
AB News – ဧပြီ ၂ ၊ ၂၀၂၅
ရက္ခိုင်ပြည် မောင်တောတွင် အကြမ်းဖက် မူဆလင် လက်နက်ကိုင် ARSA သတ်ဖြတ်လို့ ပြည်သူ ၄ ဦးသေဆုံးခဲ့ကြောင်း သိရသည်။
သေဆုံးသွားသူများမှာ ဘူးသီးတောင်မြို့နယ် ၊ ဂုပ္ပီ (ခမီ) ကျေးရွာမှ အသက် ၁၇ နှစ်အရွယ် မောင်သာအေးကျော် ၊ အောက်ဂန္ဒရူး (ခမီ)ကျေးရွာမှ အသက် ၂၅ နှစ်အရွယ် ကိုမောင်ကြီး ၊ အိုဗြို (ခမီ) ကျေးရွာမှ အသက် ၄၁ နှစ်အရွယ် ဦးမောင်ဘ နှင့် မောင်တောမြို့နယ် ၊ မြဂတီ (ခမီ) ကျေးရွာမှ အသက် ၁၉ နှစ်အရွယ် ကိုအောင်နိုင်ထွန်း ဖြစ်သည်။
မတ်လ ၂၉ ရက်နေ့ ၊ နံနက် ၇ နာရီအချိန်လောက်မှာ ၎င်းတို့ ၄ ဦးသည် မောင်တောမြို့နယ် မြဝတီ (ခမီ) ကျေးရွာမှ အောဂန္ဒရူးကျေးရွာသို့ သွားစဥ် အကြမ်းဖက် မူဆလင်လက်နက်ကိုင် ARSA ထံ ဖမ်းဆီးသတ်ဖြတ်ခြင်းကို ခံခဲ့ရခြင်းဖြစ်သည်။
၎င်းတို့၏ ရုပ်အလောင်းများကို မယူတောင် ၊ ဘဒဂါးတောင်ကျော်လမ်းတွင် စွန့်ပစ်ထားခဲ့ပြီး မတ်လ ၃၀ ရက်နေ့တွင် ဝမ်းဗိုက် ၊ ခြေထောက် ၊ ခန္ဓာကိုယ်တို့တွင် သေနတ် ဒဏ်ရာများဖြင့် တွေ့ရှိခဲ့ကြောင်း ဒေသခံပြည်သူ ၁ ဦးက AB News သို့ပြောသည်။
” ဘူးသီးတောင် ၊ မောင်တောမှာက ARSA တွေ တအားသောင်းကြမ်းတယ်။ မတ်လ ၂၉ ရက်နေ့ကလည်း ပြည်သူ ၄ ယောက်ကို ဖမ်းဆီးသတ်ဖြတ်ခဲ့တယ်။ သူတို့ကိုယ်ပေါ်မှာ သေနတ်ဒဏ်ရာတွေ ၊ ဒဏ်ရာဒဏ်ချက်တွေအများကြီးတွေ့ရတယ် ” ဟု ဆိုသည်။
၂၀၂၅ ခုနှစ် ဇန်နဝါရီ ၄ ရက်က မောင်တောမှ ရသေ့တောင်၊ စေတီပြင်ရွာသို့ သွားသည့် တုတ်တုတ်သုံးဘီး တစ်စီးကို ARSA အဖွဲမှတိုက်ခိုက်ခဲ့သဖြင့် အမျိုးသား ၁ ဦးသေဆုံးပြီး ၂ ဦး ဒဏ်ရာရရှိခဲ့သည်။
အလားတူ ၂၀၂၄ ဒီဇင်ဘာ ၅ ရက်ကလည်း ဘူးသီးတောင်မြိုနယ်၊ ဆင်စွယ်ရ(ဒိုင်းနက်)ကျေးရွာကို ARSA အဖွဲက ဝင်ရောက်တိုက်ခိုက်ပြီး ၁၆ နှစ်အရွယ် အမျိုးသမီးငယ် တစ်ဦး သတ်ဖြတ်ခံခဲ့ရကာအမျိုးသား ၅ ဦးကိုလည်း ဖမ်းဆီးခေါ်ဆောင်သွားခဲ့သည်။ထို့အပြင် နေအိမ် ၂ ဆောင်ကိုလည်း မီးရှို့ဖျက်ဆီးခဲ့သည်။
အကြမ်းဖက် မူဆလင် လက်နက်ကိုင် ARSA အဖွဲ့သည် မတ်လ ၃၁ ရက်နေ့က လူမှုကွန်ရက်တွင် ၎င်းတို့ခေါင်းဆောင် အာတာအူလာ (Ataullah Abu Ammar Jununi) ဖမ်းဆီးခြင်း ခံရသော်လည်း ARSAအဖွဲ့၏ ရပ်တည်ချက်နှင့် ဆုံးဖြတ်ချက်မှာ ယိမ်းယိုင်သွားမှာဟုတ်ပဲ အာရက္ခတပ်တော် AA ကို ဆက်လက်တိုက်ခိုက်သွားမည်ဟု ခြိမ်းခြောက် ပြောဆိုခဲ့သည်။