ABN-မေအိအိအောင်
စစ်ကောင်စီက မတရားအသင်းဆက်သွယ်မှု ဥပဒေပုဒ်မ ၁၇ (၁) နှင့် စစ်ပုန်ကန်မှု ရာဇသတ်ကြီး ဥပဒေပုဒ်မ ၁၃၁ ဖြင့် တရားစွဲဆိုခံထားရသော ရခိုင်ပြည် ကျောက်တော်နယ်မှ ဆန်စက်ပိုင်ရှင်၏ ရုံးချိန်းကို တရားလိုမရောက်သဖြင့် ရုံးချိန်းထပ်မံရွှေ့ဆိုင်းလိုက်ရကြောင်း ဇနီးဖြစ်သူ ပြောကြားချက်အရသိရသည်။
ကျောက်တော်မှ ဆန်စက်ပိုင်ရှင် ဦးလှမောင်သန်းအမှုကို စစ်ဆေးရန် ပြီးခဲ့သည့် ဖေဖော်၀ါရီ ၁ ရက်နေ့က ရုံးချိန်းတွင် တရားလိုဘက်မှ ထပ်၍ မရောက်လာခဲ့သဖြင့် စစ်ဆေးမှုမပြုလုပ်နိုင်ခဲ့ကြောင်း ဇနီးဖြစ်သူ ဒေါ်လှအေးဆန်းက ABN ကိုပြောသည်။
“ဖေဖော်၀ါရီ ၁ ရက်နေ့က ရုံးထုတ်ပါတယ်။ ရုံးထုတ်ချိန်ကိုသွားစောင့်ပါတယ်။ ဒါပေမဲ့ တရားလိုဘက်က ထပ်ပြီးတော့ မရောက်လာခဲ့ပါဘူး ။ ဒါကြောင့်စစ်ဆေးမှုတွေလည်း မပြုလုပ်ခဲ့ရပါဘူး” ဟု သူကပြောသသည်။
ယင်းအပြင် ကိုလှမောင်သန်းမှာ ယခင်ကတည်းက ကျန်းမာရေးမကောင်းသည့်အတွက် ဆေးခန်းပြ၍ရလျှင် ဆေးခန်းပြပေးချင်ကြောင်း ဇနီးသည်က ပြောသည်။
ဆန်စက်ပိုင်ရှင်အား ပုဒ်မ ၂ ခုဖြင့် ၇ ကြိမ်မြောက်ဖြစ်သော်လည်း တရားလိုဘက်က တစ်ကြိမ်မျှရောက်မလာခဲ့ကြောင်းသိရသည်။
ကျောက်တော် ကာဒီ(သဇင်) ရွာမှ ဆန်စက်ပိုင်ရှင် ကိုလှမောင်သန်းမှာ ပြီးခဲ့သည့် ၂၀၂၂ ခုနှစ် အောက်တိုဘာလ ၂ ရက်နေ့တွင် ကျောက်တော်မြို့နယ် ကန်စောက်အခြေစိုက် ခမရ ၅၃၉ တပ်ရင်းက ဖမ်းဆီးခံခဲ့ခြင်းဖြစ်သည်။
ယင်းနောက် ၂၀၂၂ ခုနှစ် ဒီဇင်ဘာလ ၁၆ ရက်နေ့တွင် မတရားအသင်းဆက်သွယ်မှု ဥပဒေပုဒ်မ ၁၇ (၁) ဖြင့် စစ်ကောင်စီက တရားစွဲဆိုပြီး ဒီဇင်ဘာလ ၁၉ ရက်နေ့တွင် စစ်ပုန်ကန်မှု ရာဇသတ်ကြီး ဥပဒေပုဒ်မ ၁၃၁ ဖြင့် ထပ်တိုးတရားစွဲဆိုခြင်းခံခဲ့ရသည်။
