AB News – သြဂုတ် ၇၊ ၂၀၂၅
ဒေဝီ
မိုးဆက်တိုက်ရွာသွန်းမှုကြောင့် ရေကြီးပြီး စပါးခင်းများပျက်စီးသွားသည့် မင်းပြားက လယ်သမားများကို အာရက္ခပြည်သူ့တော်လှန်ရေးအစိုးရက မျိုးစပါးများ ကူညီထောက်ပံ့ပေးခဲ့ကြောင်း သိရှိရသည်။
မိုးသည်းထန်စွာရွာသွန်းခဲ့၍ ရေကြီးမှုဒဏ်ကို ခံခဲ့ရသော မင်းပြားမြို့နယ်၊ ပန်းမြောင်းကြီးချောင်း တလျှောက်ရှိ ချင်းဆိပ်၊ တောတန်း၊ မြင်းကဆိပ်၊ ဝါးတောင်၊ ဒုံကြီးနှင့် ကုလားမတောင်ရွာများက လယ်သမားများကို ယမန်နေ့ သြဂုတ် ၆ ရက်နေ့တွင် အာရက္ခပြည်သူ့တော်လှန်ရေးအစိုးရက မျိုးစပါးများ ကူညီထောက်ပံ့ပေးခဲ့ကြောင်း ဒေသခံလယ်သမားများ၏ ပြောကြားချက်အရ သိရသည်။
ကူညီထောက်ပံ့ရာတွင် စပါးခင်း ပျက်စီးမှု အနည်းနှင့် အများကိုကြည့်ပြီး မြင်းကဆိပ်ရွာကို စပါးတောင်း၂၀၀၊ ဝါးတောင်ရွာကို စပါးတောင်း ၆၀၀၊ တောတန်းရွာကို စပါးတောင်း ၄၀၊ ဒုံကြီးရွာကို ၁၀ တောင်း၊ ကုလားမတောင်ရွာကို ၁၅ တောင်း၊ ချင်းဆိပ်ရွာကို စပါးတောင်း ၁၅၀ နှင့် ရပ်ရွာ ၆ ရွာအတွက် စပါးတောင်း စုစုပေါင်း ၁၁၁၅ တောင်း ကူညီထောက်ပံ့ပေးခဲ့ကြောင်းသိရသည်။
အာရက္ခပြည်သူ့တော်လှန်ရီးအစိုးရအနေဖြင့် မင်းပြားအပါအဝင် ရေလွှမ်းမိုးမှုကြောင့် စပါးခင်းများပျက်စီးသွားသည့် တခြားမြို့နယ်များက ကျေးရွာများကိုလည်း မျိုးစပါးများ ဆက်လက် ထောက်ပံ့ကူညီပေးသွားမည်ဖြစ်ကြောင်း သိရသည်။
အလားတူ ရေလွှမ်းမိုးမှုကြောင့် စပါးခင်းများ ပျက်စီးဆုံးရှုံးခဲ့သည့် မြောက်ဦးမြို့နယ်၊ ကျွဲတဲ၊ဘူးတလုံး၊အမြောက်တောင်၊နဂါးကွေ့အစရှိသည့် ရွာများက လယ်သမားများကိုလည်း အာရက္ခပြည်သူ့တော်လှန်အစိုးရက မျိုးစပါးများ ထောက် ပံ့ပေးခဲ့ပြီးဖြစ်ကြောင်းလည်း သိရသည်။
ပြီးခဲ့သည့် ဇူလိုင်လအတွင်း မိုးဆက်တိုက်ရွာသွန်းမှုကြောင့် မင်းပြားအပါအဝင် ရက္ခိုင်ပြည်ရှိ မြို့နယ်တချို့တွင် ရေကြီးမှုဒဏ်ကို ခံစားခဲ့ရသောကြောင့် စိုက်ပျိုးထားသည့် စပါးခင်းအများစုမှာလည်း ပျက်စီးဆုံးရှုံးခဲ့ရသည်။