AB News -ဧပြီ ၂၅ ၊၂၀၂၅
ရက္ခိုင်ပြည်၊ အမ်းမြို့နယ် ဆင်ခုံတိုင်ကျေးရွာတွင် စစ်ကျန်မိုင်း ၁ လုံးကို နင်းမိရာမှ ပေါက်ကွဲမှု ဖြစ်ပွားခဲ့ကာ သက်ကြီးပိုင်းအမျိုးသား ၁ ဦး ထိခိုက် ဒဏ်ရာရရှိခဲ့ကြောင်း သတင်းရရှိသည်။
ဒဏ်ရာရရှိသွားသူမှာ အမ်းမြို့နယ်၊ ဆင်ခုံတိုင်ရွာမှ အသက် ၅၉နှစ်အရွယ် ချင်းလူမျိုး ဦးမောင်စံဖြစ်ကြောင်း သိရသည်။
ယနေ့ နံနက်ပိုင်း ၁၀ နာရီတွင် ဦးမောင်စံသည် ယာခင်းထဲ သွားခဲ့သည်။ မြောင်ထဲသို့ ရေသောက်ရန် ဆင်းစဉ် ယခင်က စစ်ကောင်စီထောင်ထားခဲ့သည့် တိုက်မိုင်း ၁ လုံးကို နင်းမိပြီး ပေါက်ကွဲမှုဖြစ်ပွားကာ ဒဏ်ရာရရှိခဲ့ကြောင်း ဒေသခံ တစ်ဦးက AB News သို့ပြောသည်။
” ဒီနေ့ နေ့လယ် ၁၀ နာရီလောက်မှာ ယာခင်ထဲသွားတာ။ရေသောက်ဖို့ဆိုပြီး မြောင်ထဲကို ဆင်းတဲ့အခါ စစ်ကောင်စီထောင်ထားခဲ့တဲ့ မိုင်းကိုနင်းမိပြီး ဒဏ်ရာရရှိခဲ့တာဖြစ်တယ်”ဟု ဆိုသည်။
အဆိုပါ မိုင်းပေါက်ကွဲခဲ့ခြင်းကြောင့် ဦးမောင်စံ၏ ခန္ဓာကိုယ်အနှံ့တွင် မိုင်းစထိမှန်ပြီး ဒဏ်ရာရရှိသွားခဲ့သည်။
လက်ရှိတွင် ထိခိုက်ဒဏ်ရာရရှိခဲ့သည့် ဦးမောင်စံအား နီးစပ်ရာဆေးရုံတွင် ဆေးကုသမှုခံယူ နေကြောင်းသိရသည်။
အာရက္ခပြည်သူ့တော်လှန်ရေးအစိုးရအနေဖြင့်လည်း ရက္ခိုင်ပြည်အတွင်းရှိ ယခင် စစ်ကောင်စီတပ်စွဲနေထိုင်ခဲ့သော ရပ်ရွာများတွင် မိုင်းအန္တရာယ် ကင်းရှင်းရေး လုပ်ငန်းများကို အင်တိုက် အားတိုက် ဆက်လက် ဆောင်ရွက်နေသည်ကို တွေ့ရှိရသည်။