AB News – ဇွန် ၁ ၊ ၂၀၂၅
ချန်ဒြာ
အိန္ဒိယနိုင်ငံ ၊ မီဇိုရမ်ပြည်နယ် ၊ လောင်တလိုင်တွင် မြေပြိုကျမှုဖြစ်ပွားခဲ့ပြီး မြေပြိုကျမှုထဲတွင် ရက္ခိုင်ကုန်သည် ၆ ဦးပါဝင်သွားခဲ့ကြောင်း သိရှိရသည်။
ယမန်နေ့၊ မေလ ၃၁ ရက်နေ့ နံနက် ၁ နာရီခွဲအချိန်ခန့်တွင် လောင်တလိုင်၌ မြေပြိုကျမှုဖြစ်ပွားခဲ့ပြီး ခရီးသွားများတည်းခိုနေသည့် Pari Hotel နှင့် နေအိမ် ၆ ဆောင်ခန့် မြေပြိုကျရာ၌ပါဝင်သွားခဲ့ရာ Hotel တွင် တည်းခိုနေသည့် ရက္ခိုင်ကုန်သည် ၆ ဦး မြေပြိုကျမှုထဲ ပိတ်မနေကြောင်း လောင်တလိုင်ရောက် ရက္ခိုင်ကုန်သည် ၁ ဦးက AB News သို့ပြောသည်။
” လောင်တလိုင်က တောင်ပေါ်ဒေသဖြစ်တေ့ာ နှစ်တိုင်း ဒီလိုမိုးရာသီဆို မြေပြိုကျမှု ဖြစ်လေ့ရှိတယ်။ မြေပြိုကျမှုကြောင့် ပိတ်မိနေတဲ့သူတချို့ရှိတယ်။ လူတော်တော်များများလည်းထိခိုက်ဒဏ်ရာရသွားကြတယ်။ အခုတေ့ာ ကယ်ဆယ်ရေးလုပ်ငန်းတွေ လုပ်နေပြီ” ဟု ဆိုသည်။
မြေပြိုကျမှုကြောင့် ပိတ်မိနေသူများကို ဒေသတွင်း လူမှုကယ်ဆယ်ရေးအဖွဲ့စည်းများနှင့် ကုန်သည်များက ပူးပေါင်းလုပ်ဆောင်နေကြပြီး လက်ရှိတွင် ရက္ခိုင် ကုန်သည် ၁ ဦးအား ကယ်ဆယ်၍ ရရှိထားပြီဖြစ်ကြောင်း သိရှိရသည်။
၂၀၂၃ ခုနှစ် နိုဝင်ဘာလမှစတင်၍ အကြမ်းဖက် စစ်ကောင်စီက ရက္ခိုင်သို့ ကုန်စည်ပို့ဆောင်ရေးလမ်းကြောင်းများကို ပိတ်ဆို့ဖြတ်တောက်ခဲ့သည်။
ထိုအချိန်မှစ၍ ရက္ခိုင်၌ ကုန်စည်စီးဆင်းမှုများနှင့်ပတ်သတ်၍ မီဇိုရမ်ပြည်နယ် ၊ လောင်တလိုင်ကို အားကိုးနေကြရသည်။