ရခိုင်ပြည်၊ မင်းပြားမြို့တွင် စစ်ကောင်စီတပ်မှ ယမန်နေ့ နိုဝင်ဘာလ ၁၁ ရက်နေ့ ညည့် ၁၁ နာရီတွင် သံဃာတော်တစ်ပါးနှင့် လူနှစ်ဦးအား ဖမ်းဆီးသွားကြောင်း သိရသည်။
ဖမ်းဆီးခံရသူများမှာ ဦးဝရမဉ္ဇူ သက်တော် ၅၀ အောင်မြေကုန်းရပ်ကွက်၊ အလယ်ပိုင်းရပ်ကွက်နေ ဦး င/မဲသန်၏ သား ဦးကျော်နုမောင် ၄၉ နှစ် (ဝင်တိုး ရွှေဆိုင်ပိုင်ရှင်) နှင့် အလယ်ပိုင်းရပ်ကွက်နေ ဦးဦးထွန်း၏သား ဦးမောင်ထွန်းသိန်း ၅၃ နှစ်တို့ကို ၎င်းးတို့၏ နေအိမ်၊ကျောင်း အသီးသီးက ခမရ (၃၇၉)တပ်ရင်းမှ ဖမ်းဆီးသွားကြောင်း သိရသည်။
ထို ၃ ဦးအား ULA/ AA နှင့် ဆက်စပ်သည်ဟုဆိုကာ စစ်ကောင်စီတပ်မှ လာရောက်ဖမ်းဆီးသွားခြင်းဖြစ်ကြောင်း ၎င်းတို့နဲ့ နီးစပ်သူတစ်ဉီးထံမှ သိရသည်။
“ကျွန်မတို့က အိပ်ရာဝင်တော့မယ် လုပ်နေတာ၊ ဘေးနားက ဆူညံသံတွေကြားတော့ ထွက်ကြည့်တုန်း သူတို့ကို ဖမ်းသွားတာတွေ့တယ်၊ မေးကြည့်လိုက်တော့ ULA/ AAနှင့် ဆက်စပ်တယ်ဆိုပြီး သံသယရှိလို့ ဖမ်းတာလို့ပြောတယ်” ဟု နီးစပ်သူက ဆိုသည်။
ထိုနေ့တွင်ပင် စစ်ကောင်စီတပ်မှ ကိုကျော်ဆန်းနှင့် ဦးသိန်းမောင်တို့၏ နေအိမ်များကိုလည်း ဝင်ရောက်ရှာဖွေ မှုများရှိခဲ့ကြောင်း သိရသည်။
