AB News – ဧပြီ ၂၊ ၂၀၂၅
မြန်မာနိုင်ငံတစ်ဝန်း ထောင်နှင့်ချီသောပြည်သူများ သေဆုံးခဲ့ရသည့် အကြီးအကျယ် မြေငလျင်ဘေးဒုက္ခနှင့် ကြုံတွေ့နေရသော်လည်း စီစဉ်ထားသော သင်္ကြန်ပွဲတော်ကို ဖျက်သိမ်းမည်မဟုတ်ဘဲ ဆက်လက် ကျင်းပသွားမည်ဖြစ်ကြောင်း ဧပြီလ ၁ ရက်နေ့တွင် စစ်ကောင်စီက ကြေညာခဲ့သည်။
နိုင်ငံပိုင်မီဒီယာများမှတဆင့် ထုတ်ပြန်သော ကြေညာချက်တွင် တစ်နိုင်ငံလုံး ဝမ်းနည်းကြေကွဲနေရသော ကာလဖြစ်သည့်အတွက် ယခုနှစ်သင်္ကြန်ပွဲတော်ကို အပျော်အပါး ကခုန်မှုများ မပါဘဲ ရိုးရာယဉ်ကျေးမှုနှင့်အညီသာ ကျင်းပသွားမည်ဟု စစ်ကောင်စီက ပြာသည်။
သို့သော်လည်း နိုင်ငံတဝန်း ပြည်သူအများစု ဘေးဒုက္ခရောက်နေသည့်အချိန်တွင် သင်္ကြန်ပွဲတော်ကို အလျှော့မပေးဘဲ ဆက်လက်ကျင်းပရန် စီစဉ်နေခြင်းအပေါ် ပြင်းထန်သောဝေဖန်မှုများ ထွက်ပေါ်လာသည်။ ရန်ကုန်မြို့မှ အမည်မဖော်လိုသူ အမျိုးသမီးတစ်ဦးက AB News သို့ပြောသည်။
“ဒီလောက်နိုင်ငံ တစ်ဝန်း ဝမ်းနည်းကြေကွဲနေတဲ့အချိန် စစ်အစိုးရက သင်္ကြန်ပွဲကျင်းပဖို့ ပြောထွက်နိုင်တာ ပြောစရာစကား မရှိလောက်အောင်ထိ ဖြစ်သွားတယ်။ ငလျင်ဒဏ်ကြောင့် အဆောက်အအုံတွေနဲ့ ပြည်သူ့အသက်တွေ ပျက်စီးဆုံးရှုံးသွားပြီး၊ ပြန်လည်ထူထောင်ဖို့ ခက်ခဲနေချိန် စစ်ကောင်စီက သင်္ကြန်ကျင်းပဖို့ ပြောတော့ တကယ်အံ့ဩဖို့ကောင်းပါတယ်” ဟုဆိုသည်။
ရရှိသော သတင်းများအရ စစ်ကောင်စီသည် ၎င်းတို့ရုံးစိုက်ရာ နယ်မြေဖြစ်သော နေပြည်တော်ရှိ ပျဉ်းမနားတောင်ညိုလမ်းမကြီးပေါ်တွင် နေပြည်တော်ကောင်စီ မြို့တော်ဝန်မဏ္ဍပ် အပါအဝင် မဏ္ဍပ် ၄ ခုခန့် ဆောက်လုပ်နေပြီး ယခင်နှစ်ကထက် မဏ္ဍပ်အရေအတွက် နည်းပါးကြောင်း သိရသည်။
နေပြည်တော်သည် မတ်လ ၂၈ ရက်နေ့က လှုပ်ခတ်ခဲ့သည့် အင်အားပြင်းမြေငလျင်ကို အပြင်းအထန် ခံစားခဲ့ရသည့် ဒေသများအနက် တစ်ခုဖြစ်သည်။
တစ်ဖက်တွင်လည်း စစ်ကောင်စီကို ဆန့်ကျင်တိုက်ခိုက်နေကြသော တော်လှန်ရေးတပ်ဖွဲ့ဝင်များဖြစ်သည့် ကိုးကန့်တပ် MNDAA နှင့် တအာင်းတပ် TNLA အပါအဝင် တိုင်းရင်းသားလက်နက်ကိုင်အဖွဲ့အစည်းများအနေဖြင့် ငလျင်ဒဏ်သင့် ပြည်သူများကို စာနာသောအားဖြင့် ၎င်းတို့ထိန်းချုပ်နယ်မြေများတွင် သင်္ကြန်ပွဲတော် အခမ်းအနားများ ပြုလုပ်တော့မည်မဟုတ်ကြောင်း ကြေညာထားသည်။