AB News-ဟိန်းထွန်း
အောက်တိုဘာ ၂ဝ ရက်
ရခိုင်ပြည်၊ ရသေ့တောင်မြို့ အရှေ့မြောက်ရပ်ကွက်တွင်ရှိသည့် အ.မ.က ၅ ကျောင်းတွင် အောက်တိုဘာလ ၁၅ ရက်နေ့က ဆရာ/မ နှင့်ကလေးသူငယ်များ၏ သင်ထောက်ကူပစ္စည်းတစ်ချို့ဖောက်ထွင်းခိုးခံခဲ့ရကြောင်း သတင်းရရှိသည်။
ဖောက်ထွင်းခိုးသည့် တရားခံများကို သက်ဆိုင်ရာတာဝန်ရှိသူများက လိုက်လံရှာဖွယ်နေပြီး အရေးယူဆောင်မည်ဖြစ်ကြောင်း သိရသည်။
ပြီးခဲ့သည့်အပတ် တနင်္ဂနွေရက်က ကျောင်းပိတ်ရက်ဖြစ်သည်ံ့အတွက် ကျောင်းတွင်ဥယျာဥ်မှူးမရှိ၍ တံခါးများကိုသော့ခတ်ထားခဲ့ပြီး ၁၆ ရက်နေ့ကျောင်းပြန်တက်ရာတွင် ကျောင်းခန်းအတွင်းရှိ ဗီရိုများမှ ဖောက်ထွင်းခိုးခံခဲ့ရသည်ဟု သိရကြောင်း အ.မ.က (၅ )ကျောင်းအုပ်ဆရာကြီး ဦးသိန်းထွန်းအောင်က AB News သို့အတည်ပြုပြောသည်။
“၁၅ရက်နေ့ကပါ၊ စနေ၊ တနင်္ဂနွေဆိုတော့ ကျောင်းပိတ်ရက်ဖြစ်ပါတယ်၊ ကျောင်းမှာလည်း ဥယျာဥ်မှူးမရှိပါ၊ ကျနော်တို့ကျောင်းကိုသေ့ာခတ်ပြီးပိတ်ထားခဲ့ပါတယ်၊ ၁၆ ရက်နေ့က ကျောင်းတက်ရက်နေ့ဖြစ်ပါတယ်၊ ကျောင်းပြန်တက်တော့ တံခါးတွေအားလုံးပွင့်နေပြီ၊ ဗီရို ၂ လုံးလည်းပွင့်နေတော့ အခိုးခံလိုက်ရတာ သိရပါတယ် “ဟု ဆိုသည်။
ကျောင်းဖောက်ထွင်းခံရပြီး ကျောင်းဆရာ/မ အသုံးအဆောင်ပစ္စည်းတစ်ချို့၊ ဓာတ်ဘူး၊ ရေနွေးအိုးကြိုသည့်မီးဖိုများ၊ ရေဖန်ခွက်များ၊ ကျောင်းသူ/သားများအသုံးပြုနေသည့် အားကစားပစ္စည်းများ၊ ဖိနပ်များ၊ ဘောလုံးများအပါအဝင် ရေစုပ်မော်တာ တစ်လုံးအခိုးခံခဲ့ရသည်။
ဗီရိုများသည် သစ်သားအနည်းငယ်ပါဝင်သည့် သွပ်ပြားအများစုဖြင့်ပြုလုပ်ထားသောဗရိုများဖြစ်၍ သူခိုးများက ကတ်ကြေးနှင့်ညှပ်ဖြတ် ခိုးယူသွားခဲ့ကြောင်း တွေ့ရသည်။
အများအကျိုးအတွက် သယ်ပို့နေသည့် ဆရာတစ်ယောက်အနေနှင့် ယခုလို ဆရာ/မနှင့် ကျောင်းသူ/သားသုံးပစ္စည်းများ အခိုးခံလိုက်ရသည့်အတွက် စိတ်မကောင်းဖြစ်ရသည့်အပြင် နောက်နောင်မဖြစ်လာစေဖို့ သက်ဆိုင်ရာ တာဝန်ရှိသူများက ဝိုင်းဝန်းပြီး တားမြစ်ပေးစေချင်ကြောင်း ကျောင်းအုပ်ဆရာကြီးက ပြောသည်။
အခိုးခံရမှုနှင့်ပတ်သက်၍ ကျောင်းအုပ်ဆရာကြီးက အရှေ့မြောက် ရပ်ကွက်အုပ်ချုပ်ရေးမှူးထံ သွားရောက်တိုင်တန်းခဲ့သည့်အတွက် ၎င်းမှလည်းအတတ်နိုင်ဆုံးကြိုးစားဆောင်ရွက်ပေးမည် ပြောကြောင်း သိရသည်။
ဖောက်ထွင်းခံရမှုဖြစ်စဥ်နှင့်ပတ်သက်၍ အရေးယူဆောင်ရွက်နေခြင်း ရှိ/မရှိကို AB News ကအတည်ပြုနိုင်ရန်အတွက် သက်ဆိုင်ရာ ရပ်ကွက်အုပ်ချုပ်ရေးမှူးထံ ဆက်သွယ်မေးမြန်းရာတွင် ဦးကျော်သန်းက ယခုလိုပြောသည်။
“ကျောင်းအုပ်ကြီးက ကျနော့်ဆီလာတိုင်ပါတယ်၊ ကျနော့်ရပ်ကွက်ထဲက ခိုးနေတဲ့သူတွေ၊ နာမည်ဆိုးရှိနေတဲ့သူတွေကို ကျနော်လိုက်ရှာနေပါတယ်၊ သူခိုးကတော့ ခိုးတယ်လို့မပြောပါဘူး၊ မသင်္ခါတဲ့သူတစ်ယောက်ခေါ်ပြီး စစ်ဆေးမှုတွေပြုလုပ်လို့ရှိပါတယ်၊ ကျနော်ကတော့ ရပ်ကွက်ထဲက သူခိုးတွေမုန်းတာကို ဂရုမစိုက်ပါဘူး၊ ဒီအမှုမှန်ကို ရအောင်ဖော်ထုတ်ပေးမယ် “ဟု ပြောသည်။
ပြီးခဲ့သည့်ရက်ပိုင်းများကလည်း သူခိုး ၆ ဦးကိုဖမ်းပြီး သက်ဆိုင်ရာ ရဲစခန်းများသို့ ၎င်းကိုယ်တိုင်ပို့ပေးခဲ့ကြောင်းဆိုသည်။
အဆိုပါ အ.မ.က ၅ ကျောင်းသည် ဇူလိုင်လ ၁၄ ရက်နေ့ ဖောက်ထွင်းခြင်းခံခဲ့ရသည့်အချိန်ကလည်း ကျောင်းသူ/သားများအသုံးပြုနေသာ သင်ထောက်ကူပစ္စည်းတစ်ချို့ နှင့် ရေစုပ်မော်တာတစ်လုံးရှိခဲ့ကာ ယခုတွင်လည်း ထပ်မံဖောက်ထွင်းခံရသည့် အကြိမ် ၂ကြိမ်ထိရှိနေသော်လည်း ကျူးလွန်သူများကို ဖမ်းဆီးနိုင်ခြင်းမရှိသေးကြောင်း သိရသည်။
ထို့အပြင်ပြီးခဲ့သည့် ၁ လကျော်ခန့်က ရသေ့တောင်မြို့ အ.ထ.က ၂ ကျောင်းတွင်လည်း ရေစုပ်မော်တာတစ်လုံး အခိုးခံခဲ့ရသည့်အတွက် ကျောင်းအုပ်ဆရာမကြီးက အုပ်ချုပ်ရေးမှူးထံ သွားရောက်တိုင်တန်းခဲ့မှုများရှိကြောင်းသိရသည်။
အလားတူ အောက်တိုဘာက ၃ရက်နေ့ကလည်း ရသေ့တောင်မြို့ သာယာကုန်းရပ်ကွက်ရှိ သံခြံများဖြင့် ခြံစည်းရိုးခတ်ထားသည့် တိုက်အိမ်တစ်ဆောင်တွင်လည်း ဖုန်း ၂ လုံး အခိုးခံခဲ့ရသည့်အပြင် တစ်ခြားနေအိမ်တစ်ခုဆောင်ကလည်း ဖုန်း ၁ လုံးအခိုးခံခဲ့ရကြောင်း ဒေသခံများပြောပြချက်အရ သိရသည်။
ရသေ့တောင်မြို့ပေါ်ရှိရပ်ကွက်များတွင် စက်တင်ဘာလ နှင့် အောက်တိုဘာလအတွင်း ဖောက်ထွင်းခိုးခံရမှုများ ခပ်စိပ်စိပ်ရှိလာနေခြင်းကို သက်ဆိုင်ရာတာဝန်ရှိသူများက အရေးယူဆောင်ရွက်မှုများအားနည်းနည်ကြောင်း ABN က စုံစမ်းသိရှိရသည်။