ရခိုင်ပြည် တောင်ကုတ်မြို့ နယ် မအီမြို့မှ စီးပွားရေး လုပ်ငန်းရှင်တစ်ဦးဖြစ်သည့် ဦးထွန်းကြွယ်ကို ယမန်နေ့ ညနေက စစ်ကောင်စီတပ်မှ ဖမ်းဆီးသွားသည်ဟု သိရသည်။
ဦးထွန်းကြွယ် အသက် ၅၆ နှစ်ကို နိုဝင်ဘာလ ၁၄ ရက်နေ့ ညနေ ၄ နာရီခန့်က တောင်ကုတ်မြို့မှ မအီမြို့သို့ ကိုယ်ပိုင်ကားဖြင့် ပြန်လာစဥ် ကင်းတောင်တိုက်နယ်၊ မီးကျောင်းထိုးရွာအနီး ရန်မျိုးလမ်းခွဲတွင် အရပ်ဝတ် ဝတ်ထားသည့် စစ်ကောင်စီတပ်ဖွဲ့ဝင် ၄ ဦးက အိမ်စီးကားအဖြူ တစ်စီး ဖြင့်လာရောက်ဖမ်းဆီးသွားခြင်းဖြစ်ကြောင်း သိရသည်။
“ဦးထွန်းကြွယ်ကို မီးကျောင်းထိုးရွာအနားက ရန်မျိုးလမ်းခွဲမှာ အိမ်စီးကားအဖြူ တစ်စီးနှင့် လူ ၄ ယောက် လာပြီးတော့ စိစစ်စရာရှိတယ်ဆိုပြီး ဖမ်းသွားတာကို တွေ့လိုက်တယ်” ဖမ်းသွားသည်ကို အနီးကပ်မြင်လိုက်ရသည့် ဒေသခံတစ်ဦးက ABN ကို ပြောသည်။
လက်ရှိအချိန်တွင် ဦးထွန်းကြွယ်ကို တောင်ကုတ်မြို့ စကခ ၅ တွင် ထိန်းသိမ်းထားကြောင်း ခိုင်မာသည့် ဒေသရင်းမြစ်များပြောကြားချက်အရ သိရသည်။
ဦးထွန်းကြွယ်မှာ ရွှေဇီးဇံကုမ္ပဏီလုပ်ငန်းပိုင်ရှင်တစ်ဦးဖြစ်ပြီး၊ ဆီဆိုင်၊ ဘက်ဟိုး၊ မအီ-တောင်ကုတ် လိုင်းဆွဲခြင်း လုပ်ငန်းများနှင့် ကုန်စုံဆိုင်များလည်း ပိုင်ဆိုင်ကြောင်း သိရသည်။
ပြီးခဲ့သည့် နိုဝင်ဘာလ ၄ ရက် ၅ ရက်နေ့များက ကျောက်တော်မြို့နယ်မှ လူမှုရေး တက်ကြွလှုပ်ရှားသူ သွားဆရာဝန် ဦးဇေယျကျော်နှင့် ၎င်း၏ ညီ ဦးမိုက်ကယ်တို့အား စစ်ကောင်စီတပ်က ဖမ်းဆီးထားသည်။