မြောက်ဦးမြို့မှ အရပ်သား တစ်ဦးကို အောက်တိုဘာ ၂၂ ရက် ည ၁ နာရီခန့်တွင် အကြမ်းဖက်စစ်ကောင်စီတပ်က လာရောက် ဖမ်းဆီးသွားကြောင်း မိသားစုနဲ့ နီးစပ်သူများကပြောသည်။
ဖမ်းဆီးခံရသူမှာ အဖ ဦးသိန်းထွန်းအောင်၏သား ဦးကျော်သိန်းလှိုင် အသက် ၄၆ နှစ်ဖြစ်သည်။
၎င်းသည် မြောက်ဦးမြို့ ထမ္မရာဇ်ရပ်ကွက်ရှိ ၎င်းင်း၏ နေအိမ်တွင် ညဖက် အိပ်နေစဥ် အကြမ်းဖက်စစ်ကောင်စီတပ်က လာရောက် ဖမ်းဆီးသွားခြင်းဖြစ်ကြောင်း ပြောသည်။
“ညဖက် ၁ နာရီလောက်က သူ့(ဦးကျော်သိန်းလှိုင်) အိမ်မှာ အိပ်နေတုန်း စစ်တပ်က လာဖမ်းသွားတာ ခုထိတော့ ဘာအဆက်အသွယ်မှမရသေးဘူးလို့ သိရတယ်” မိသားစုနဲ့ နီးစပ်သူ တစ်ဦးက ABN ကိုပြောသည်။
သတင်းအပြည့်အစုံအား စုံစမ်းသိရှိနိုင်ရန် ဦးကျော်သိန်းလှိုင်၏ ဇနီးဖြစ်သူအား ဖုန်းခေါ်ဆိုရာ ဖုန်းလက်ခံ ဖြေကြားရန်ပင် အခက်တွေ့နေသည်ကို သိရှိရသည်။
“အခု ဘာမှ မပြောနိုင်သေးဘူး နောက်မှပြောပါ့မယ် “ဟုဆိုသည်။
ဦးကျော်သိန်းလှိုင်မှာ မြောက်ဦးမြို့နယ် တိမ်ညိုစံပြရွာတွင် “သာလီစွ” အမည်ရှိဆီဆိုင်ဖွင့်လှစ်ရောင်းချနေသူဖြစ်သည်။
အောက်တိုဘာ ၂၀ ရက်နေ့ကလည်း မြောက်ဦးမြို့ ပြင်ဈေးရပ်ကွက်မှ ကိုထွန်းထွန်းဝင်း အသက် ၃၂ နှစ်ကို စစ်ကောင်စီမှ ဖမ်းဆီးထားသည်။
