AB News – ဧပြီ ၂၊ ၂၀၂၅
ရှမ်းပြည်နယ်မြောက်ပိုင်း၊ နောင်ချိုမြို့အနီးတွင် ဧပြီလ ၁ ရက်နေ့ ညပိုင်းက ငလျင်ကယ်ဆယ်ရေးအထောက်အပံ့များ သယ်ဆောင်လာသော တရုတ် ကြက်ခြေနီယာဉ်တန်းကို စစ်ကောင်စီတပ်ဖွဲ့ဝင်များက ပစ်ခတ်ခဲ့ကြောင်း စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ဧပြီလ ၂ ရက်နေ့တွင် ဝန်ခံပြောကြားခဲ့သည်။
ဗိုလ်ချုပ်ဇော်မင်းထွန်း၏ အဆိုအရ ယာဉ်တန်းကို တားဆီးရန် ကြိုးပမ်းသော်လည်း မရရှိခဲ့သောကြောင့် သေနတ်ဖြင့် မိုးပေါ်သို့ သုံးချက် ပစ်ခတ်ခဲ့သည်ဟု ဆိုသည်။
ထို့ပြင် တရုတ်ကြက်ခြေနီအဖွဲ့သည် စစ်ကောင်စီအား အကြောင်း ကြားခြင်းမရှိဘဲ တအာင်းအမျိုးသားလွတ်မြောက်ရေး တပ်မတော် (TNLA) နှင့် တိုက်ပွဲများဖြစ်ပွားနေသည့် ဒေသအတွင်း ဖြတ်သန်းသွားခြင်းဖြစ်ကြောင်း ၎င်းက ဆက်လက်ပြောကြားခဲ့သည်။
သို့သော် TNLA ကမူ ယာဉ်တန်းသည် မန္တလေးမြို့သို့ သွားရောက်ရန် စစ်ကောင်စီအား အကြောင်းကြားပြီး ဖြစ်ကြောင်းနှင့် စစ်ကောင်စီတပ်ဖွဲ့ဝင်များက စက်သေနတ်ဖြင့် ပစ်ခတ်ခဲ့သောကြောင့် နောင်ချိုမြို့သို့ ပြန်လည်ဆုတ်ခွာခဲ့ရကြောင်း ထုတ်ပြန်ခဲ့သည်။
ထို့အပြင် TNLA က ယာဉ်တန်းကို ကာကွယ်စောင့်ရှောက်ထားကြောင်းလည်း ထုတ်ပြန်ချက်တွင် ဖော်ပြထားသည်။