ABN – နွယ်စိုး၊ ကိုဟိန်းထွန်း
ရခိုင်ပြည်၊ မောင်တောမြို့အမှတ် ၄ ရပ်ကွက်တွင်မေလ ၄ရက်နေ့ ကည ၉ နာရီအချိန်၌ ဝက်သတ်ကုန်းရှိ စကစ ရဲကင်းစခန်း ၁ခုက ရဲသားများသည် ရပ်ကွက်သား ၁ ဦးကို အုပ်စုဖွဲ့ရိုက်နှက်ခဲ့ပြီး၊ ရိုက်နှက်ခံရသူမှာ မျက်နှာတွင်ဖူးရောင်ဒဏ်ရာရသွားခဲ့ကြောင်းသိရသည်။
ရိုက်ပုတ်ခံရသူမှာ ဦးဘမြိုင် အသက် ၄၆နှစ်ဖြစ်ပြီး အမှတ် ၄ ရပ်ကွက်၊ မြို့သစ်စုခွဲ ဝက်သတ်ကုန်းတွင် နေထိုင်ကြောင်းသိရသည်။
၎င်းမှာအရက်အနည်းငယ်သောက်ပြီး စကစ၏ဝက်သတ်ကုန်း ရဲစခန်းအနီးသို့သွားခဲ့ရာ ရဲသားများက အုပ်စုဖွဲ့ ရိုက်နှက်ခဲ့ခြင်းဖြစ်ပြီး၊ သူသည် အရက်အနည်းငယ်သောက်တတ်သော်လည်း ရန်ဖြစ်မှုတစ်စုံတစ်ရာမရှိကြောင်း ဆွေမျိုးတော်စပ်သူ ၁ ဦး က ABN သို့ပြောသည်။
“ည ၉ နာရီလောက်ပါ၊ သူကအရက်အနည်းငယ်သောက်ထားပါတယ်၊ စကစရဲ့ ဝက်သတ်ကုန်းရှိ ရဲကင်းစခန်းအနီးကို သွားတယ်၊ ကင်းစောင့်နေတဲ့ရဲတွေကထွက်လာပြီး ရိုက်ပုတ်ကြတယ်၊ ဒဏ်ရာက မျက်နှာမှာရသွားတယ်၊ သူကအရက်အနည်းငယ်သောက်တတ်တဲ့အကျင့်ရှိပေမယ့် လူတွေနဲ့ရန်မဖြစ်ပါဘူး၊ အခုလိုလုပ်တာက လွန်တယ်” ဟု ဆိုသည်။
ရိုက်နှက်ခံရသူအား ဆေးရုံတွင် ဆေးကုသမှု ခံယူခဲ့ရကြောင်း ပြောသည်။