AB News – ဒီဇင်ဘာ ၃၁၊ ၂၀၂၃
ရက္ခိုင်ပြည်၊ ကျောက်တော်မြို့နယ်၊ ညောင်ချောင်းစစ်ဘေးရှောင်စခန်းမှ စစ်ဘေးရှောင် ၁ဦးအား အကြမ်းဖက် စစ်ကောင်စီအဖွဲ့က ယနေ့ ဒီဇင်ဘာလ ၃၁ရက် နံနက် ၁၀နာရီကျော် အချိန်တွင် လူမဆန်စွာ ရိုက်နှက်ပြီး ဖမ်းဆီးသွားခဲ့ကြောင်း AB News မှ စုံစမ်းသိရှိရသည်။
လူမဆန်စွာ ရိုက်နက်ပြီး ဖမ်းဆီးခဲ့ရသူမှာ ကျောက်တော်မြို့နယ်၊ ညောင်ချောင်းစစ်ဘေးရှောင်စခန်းမှ အသက် ၄၅ နှစ်အရွယ် ဦးမောင်သန်းဝေဖြစ်သည်။
ယနေ့ ဒီဇင်ဘာလ ၃၁ရက် နံနက် ၁၀နာရီကျော် အချိန်တွင် အကြမ်းဖက် စစ်ကောင်စီအဖွဲ့သည် ကျောက်တော်မြို့နယ်၊ ညောင်ချောင်းစစ်ဘေးရှောင်စခန်းမှ စစ်ဘေးရှောင် ၁ဦးကို လူမဆန်စွာ ရိုက်နက်ပြီး ဖမ်းဆီးခဲ့သည်ဟု ဒေသခံ ၁ဦးက ပြောသည်။
” ဒီနေ့ မနက် ၁၀ နာရီကျော်အချိန်မှာ ဦးမောင်သန်းဝေဟာ မဟာမုနိဘုရားကြီးအနီးက လေယာဥ်ကွင်းအနားမှာ စပါးအငှား ရိပ်သိမ်းနေတာပါ။ အဲဒါကို ခလရ ၃၇၆ တပ်ရင်းက စစ်သားတွေက ရိုက်နက် ဖမ်းဆီးသွားပါတယ်” ဟု ဆိုသည်။
ကျောက်တော်မြို့နယ်၊ ညောင်ချောင်းစစ်ဘေးရှောင်စခန်းမှ စစ်ဘေးရှောင် ဦးမောင်သန်းဝေကို ခလရ ၃၇၆ တပ်ရင်းမှ စစ်သားများသည် ရိုက်နက်ပြီး ကြိုးဖြင့် ချည်ကာ ဖမ်းဆီးခေါ်ယူခဲ့ကြောင်း သိရှိရသည်။
ဦးသန်းဝေသည် ကျောက်တော်မြို့နယ်၊ မာလာရွာဇာတိဖြစ်ပြီး ၂၀၁၉ ခုနှစ်မှ စ၍ ညောင်ချောင်းစစ်ဘေးရှောင်စခန်းတွင် မိသားစုနှင့်အတူ စစ်ဘေးရှောင်နေသူ ဖြစ်သည်။