AB News – ဖေဖော်ဝါရီ ၂၄၊ ၂၀၂၄
ရက္ခိုင်ပြည်၊ မြောက်ဦးမြို့နယ်တွင် စစ်ကောင်စီက ဖမ်းဆီးထားသော သတင်းထောက် ကိုမြတ်သူထွန်း (ခ) ဖိုးသီဟကို သတ်ဖြတ်၊ အလောင်းဖျောက်ခြင်းလုပ်ရပ်အား လွတ်လပ်သော မြန်မာသတင်းစာဆရာများ အစည်းအရုံး (IMJA) က ယနေ့ ဖေဖော်ဝါရီလ ၂၄ရက်တွင် ကန့်ကွက်ရှုပ်ချခဲ့ကြောင်း ထုတ်ပြန်လိုက်သည်။
၂၀၂၄ ခုနှစ်၊ ဇန်နဝါရီလ ၃၁ ရက်နေ့တွင် သတင်းထောက် ကိုမြတ်သူထွန်း (ခ) ဖိုးသီဟ နှင့်အတူ ဖမ်းဆီးခံထားရသည့် အခြားအမျိုးသား ၆ဦးကို အာဏာသိမ်းစစ်ကောင်စီက ပစ်ခတ်သတ်ဖြတ်ပြီး အလောင်းဖျောက်ခဲ့သည်။
စစ်ကောင်စီသည် ၂၀၂၁ ခုနှစ်၊ ဖေဖော်ဝါရီ ၁ရက် စစ်အာဏာသိမ်းပြီးချိန်မှစ၍ ယနေ့အချိန်အထိ သတင်းသမား ၅ ဦးကို သတ်ဖြတ်ခဲ့ပြီး သတင်းသမား ၁၇၆ယောက်ကို ဖမ်းဆီးခဲ့သည်ဟု IMJA က ထုတ်ပြန်ခဲ့သည်။
စစ်ကောင်စီက သတင်းသမားများကို သတ်ဖြတ်မှုများ၊ ပစ်မှတ်ထားဖမ်းဆီးမှုများ ချက်ခြင်းရပ်တန့်ပြီး ဖမ်းဆီးထားသော သတင်းသမားများအားလုံးကို ချွင်းချက်မရှိ အမြန်ဆုံး ပြန်လွှတ်ပေးရန် IMJA က တိုက်တွန်းတောင်းဆိုထားသည်။
ပြီးခဲ့သည့် ဖေဖော်ဝါရီလ ၁၆ ရက်နေ့တွင် မြောက်ဦးမြို့မှ ကိုမြတ်သူထွန်း (ခ) ဖိုးသီဟ အား အာဏာသိမ်း စစ်ကောင်စီက သတ်ဖြတ်ခဲ့သည့်အတွက် ကျူးလွန်သူများကို စုံစမ်းဖော်ထုတ်ပေးရန်နှင့် တရားမျှတမှု အပြည့်အဝရရှိရန် အမေရိကန်နိုင်ငံ နယူယောက်အခြေစိုက် သတင်းထောက်များ ကာကွယ်စောင့်ရှောက်ရေးကော်မတီ (CPJ) က တောင်းဆိုခဲ့သည်။
“သတင်းထောက် မြတ်သူထွန်း အသတ်ခံရမှုကို ပြင်းပြင်းထန်ထန်ရှုတ်ချပြီး တာဝန်ရှိသူတွေကို ဖော်ထုတ်အရေးယူပေးဖို့ မြန်မာအာဏာပိုင်တွေကို တောင်းဆိုပါတယ်” ဟု CPJ ၏ အကြီးတန်း အရှေ့တောင်အာရှ ကိုယ်စားလှယ် Shawn Crispin ကပြောဆိုခဲ့သည်။
CPJ ၏ ၂၀၂၃ စစ်တမ်းအရ မြန်မာနိုင်ငံသည် ကမ္ဘာပေါ်တွင် သတင်းထောက်များကို ဒုတိယအဆိုးဝါးဆုံး အကျဉ်းချနေသော နိုင်ငံလည်းဖြစ်သည်။
မြန်မာနိုင်ငံသည် ဂျာနယ်လစ်များကို သတ်ဖြတ်လေ့ရှိပြီး လူသတ်မှုနှင့် ကင်းကွာလေ့ရှိသည့် နှစ်စဉ် ကမ္ဘာလုံးဆိုင်ရာ အဆင့်သတ်မှတ်ချက်တွင် မြန်မာနိုင်ငံသည် အဆင့် ၉ နေရာတွင် ရှိနေသည်ဟု CPJ ၏ နောက်ဆုံးထုတ် Global Impunity Index ၌ဖော်ပြထားသည်ကို တွေ့ရှိရသည်။
Website
www.arakanbaynews.com
Facebook
https://www.facebook.com/arakanbaynewsinfo?mibextid=ZbWKwL