AB News – နိုဝင်ဘာ ၂၉၊ ၂၀၂၃
ရက္ခိုင်ပြည်၊ ကျောက်တော်မြို့နယ်ရှိ ရွာ ၇ ရွာထက်မနည်းကို စကစမှ ရဟတ်ယာဥ်ဖြင့် စက်သေနတ်ဖြင့် ပစ်ချသွားခဲ့ကြောင်း သိရသည်။
စကစ ရဟတ်ယာဥ် ၁ စီးသည် ယနေ့ ညနေ ၄နာရီ ၅၈ မိနစ်ခန့်က ကျောက်တော်မြို့အနီး အပေါက်ဝရွာနှင့် အနီးတစ်ဝိုက်သို့ ပျံသန်းပြီး စက်သေနတ်ဖြင့်ပစ်ခတ်ခဲ့ကြောင်း ဒေသခံတစ်ဦးက AB News သို့ ပြောသည်။
“ရွာတွေကိုပတ်ပြီး လှမ်းပစ်တယ်၊ ဘယ်နေရာတွေကို ကျည်ကျလဲဆိုတာတော့ အတိအကျမသိရသေးဘူး” ဟု ဆိုသည်။
အပေါက်ဝရွာတွင် အိမ်တစ်ဆောင်မီးလောင်သွားခဲ့သည်ဟု စကားများထွက်ပေါ်နေသော်လည်း AB News အနေဖြင့် သီးခြားအတည်ပြုနိုင်ခြင်း မရှိသေးပေ။
စစ်ကောင်စီ ရဟတ်ယာဥ်သည် အပေါက်ဝ၊ ကသစ်တော၊ ကာလီယာ၊ ရွာသစ်ကေ၊ ပေါက်တောပလောင်၊ ရွာညာနှင့် ကြာညိုပြင်ရွာတို့အား လှည့်ပတ်ပစ်ခတ်ခဲ့ကြောင်း သိရသည်။
လက်ရှိတွင် လူထိခိုက်သေဆုံးမှု၊ ပစ္စည်းဥစ္စာဆုံးရှူံးမှု ရှိ/မရှိ တိတိကျကျမသိရှိရသေးပါ။ အသေးစိတ်အချက်အလက်များ ရရှိလျှင် AB News မှ ဆက်လက်ဖော်ပြပေးသွားမည် ဖြစ်သည်။