AB News – ဖေဖော်ဝါရီ ၂၃၊၂၀၂၆
ဘင်္ဂလားဒေ့ရှ်နိုင်ငံ၏ ယာယီအစိုးရအဖွဲ့အား ၁၈ လကြာ တာဝန်ယူ ဦးဆောင်ခဲ့သည့် နိုဗယ်ငြိမ်းချမ်းရေးဆုရှင် ပရော်ဖက်ဆာ မူဟာမတ်ဒ်ယူနွတ်စ်သည် ၎င်း၏ မူလတာဝန်များကို ပြန်လည်ထမ်းဆောင်ရန် Yunus Centre ကို ပြန်လည်ရောက်ရှိလာပြီ ဖြစ်ကြောင်း သိရသည်။
ယမန်နေ့ ဖေဖော်ဝါရီလ ၂၂ ရက်နေ့ နံနက်ပိုင်းအချိန်တွင် ဒါကာမြို့ရှိ Telecom Bhaban ကို ရောက်ရှိလာချိန် ပရော်ဖက်ဆာယူနွတ်စ်ကို လုပ်ဖော်ကိုင်ဖက်များက နွေးထွေးစွာ ကြိုဆိုခဲ့ကြသည်။
ပရော်ဖက်ဆာယူနွတ်စ်အနေဖြင့် ပြန်လည်ထမ်းဆောင်မည့် မူလတာဝန်တွေများမှာ ၎င်းကိုယ်တိုင်တည်ထောင်ထားသော Yunus Centre ၏ ဥက္ကဋ္ဌတာဝန်၊ Grameen အဖွဲ့အစည်းတွင် အကြံပေးနှင့် ဦးဆောင်သူတာဝန်များ ဖြစ်သည်။
အဓိကအားဖြင့် ဆင်းရဲနွမ်းပါးမှု တိုက်ဖျက်ရေး၊ အသေးစားငွေရေးကြေးရေးလုပ်ငန်းများနှင့် အမြတ်ထက်လူမှုအကျိုးပြုကို ရှေ့တန်းတင်သော လူမှုစီးပွားရေး (Social Business) လုပ်ငန်းများကို ပြန်လည်ဦးဆောင်သွားမည် ဖြစ်သည်။
ဘင်္ဂလားဒေ့ရှ်နိုင်ငံတွင် ဖေဖော်ဝါရီလ ၁၂ ရက်နေ့က ကျင်းပပြုလုပ်ခဲ့သည့် အထွေထွေရွေးကောက်ပွဲ၌ ဘင်္ဂလားဒေ့ရှ်အမျိုးသားပါတီ(BNP)မှ အပြတ်အသတ် အနိုင်ရရှိခဲ့သည်။
မဲအနိုင်ရရှိခဲ့မှုကြောင့် ဘင်္ဂလားဒေ့ရှ်အမျိုးသားပါတီ(BNP) ပါတီမှာ အစိုးရဖွဲ့ခွင့် ရရှိမည်ဖြစ်၍ ပါတီခေါင်းဆောင်သူဖြစ်သူ အသက် ၆၀ အရွယ် တာရစ်ရာမန် (Tarique Rahman) ကို ဝန်ကြီးချုပ်အဖြစ် ခန့်အပ်ခဲ့ကြောင်း သိရသည်။
Tarique Rahman သည် ယနေ့ ဖေဖော်ဝါရီလ ၂၃ ရက်နေ့တွင် ဘင်္ဂလားဒေ့ရှ်ဝန်ကြီးချုပ်အဖြစ် ဒါကာစစ်တပ်နယ်မြေထဲမှ လက်နက်ကိုင်တပ်ဖွဲ့များဌာနချုပ်တွင် ရှိသော ဝန်ကြီးချုပ်ရုံးခန်းကို ပထမဆုံးအကြိမ်အဖြစ် သွားရောက်ရုံးထိုင်ခဲ့ကြောင်း ဘင်္ဂလားဒေ့ရှ်မီဒီယာများတွင် ရေးသားဖော်ပြသည်။
ယင်းအပြင် ဘင်္ဂလားဒေ့ရှ်နိုင်ငံ၌ အစိုးရအသစ်ဖွဲ့စည်းပြီးနောက် စစ်တပ်၏ ထိပ်တန်းအရာရှိအချို့ အပြောင်းအလဲပြုလုပ်ခဲ့ကြောင်း သိရသည်။