်ပမှ အဓိကတင်သွင်းနေရသည့် မြန်မာနိုင်ငံအတွက် စိုးရိမ်စရာ ဖြစ်လာသည်။
ပြည်တွင်းစက်သုံးဆီဈေးနှုန်းများ ထပ်မံမြင့်တက်လာနိုင်သည့်အပြင်၊ ယင်းမှတစ်ဆင့် အခြေခံကုန်စည်စီးဆင်းမှုစရိတ်နှင့် ကုန်ဈေးနှုန်းများအပေါ် တိုက်ရိုက်သက်ရောက်မှုများ ရှိလာနိုင်ကြောင်း စီးပွားရေးလေ့လာသူများက သုံးသပ်ထားကြသည်။
#AB_News #StraitOfHormuz #Iran #USA #GlobalNews #MiddleEastConflict #MaritimeSecurity #TransitFee #OilTrade #WorldPolitics #OilPrice #BrentCrude #GlobalEconomy #EnergyCrisis #ShippingIndustry #FuelPrice