AB News – မတ် ၁၂၊ ၂၀၂၆
ရက္ခိုင်ပြည်၊ ကျောက်တော်မြို့နယ်နှင့် ပုဏ္ဏားကျွန်းမြို့နယ်ရှိ စစ်ဘေးရှောင်စခန်းများတွင် သောက်သုံးရေရှားပါးမှုပြဿနာ ရင်ဆိုင်ကြုံတွေ့နေရကြောင်း စစ်ရှောင်များမှ AB News သို့ ပြောသည်။
နွေရာသီရောက်ရှိလာသဖြင့် လူဦးရေထူထပ်သည့် စစ်ရှောင်စခန်းများတွင် သောက်ရေ၊ သုံးရေ ရှားပါးလာခြင်းဖြစ်ကြောင်း စစ်တွေမြို့နယ်၊ ကျောက်တန်းချေကျေးရွာမှ စစ်ရှောင်လာသည့် ဒေါ်ခင်ခင်နု က ဆိုသည်။
”လက်ရှိကတော့ ရေကန်တွေမှာလည်း ရေတိမ်လာတယ်။ ကန်ထဲက ရေတွေဟာ ၁ ပေသာသာလောက်ပဲ ရှိတော့တယ်။ ရေလည်း နောက်တယ်။ ခပ်ထားတဲ့ရေတွေကို အနေထိုင်ပြီးမှ သုံးရတယ်။ ရေရှိတဲ့ ကန်တွေကလည်း ကျမတို့နေတဲ့ နေရာနဲ့ အလှမ်းဝေးတော့ ခက်ခက်ခဲခဲ ခပ်ယူသုံးစွဲနေရတယ်။ နောက်လာမဲ့ လတွေဆိုရင် ရေက တော်တော်အခက်အခဲ ဖြစ်သွားနိုင်တယ်” ဟု ပြောသည်။
စစ်ရှောင်စခန်းရှိ ရေကန်များတွင် ကျွဲ၊ နွား များ စည်းကမ်းမဲ့ ဆင်းသောက်မှုကြောင့် တစ်ရက်ထက်တစ်ရက် ရေနည်းလာသကဲ့သို့ ရေမသန့်ရှင်းမှုများ ဖြစ်ပေါ်နေကြောင်း စခန်းတာဝန်ခံ ကို ထွန်းနိုင်စိုး က ဆိုသည်။
စခန်းအနီးရှိ ကျေးရွာများမှ ကျွဲ၊ နွား များမှာ ကန်ထဲသို့ ရေဆင်းသောက်ချိန်တွင် ကျင်ကြီး၊ ကျင်ငယ်များ စွန့်ပစ်မှုများ ရှိနေကြောင်း ၎င်းက ထပ်လောင်းပြောသည်။
”ရွာထဲက ကျွဲ၊ နွားတွေ စည်းကမ်းမဲ့ ကန်ထဲသို့ ဆင်းသောက်တာတွေ ရှိပါတယ်။ ကန်ထဲ ဆင်းသောက်တဲ့ အချိန်မှာလည်း အပေါ့၊ အလေး ကို ကန်ထဲမှာပဲ စွန့်ကြတာတွေ ရှိပါတယ်။ ကျနော်တို့လည်း နေ့စဥ်မြင်နေရတယ်။ ဒါဘယ်မဲ့ ကျနော်တို့က စစ်ဘေးရှောင်တွေဆိုတော့ မပြောရဲဘူး။ တစ်ခုခု ဖြစ်မှာ ကြောက်လို့ ငြိမ်ခံနေရပါတယ်” ဟု ဆိုသည်။
ကျွဲ၊ နွားများ၏ အညစ်အကြေးစွန့်ပစ်မှုများကြောင့် ကန်အတွင်းရှိ ရေများမှာ မသန့်ရှင်းဘဲ ဝမ်းပျက်၊ ဝမ်းလျောဖြစ်ခြင်းနှင့် အရေပြားရောဂါ ဖြစ်ပွားမှုတို့လည်း ရင်ဆိုင်ကြုံတွေ့နေကြောင်း ဆိုသည်။
”ဒီကန်က ရေနဲ့ပဲ ကျမတို့ ချက်ပြုတ်စားသောက်နေရတာ။ ကန်ထဲမှာ ဒီလိုမျိုး အညစ်အကြေးတွေ စွန့်ပစ်တော့ စခန်းထဲမှာ ဝမ်းပျက်ဝမ်းလျောဖြစ်တာတွေ ရှိတယ်။ လူကြီး၊ ကလေး မကျန် အရေပြား ရောဂါတွေ ဖြစ်တာရှိတယ်” ဟု ဒေါ်ခင်ခင်နုက ထပ်လောင်းပြောသည်။
စစ်ရှောင်စခန်းများရှိ သောက်သုံးရေကန်များတွင် ခြံစည်းရိုးများ စနစ်တကျ ပြုလုပ်ခြင်း မရှိသဖြင့် ကျွဲ၊ နွားများ ဆင်းသောက်ရခြင်း ဖြစ်ကြောင်း ကျေးရွာအုပ်အုပ်မှူး ဦးတူးတူးမောင် က ဆိုသည်။
”ဒီပြဿနာကတော့ ရေကန်တွေမှာ ခြံစည်းရိုး မရှိတာကြောင့် ဖြစ်တာပါ။ ခြံစည်းရိုးတွေ စနစ်တကျမရှိတော့ ကျွဲ၊ နွား တွေက ကန်ထဲကိုဆင်းသောက်ကြတယ်။ ခြံစည်းရိုးအတွက် စစ်ရှောင်တွေဆီက ပိုက်ဆံကောက်တော့ သူတို့လည်း မတတ်နိုင်ကြဘူး။ ကျနော်တို့ ရွာအနေနဲ့လည်း ကူညီဖို့ ငွေကြေးအခက်အခဲတွေ ရှိပါတယ်။ သက်ဆိုင်ရာအစိုးရတွေကို ကူညီဖြေရှင်းပေးဖို့ တောင်းဆိုချင်ပါတယ်” ဟု ပြောသည်။
ထိုသို့ စစ်ရှောင်စခန်းများရှိ ရေကန်များတွင် အနီးအနားကျေးရွာများမှ ကျွဲ၊ နွားများ စည်းကမ်းမဲ့ ရေဆင်းသောက်ခြင်းကို ထိန်းကွပ်တားမြစ်ပေးရန် စစ်ဘေးရှောင်များကလည်း အာရက္ခပြည်သူ့တော်လှန်ရေး အစိုးရကို တောင်းဆိုထားသည်။
AB News မှ စစ်ဘေးရှောင်စခန်းများနှင့် ကျေးရွာများ၏ တည်နေရာများကို လုံခြုံရေးအရ ချန်လှပ်ရေးသားထားသည်။
တစ်ဖက်တွင်လည်း ဒေသခံ လူမှုကယ်ဆယ်ရေး အဖွဲ့အစည်းများ၊ NGOs များ နှင့် အာရက္ခပြည်သူ့တော်လှန်ရေးအစိုးရတို့ ပူးပေါင်းကာ စစ်ရှောင်စခန်းများတွင် ရေကန်များ တူးဖော်ထားသော်လည်း ရေမလောက်ငှမှု ရှိနေကြောင်း သိရသည်။
ရက္ခိုင်မှာ မိုးရာသီတွင် ရေကြီး၊ ရေလျှံ မှုများ ဖြစ်ပေါ်တတ်ပြီး နွေရာသီတွင် ရေရှားပါးမှု ပြဿနာများ နှစ်စဥ် ရင်ဆိုင်ကြုံတွေ့နေရသည်။
ပုံစာ – ကျောက်တော်-ပုဏ္ဏားကျွန်းအစပ် စစ်ရှောင်စခန်းတစ်နေရာ။
#ရက္ခိုင် #ကျောက်တော်-ပုဏ္ဏားကျွန်း #စစ်ဘေးရှောင်စခန်းများ #ရေရှားပါးမှု #မွေးမြူရေးတိရစ္ဆာန် #စည်းကမ်းမဲ့ဆင်းသောက်မှု #အရေပြားရောဂါ