AB News – ဒီဇင်ဘာ ၅၊ ၂၀၂၃
ရက္ခိုင်ပြည်၊ မောင်တောမြို့နယ်ရှိ စစ်ကောင်စီအဖွဲ့ နခခ ၅ တပ်ရင်းမှ ပစ်ခတ်သည့် လက်နက်ကြီးကျဥ် ထိမှန်၍ ရွှေရင်အေးရွာမှ ကိုယ်ဝန်ဆောင်အမျိုးသမီး ၁ဦးအပါအဝင် ၄ဦး
ဒဏ်ရာရရှိခဲ့ကြောင်း AB News မှ စုံစမ်းသိရှိရသည်။
ဒဏ်ရာရရှိသူများမှာ ကိုယ်ဝန် ၉လရှိသော အမျိုးသမီး ဒေါ်လှစိန်ဝင်း ၂၂နှစ် ၊ ဒေါ်လှစိန်ဝင်း၏ ယောကျ်ားဖြစ်သူ ဦးမောင်လှအေး ၂၅နှစ် ၊ ဒေါ်ခင်ရီး ၆၂နှစ်နှင့် သူမ၏ မြေးတို့ဖြစ်သည်။
ယမန်နေ့ ဒီဇင်ဘာလ ၄ရက်၊ ညနေ ၆ခန့်အချိန်တွင် တိုက်ပွဲဖြစ်ပွားခြင်း မရှိဘဲ စစ်ကောင်စီအဖွဲ့ နခခ ၅တပ်ရင်းမှ ပစ်ခတ်သော လက်နက်ကြီးကျဥ် ၂လုံးသည် ရွှေရင်အေးရွာတွင် ကျရောက်ပေါက်ကွဲပြီး ၄ဦး ဒဏ်ရာရရှိခဲ့သည်ဟု ရွှေရင်အေးရွာသား ၁ဦးက ဆိုသည်။
” နခခ ၅ တပ်ရင်းမှ ပစ်ခတ်တဲ့ လက်နက်ကြီးကျဥ် ၂လုံးဟာ ရွာမှာ ကျရောက်ပေါက်ကွဲဲပြီး ကိုယ်ဝန်ဆောင် အမျိုးသမီး၁ဦးနဲ့ အခြား ၃ဦး ဒဏ်ရာရရှိခဲ့တယ်”ဟု ဆိုသည်။
ယခုအချိန်တွင် ရွှေရင်အေးရွာမှ ဒဏ်ရာရရှိသူ ၄ဦးမှာ ဆေးကုသမှု ခံယူနေရကြောင်း သိရှိရသည်။