ABN -ဟိန်းထွန်း

စက်တင်ဘာ ၁၅ ရက်

ကျောက်တော်နှင့် မင်းပြားဖက်တို့မှ လာသည့် စစ်ကောင်စီ စစ်ကား ၁၃ စီးသည် မြောက်ဦးမြို့သို့ရောက်ရှိနေသည့်အတွက် ဒေသခံများ တိုက်ပွဲဖြစ်လာမည်ကို စိုးရိမ်နေကြကြောင်း သိရသည်။

စကစတပ်ဖွဲ့ဝင်များသည် ယူနီဖောင်းများကိုဝတ်ဆင်ထားပြီး လက်နက်ခဲယမအပြည့်ဖြင့်သွားနေသည့်အတွက်ကြောင့် စစ်ပွဲများဖြစ်လာနိုင်ခြေရှိသည်ဟု ပြည်သူများဝေဖန်နေကြသည်ကိုတွေ့ရသည်။

မောင်းနှင်လာသည့် စကစ စစ်ကားတစ်စီးတွင် စစ်သားအင်အား ၂၀ ခန့်ပါရှိပြီး ၉ စင်းဖြစ်သည့်အတွက် လူဦးရေလည်းများမည်ဖြစ်ကြောင်း မြောက်ဦးမြို့နယ် ဝေသာလီရွာမှ ဒေသခံတစ်ဦးက ABN သို့ပြောသည်။

“ကားတစ်စီးမှာ လူ ၂၀ လောက်ပါတယ်၊ ကားက ၉ စီးဆိုတော့ များတာပေါ့ ၊ ယူနီဖောင်းတွေလည်းအပြည့်အစုံဝတ်ထားပါတယ်၊ တိုက်ပွဲဖြစ်လာမှာစိုးရိမ်တယ်” ဟု ဆိုသည်။

၎င်းစစ်ကားများလာရာလမ်းတစ်လျှောက် ရှိသည့် ပေါက်တောပြင်၊ အုတ်ဖိုကန်ကျေးရွာများတွင်လည်း စကစ တပ်ဖွဲ့ဝင်များသည် လက််နက်ခဲယမ်းအပြည့်ဖြင့် ကင်းစောင့်နေကြောင်း ဒေသခံများထံက သိရသည်။

ထို့အပြင် နောက်ထပ် စစ်ကား ၄ စီးသည်လည်း မင်းပြားဖက်မှ မြောက်ဦးဖက်သို့ တက်လာခဲ့သည့်အတွက် ပြည်သူတစ်ချို့ ကြောက်နေကြကြောင်း ၎င်း မှ ဆက်၍ပြောသည်။

“ထပ်ပြီးတော့လည်း စစ်ကားတွေ ​မြောင်းဘွယ်နားရောက်နေပါပြီ၊ လူတွေလည်း အပြင်မသွားရဲဘူးဖြစ်နေတယ်” ဟု ဆိုသည်။

စစ်ကောင်စီတပ်ဖွဲ့ဝင်များသွားလာနေသည့်အတွက်ကြောင့် နှစ်ဖက်တိုက်ပွဲအပြန်အလှန်ဖြစ်လာနိုင်၍ ဒေသခံပြည်သူများ စိုးရိမ်နေကြောင်း သိရသည်။

ရခိုင်ပြည် မြောက်ပိုင်းတွင်လည်း စက်တင်ဘာလ ၁၁ ရက်နေ့ကစပြီး အငူမော် မောင်တော၊ ဘူးသီးတောင်သို့ ကုန်စည်များတင်ပို့နေသည့် ကားသမားများကို စကစ နယ်ခြားစောင့်ဂိတ် ၃ ခုမှရေသန့်ဘူး နှင့် မုန်ဖာ မှလွဲပြီး တစ်ခြားအရာများတင်ပို့၍ မရကြောင်းပြောဆိုကာ ကုန်စည်များဖြတ်တောက်မှုရှိလာနေကြောင်း တွေ့ရသည်။

ယနေ့ နေ့လည် ၁၂ ခန့်က စစ်တွေတွင် ALP မှ တပ်ရင်းမှူးအဆင့်ရှိသူ ခိုင်ပြည်ဟိန်းမှာ စစ်ကောင်စီတပ်၏ သေနပ်ဖြင့် လုပ်ကြံ သတ်ဖြတ်ခံခဲ့ရကြောင်း သိရသည်။

ဓာတ်ပုံ-ပုံဟောင်း