ABN-ရှိုင်းမိုး
ယနေ့ နံနက် ၁၀ နာကျော်အချိန်တွင် ရခိုင်ပြည်ကျောက်တော်မြို့ ချင်းရွာရပ်ကွက်တွင် ဓာတ်ဆီဖြည့်ရန်ရောက်ရှိနေသည့် တေဘာကား ၁စီးကို စစ်ကောင်စီတပ်က လုယူသွားသည်ဟုသိရသည်။
ထိုတေဘာကားသည် ကျောက်တော်မြို့ ချင်းရွာရပ်ကွက်မှ ဒေါ်မအေးတင်၏ ကားဖြစ်သည်ဟုသိရသည်။
တေဘာကားကို ဓာတ်ဆီဆိုင်တွင် ဆီဖြည့်ရန်လာသည့်အချိန်တွင် ကျောက်တော်မြို့ချင်းရွာရပ်ကွက်တွင် ရောက်ရှိနေသည့် စစ်ကောင်စီတပ်သားအင်အား ၆၀ ကျော်ခန့်မှ အတင်းအဓမ္မခေါ်ယူပြီး စစ်သားများတင်ယူကာထွက်သွားသည်ဟု မျက်မြင်သက်သေတစ်ဦးကပြောသည်။
“စစ်သား ၆၀ လောက်ရောက်လို့ရှိပါတယ်၊ သူတို့က မနက် ၇နာရီလောက်ကတည်းကရောက်နေကြတာပါ၊ အဲဒီအချိန်မှာ တေဘာကားက ဓာတ်ဆီဖြည့်ဖို့သွားတာနဲ့တူတယ်၊ ဆီဆိုင်ရှေ့မှာ ရပ်နေတဲ့ကားကို စစ်သားတွေက အတင်းအဓမ္မ လှမ်းခေါ်ပါတယ်၊ ပြီးတော့ သူတို့အထုတ်တွေတင်တယ်၊ စစ်သားတွေတင်တယ်၊ ပြီးရင်မြို့ထဲဖက်ကိုထွက်သွားပါတယ်” ဟု ၎င်းကဆက်ပြောသည်။
ယနေ့ နံနက် ၇နာရီကျော်အချိန်တွင် ကျောက်တော်မြို့ထဲသို့ ရဲကား ၁စီး၊ စစ်ကား ၅စီး စုစုပေါင်း စစ်အင်အား ၁၀၀ ကျော်ခန့်ဖြင့်မြို့ထဲတွင်လှည့်လည်သွားလာနေကြကြောင်းမြို့ခံများပြောပြချက်အရ သိရသည်။
