ပုဏ္ဏားကျွန်း၊ မြောက်ဦး၊ စစ်တွေ၊ ကျောက်တော်
စသည့်မြို့နယ်တို့တွင် စစ်ကောင်စီတပ်ဖွဲ့ဝင်များ အင်အားဖြည့် လှုပ်ရှားမှု များ ရှိနေသည်ဟုသိရသည်။
ယနေ့ ဒီဇင်ဘာလ ၁ ရက် နံနက် ၉ နာရီလောက်အချိန်ခန့်တွင် ပုဏ္ဏားကျွန်းမြို့ စစ်ကောင်စီတပ် ၅၅၀တပ်ရင်းမှ RPG လက်နက်နှင့်တခြား လက်နက်များသယ်ဆောင်ပြီး၊ စစ်ကား ၃ စီး၊ စစ်ကောင်စီတပ်ဖွဲ့ဝင် ၁၃၀ ခန့်နှင့် ရဲ ၁၆ ယောက်ခန့်တို့ သင်္ဘောဆိပ်ဖက်သို့ဦးတည် ဆင်းသွားကြကြောင်း စုံစမ်းသိရှိရသည်။
“သူတို့ အင်အားကတော့ ၁၃၀ လောက်ရှိပါတယ်၊ တချို့ စစ်သားတွေဆိုရင် RPG တွေထမ်းပြီး လက်နက်တွေအပြည်စုံနှင့် ခြေကျင်လျှောက်သွားတာတွေ့ပါတယ်၊ ကား ၃ စီးနှင့် ရဲတွေကတော့ စစ်ကောင်စီတပ်ဖွဲ့ဝင်တွေ နောက်မှ မိနစ် ၃၀ လောက်ခြားပါတယ် ရွာဟောင်းရပ်ကွက် သဘော်ဆိပ်ကမ်းဖက်ကို ဆင်းသွားတာတွေ့လိုက်ပါတယ်” ဟု မျက်မြင်ဒေသခံတစ်ဦးမှပြောသည်။
ထို့အတူ မြောက်ဦးမြို့ အလယ်စျေးရပ်ကွက်၊ ကုန်သည်တန်းစျေး၊ ကျောက်ရစ်ကေရပ်ကွက်၊ ညောင်ပင်စျေး စသည့်နေရာများတွင်လည်း စစ်ကောင်စီတပ်အင်အာ ၄၀ခန့် သွားလာလှုပ်ရှားမှုများရှိနေကြောင်းမျက်မြင်ဒေသခံများ ပြောပြချက်အရ သိရသည်။
” မနက် ၉ နာရီကျော်လောက်ရှိဖို့ထင်ပါတယ်၊ သူတို့က လမ်းသွားလမ်းလာတွေကို စစ်ဆေးပါတယ်၊ သူတို့အင်အားကတော့ ၄၀ ခန့်လောက်ရှိမယ် ထင်ပါတယ်” ဟုဒေသခံတစ်ဦးမှပြောသည်။
၎င်းအပြင် ယနေ့ မနက် ၉ နာရီခန့်ကလည်း ကျောက်တော် စကခ ( ၉ ) တပ်ရင်းမှနေပီ ၄ စီး စစ်တွေဖက်သို့ ဆင်းသွားကြောင်းသိရသည်။
“မနေ့က စကခ (၉) တပ်ရင်းနားမှာ နေဗီ ၂ စီးရပ်လို့ရှိပါတယ်၊ ဒီနေ့ မနက်ကျတော့ ရပ်ထားတဲ့ နေဗီ ၂ စီးထဲက ၁ စီးဟာ တခြား နေပီ ၃ စီးနှင့်အတူ မနက် ၈ နာရီခွဲကျော်ခန့်လောက်က ကစ္ဆပနဒီတံတားအောက်ကနေ ဖြတ်သွားတာတွေ့လိုက်ပါတယ်၊ အင်အားတော့သိပ်မများဘူး၊ နေပီ အကြီး ၁ စီးမှာ အင်အား ၂၀ လောက်ရှိမယ်ထင်ပါတယ်၊ တခြားနေဗီတွေမှာတော့ မတွေ့လိုက်ပါဘူး” ဟုမျက်မြင်တစ်ဦးကပြောသည်။
စစ်တွေမြို့ ရွှေမင်းဂံ ကူးတို့ဆိပ်ဖက်သို့ စစ်ကား ၆ စီးဆင်းသွားကြောင်းသိရသည်။
“ကျွန်တော်မြင်လိုက်တာကတော့ ” ဆန် ၂ စီး၊ ဆီ ပေပါ ၂ စီး၊ လူအင်အားအပြည့်နှင့်ကား ၂ စီးကိုတွေ့လိုက်ရပါတယ်” ဟုပြောသည်။
စစ်တွေမြို့ ဝါးဆိပ်တံတားနားတွင်လည်း စစ်ကား ၁ စီးရပ်နားပြီး၊ စစ်ကောင်စီ ၁၅ ယောက်ခန့်တို့သည်လမ်းသွားလမ်းလာများကို စစ်ဆေးနေကြောင်းသိရသည်။
စစ်ကောင်စီတပ်နှင့် ရက္ခိုင့်တပ်တော်တို့အကြား လူသားချင်းစာနာမှုဆိုင်ရာ အပစ်အခတ်ရပ်တန့်ထားကြသော်လည်း စစ်ကောင်စီတပ်ဖက်မှ စစ်ရေးလှုပ်ရှားမှုများ၊ ရိက္ခာဖြည့်တင်းမှုများမှာ တပ်ဖြန့်ချထားမှုများနှင့် ပြည်သူများအား စစ်ဆေးမှုများမှာ တိုက်ပွဲကာလအတွင်းအတိုင်း ပုံမှန်ရှိနေဆဲဖြစ်သည်။
ပုဏ္ဏားကျွန်းမြို့နယ်မှ စစ်ဘေးရှောင်များမှာလည်း အပစ်ရပ်ပြီး နောက်တနေ့တွင် မိမိရပ်ရွာများသို့ ပြန်ကာ စပါးရိတ်သိမ်းခြင်းများကို ပြုလုပ်နေကြပြီဖြစ်ကြောင်း လေ့လာသိရှိရသည်။
