ABN-ရာဟု
မေ ၆ရက်
ဘင်္ဂလားပင်လယ်အော်အရှေ့အလယ်ပိုင်းတွင် မေလ ၁၀ ရက်နေ့ ဆိုင်ကလုန်းမုန်တိုင်း ဖြစ်လာနိုင်၍ ဧရာဝတီမြစ်ဝကျွန်းပေါ်ဒေသနဲ့ ရခိုင်ကမ်းရိုးတန်းဒေသများတွင် နေထိုင်သူများ အထူးသတိပြု ကြိုတင်ပြင်ဆင်ကြရန် NUG က သတိပေး တိုက်တွန်းထားသည်။
ဘင်္ဂလားပင်လယ်အော်အရှေ့တောင်ပိုင်းတွင် မေလ ၇ ရက်နေ့ ကစတင်ကာ လေဖိအားနည်းရပ်ဝန်းဖြစ်နိုင်ပြီး မေလ ၈ ရက်မှာ ပိုမ်ိုအားကောင်းလာနိုင်ကာ မုန်တိုင်းငယ်(Depression) အဖြစ်သို့ ရောက်ရှိနိုင်ပြီး ပိုမိုအားကောင်းသည့် ဆိုင်ကလုန်းမုန်တိုင်းအဖြစ်ရောက်ရှိလာနိုင်ကာ ခန့်မှန်းချက်များအရ မြစ်ဝကျွန်းပေါ်နဲ့ ရခိုင်ကမ်းရိုးတန်းအနီးသို့ မေ ၉ ရက်မှ ၁၃ ရက်နေ့ အထိ ရံဖန်ရံခါ မိုးသက်လေပြင်းကျရောက်ကာ လှိုင်းကြီးပြီး ရေပြင်/မြေပြင်လေ တစ်နာရီလျှင် မိုင် ၅၀ မှ ၆၀ လောက် အထိတိုက်ခတ်နိုင်ကြောင်း ခန့်မှန်းထားသည်။
မုန်တိုင်းဖြစ်ပေါ်လာလျှင် မုန်တိုင်း အရှိန်ကြောင့် လေပြင်းတိုက်ခတ်၊ မိုးကြီး၊ ရေကြီး မြေပြိုမှုများဖြစ်ပေါ်နိုင်၍ ကုန်းမြင့်ဒေသအနီးနှင့် မြန်မာ့ကမ်းရိုးတန်းတစ်လျှောက်၊ မြစ်ငယ်၊ ချောင်းငယ်များအနီး နေထိုင်ကြသူများ ကြိုတင်သတိပြုနေထိုင်ကြရန် အကြံပြုပြောဆ်ို ထားသည်။
ပြည်တွင်းလေကြောင်း ပျံသန်းရေးနဲ့ ကမ်းနီး၊ ကမ်းဝေး ငါးဖမ်းရေယာဉ်များနှင့် သင်္ဘောများလည်း ကြိုတင်သတိပြုရှောင်ရှားကြရန် တိုက်တွန်းထားသည်။
NUG ၏ လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေး ဝန်ကြီးဌာနကလည်း ဘင်္ဂလားပင်လယ်အော်အရှေ့တောင်ပိုင်းတွင်ဖြစ်ပေါ် လာနိုင်သည့် လေဖိအားနည်းရပ်ဝန်းနှင့်စပ်လျဉ်းပြီး မိုးလေဝသအေဂျင်စီ ၂ ခု၏ ခန့်မှန်းတွက်ချက်မှုများကို ထုတ်ပြန်ထားသည်။
မိုးလေဝသဆိုင်ရာအချက်အလက်များ အပေါ်မူတည်ပြီး ခန့်မှန်းထားသည့် လမ်းကြောင်း(၂)ခု အနက် လမ်းကြောင်းတစ်ခုသို့ ရွေးချယ်ရွေ့လျားလာနိုင်ကြောင်း ပုံများနဲ့တကွထုတ်ပြန်ထားသည်။
ခန့်မှန်းလမ်းကြောင်းတွင် နေထိုင်ကြသူများအနေနဲ့ မိုးလေဝသခန့်မှန်းချက်များကို ဂရုတစိုက်နားထောင်ရန်လိုအပ်ကာ ကြိုတင်ပြင်ဆင်မှုများပါ ပြုလုပ်ကြရန် NUG အစိုးရက အသိပေးထားသည်။
မုန်တိုင်းသည် မြန်မာနိုင်ငံကိုဦးတည်ဖို့ ၇၅ ရာခိုင်နှုန်း လောက်ရှိပြီး ဧရာဝတီတိုင်း ၊ ရခိုင် ပြည်နယ်၊ ရန်ကုန်တိုင်း၊ မွန်ပြည်နယ်အနီး မုတ္တမကွေ့တို့တွင် လေပြင်းအန္တရာယ်ရှိလာနိုင်ကြောင်း မိုးလေဝသ ကျွမ်းကျင်သူ ဝေဖြိုးဟန်( လေကြောင်းမိုးလေဝသ)ကလည်း၎င်း၏ fb တွင် သတိပေးထုတ်ပြန်ထားသည်။
မုန်တိုင်း လမ်းကြောင်း ၁ တွင် ယနေ့မှ စတင်ကာ နောက် ၈ရက်နေ့အတွင်း မြန်မာနိုင်ငံအလယ်ပိုင်းနဲ့ မြစ်ဝကျွန်းပေါ်ဒေသများမှာ လက်ရှိအပူချိန်နဲ့ 1-2C°လောက် အပူချိန်မြင့်တက်လာနိုင်ပြီး ရခိုင်ပြည်နယ် စစ်တွေနှင့် ကျောက်ဖြူအနီးမှ မေလ ၁၃ ရက်နေ့ မွန်းလွှဲနှငိ့ ညနေပိုင်းများတွင် ဝင်ရောက်နိုင်ကြောင်း ခန့်မှန်းထားသည်။
လမ်းကြောင်း ၂ တွင် ယနေ့မှ စတင်ကာ နောက် ၈ ရက် အတွင်း မြန်မာနိုင်ငံ အလယ်ပိုင်းနဲ့ မြစ်ဝကျွန်းပေါ်များတွင် လက်ရှိအပူချိန်ထက် 3-4C°အထိ အပူချိန်မြင့်တက်လာနိုင်ပြီးမုန်တိုင်းမှာ မေလ ၁၃ ရက်နေ့တွင် ဧရာဝတီတိုင်း လပွတ္တာနဲ့ ဘိုကလေးအနီးမှ ဖြတ်ကျော်ဝင်ရောက်နိုင်ကြောင်း ခန့်မှန်း တွက်ချက်ထားသည်။
