AB News-ဟိန်းထွန်း

စက်တင်ဘာ – ၂၆ ရက်

ရခိုင်ပြည်၊ ရသေ့တောင်မြို့နယ်တွင် စာပြရန်သွားခဲ့သည့်လမ်း၌ ဒေါ်နှင်းယုနွယ် သတ်ဖြတ်ခံရမှုတွင် ထွက်ပြေးလွတ်မြောက်နေသည့် အဓိကတရားခံကို ယနေ့တွင်ပြန်လည်ဖမ်းဆီးရမိခဲ့ကြောင်း မိသားစုဝင်များကအတည်ပြုပြောသည်။

ထွက်ပြေးလွတ်မြောက်နေသည့် သံသယတရားခံမှာ တစ်ရွာတည်းဖြစ်သော အဖ ဦးကြိုင်လှအောင်၏သား အသက် ၄၁ နှစ်အရွယ် ဦးမောင်မောင်အေး ဖြစ်သည်။

၎င်းကို ယနေ့မွန်းလွဲပိုင်း ၂ နာရီခွဲခန့်အချိန်တွင် ၎င်း၏အစ်မနေအိမ်မှ ဖမ်းဆီးနိုင်ခဲ့ပြီး ဌာနအဆင့်ဆင့်သို့ ပို့ဆောင်နေကြောင်း မိသားစုဝင်တစ်ဦးက ABN သို့အတည်ပြုပြောသည်။

“၂ နာရီခွဲလောက်မှာပါ ၊ သူ့အစ်မရဲ့နေအိမ်ကနေပြီး ရဲဘော်တွေ သွားရောက်ဖမ်းဆီးနိုင်ခဲ့တာပါ၊ ပြီးတော့ ဌာနတွေကို အဆင့်ဆင့်ပို့ဆောင်လိုက်တယ်” ဟု ဆိုသည်။

သံသယတရားခံကို ပန်းဖော်ပြင်ရုံးသို့ အရင်ပို့ဆောင်ခဲ့ပြီး ၎င်းမှတဆင့် စေတီပြင်ရုံးသို့ ယူသွား၍ စစ်ဒေသများသို့ပို့ဆောင်လိုက်ကြောင်းသိရသည်။

ရွာသားများနှင့် တာဝန်ရှိသူများက ၎င်း၏အစ်မဖြစ်သူ နုနုအေးအိမ်မှ ဝိုင်းဝန်းဖမ်းဆီးနိုင်ခဲ့သည့်အပြင် တစ်ရွာလုံးဆူညံနေကြောင်းသိရသည်။

စစ်ဆေးနေစဥ်ကာလအတွင်း မောင်မောင်အေးသည် စက်တင်ဘာလ ၁၉ ရက်နေ့ ညဥ့် ၉ နာ ရီခွဲတွင် ထွက်ပြေးလွတ်မြောက်သွားကြောင်း ULA/AA ၏ပြန်ကြားရေးတာဝန်ခံ ဦးခိုင်သုခက ABN သို့အတည်ပြုပြောထားသည်။

အလယ်တန်းပြဆရာမ ဒေါ်နှင်းယုနွယ်သည် စက်တင်ဘာလ ၁၆ ရက်နေ့ မနက်ပိုင်း ၉ နာရီခွဲတွင် သူမ၏နေအိမ်ကနေပြီး တာဝန်ကျရာဖြစ်သည့် ပန်းဖော်ပြင်ကျောင်းသို့ သွားရာလမ်းတွင် အမည်မသိလူတစ်စုမှ အတင်းအဓမ္မ မဒိန်းကျင့် လည်လှီးသတ်ဖြတ်မှုကိုခံခဲ့ရသည်။

လက်ရှိတွင်လည်း အဓိက သံသယရှိသူ ၂ ယောက်၊ ဆက်စပ်သံသယရှိသူ ၁ ယောက်၊ ဆရာမနှင်းယုနွယ် အသတ်ခံထားရ၍ သေဆုံးနေသော အလောင်းကိုမျက်မြင်စတင်တွေရှိသူ သက်သေ ၆ ယောက်ကို မေးမြန်းစစ်ဆေးနေကြောင်းသိရသည်။

ရက္ခိုင့်တပ်တော်မှ စုံစမ်းစစ်ဆေးနေဆဲ ကာလအတွင်း မုဒိန်းကျင့်ခံရမှု ရှိ/မရှိဆိုသည်ကို လက်ရှိအချိန်ထိ အတည်ပြုနိုင်ဖို့ အတိအကျပြောလို့မရသေးကြောင်း ဦးခိုင်သုခကဆိုသည်။

ဓာတ်ပုံစာ-ဦးမောင်မောင်အေး(အဓိကတရားခံ)၊ ဆရယမဒေါ်နှင်းယုနွယ်