AB News- ဖေဖော်ဝါရီ ၇၊ ၂၀၂၆
ဘင်္ဂလားဒေ့ရှ်နိုင်ငံ၊ ကော့ဇ်ဘဇားခရိုင်၊ တက္ကနာ့ဖ်မြို့နယ်အတွင်းရှိ ဒုက္ခသည်စခန်းတစ်ခုတွင် မူဆလင်လက်နက်ကိုင်အဖွဲ့ နှစ်ဖွဲ့ဖြစ်သည့် ARSA နှင့် RSO တို့အကြား အပြန်အလှန် ပစ်ခတ်မှုဖြစ်ပွားရာ ကလေးငယ်တစ်ဦးအပါအဝင် စုစုပေါင်း ၅ ဦး ဒဏ်ရာရရှိခဲ့ကြောင်း သတင်းရရှိသည်။
ပြီးခဲ့သည့် ဖေဖော်ဝါရီ ၅ ရက်နေ့ ညပိုင်းအချိန်တွင် အာလီခါလီ (Alikhali) Camp-25 အတွင်း နယ်မြေစိုးမိုးရေးအတွက် ARSA နှင့် RSO တို့အကြား လက်နက်ကြီး၊ လက်နက်ငယ်များဖြင့် အပြန်အလှန် ပစ်ခတ်မှုဖြစ်ပွားခဲ့ခြင်းဖြစ်သည်။
အဆိုပါ ပစ်ခတ်မှုအတွင်း စခန်းအနီးနေထိုင်သူများနှင့် ဒုက္ခသည်များ ကျည်ထိမှန်ခဲ့ပြီး ဒဏ်ရာရရှိသူများမှာ ၃၆ နှစ်အရွယ် အဒူရာမန်း၊ ၁၃ နှစ်အရွယ် မူဟာမတ်ဂျီဆန်၊
၃၈ နှစ်အရွယ် ဘာရှားမျာ (ဒေသခံ)၊ ၁၈ နှစ်အရွယ် နာဆာရက်ဂျာဟန် (ဒေသခံ)၊ ၁၁ နှစ်အရွယ် ရှာအ်ဘူဒိန် (ဒေသခံ) တို့ ဖြစ်ကြသည်။
ဒဏ်ရာရရှိသူများကို ကော့ဇ်ဘဇားရှိ ဆေးရုံသို့ ပို့ဆောင်ထားရပြီး လက်ရှိတွင် အသက်အန္တရာယ် မစိုးရိမ်ရတော့ကြောင်း သိရသော်လည်း အချို့မှာ ခွဲစိတ်မှုများ ပြုလုပ်ရမည်ဟု မိသားစုဝင်များက ပြောသည်။
ယခုပစ်ခတ်မှုတွင် ထူးခြားချက်မှာ ဒုက္ခသည်စခန်းအနီးရှိ ဘင်္ဂလားဒေ့ရှ်ဒေသခံ ၃ ဦးပါ ကျည်ထိမှန်ခဲ့ခြင်းဖြစ်ပြီး စခန်းအတွင်းရှိ လက်နက်ကိုင်အဖွဲ့များ၏ အကြမ်းဖက်မှုများသည် စခန်းခြံစည်းရိုးကို ကျော်လွန်၍ အနီးနားရှိ ကျေးရွာများအထိ ခြိမ်းခြောက်လာနေသည့်အတွက် ဒေသခံရက္ခိုင်ပြည်သူများနှင့် ဘင်္ဂလားဒေ့ရှ်နိုင်ငံသားများက လုံခြုံရေးအတွက် အထူးစိုးရိမ်နေကြသည်။
ကော့ဇ်ဘဇားခရိုင်အတွင်းရှိ ဒုက္ခသည်စခန်းများတွင် ယခင်ကလည်း အဆိုပါလက်နက်ကိုင်အဖွဲ့များအကြား မူးယစ်ဆေးဝါးလုပ်ငန်းနှင့် လူကုန်ကူးမှုလမ်းကြောင်း ထိန်းချုပ်နိုင်ရေးအတွက် မကြာခဏ ပစ်ခတ်မှုများ ဖြစ်ပွားလေ့ရှိသည်။
ယခုနောက်ပိုင်းတွင် စခန်းများအတွင်း လုံခြုံရေးကျိုးပေါက်မှုများ ပိုမိုများပြားလာပြီး ပြန်ပေးဆွဲမှုနှင့် လူသတ်မှုများပါ ခပ်စိပ်စိပ် ဖြစ်ပွားလာနေကြောင်း စခန်းတွင်းနေ ဒုက္ခသည်များ၏ ပြောကြားချက်အရ သိရသည်။
လက်ရှိတွင် ဘင်္ဂလားဒေ့ရှ် အာမ္မတပ်ဖွဲ့ (APBn) မှ စခန်းအတွင်း လုံခြုံရေးတိုးမြှင့်ထားပြီး ပစ်ခတ်မှုတွင် ပါဝင်သူများကို လိုက်လံရှာဖွေနေကြောင်း သတင်းရရှိသည်။