AB News – အောက်တိုဘာ ၃၁၊ ၂၀၂၅
မျိုးဟိန်း
ဒေသခံပြည်သူများ နေထိုင်မှု မရှိသည့် ပုဏ္ဏားကျွန်းမြို့ပေါ် လူနေအဆောက်အဦးများကို စစ်တွေအခြေစိုက် စစ်ကော်မရှင်(စကမ) အမြောက်တပ်ရင်းများမှ လက်နက်ကြီး (ဟာဝစ်ဇာ) ပစ်ခတ်မှုကြောင့် ဘာသာရေးဘုန်းကြီးကျောင်းအပါအဝင် လူနေအိမ်အချို့ ပျက်စီးသွားကြောင်း AB News မှ စုံစမ်းသိရသည်။
ယနေ့ အောက်တိုဘာ ၃၁ ရက်နေ့ နေ့လည် ၁၁ နာရီကျော်အချိန်တွင် စစ်တွေအခြေစိုက် ခမရ (၃၄၄) အမြောက်တပ်ရင်းများမှ ပစ်ခတ်လိုက်ခြင်း ဖြစ်ကြောင်း သိရသည်။
စကမ ပစ်ခတ်လိုက်သည့် လက်နက်ကြီများမှာ ပုဏ္ဏားကျွန်းမြို့ပေါ် စံပြရပ်ကွက်တွင် ကျရောက်ပေါက်ကွဲ ခဲ့သောကြောင့် ဘုန်းတော်ကြီးတစ်ကျောင်းအပါအဝင် လူနေအိမ်တချို့ ပျက်စီးသွားကြောင်း စစ်ရေးသတင်း ရင်းမြစ်တစ်ဦးက ပြောသည်။
“ဒီနေ့ နေ့လည် ၁၁ နာရီလောက်မှာ ပုဏ္ဏားကျွန်းမြို့ပေါ်သို့ လက်နက်ကြီး ၃ လုံးကျရောက်ပေါက်ကွဲခဲ့တာ ရှိတယ်။ စစ်တွေ အခြေစိုက် ခမရ (၃၄၄) အမြောက်တပ်ရင်းတွေဆီက ပစ်ခတ်လိုက်တာပါ။ နေအိမ် ၂ ဆောင်နဲ့ ဘာသာရေးကျောင်း ၁ ဆောင် ပျက်စီသွားတယ်” ဟု ဆိုသည်။
ပုဏ္ဏားကျွန်းမြို့သည် အာရက္ခတပ်တော် ထိန်းချုပ်မြို့ဖြစ်သော်လည်း စကမ၏ လေကြောင်း၊ လက်နက်ကြီး အန္တရာယ်ကြောင့် ပြည်သူများနေထိုင်ခွင့်ကို အာရက္ခတပ်တော်က ကန့်သတ်ပိတ်ပင်ထားကြောင်း သိရသည်။
လူသူနေထိုင်ခြင်းမရှိသည့် မြို့ပေါ်သို့ စကမ မှ လက်နက်ကြီး ပစ်ခတ်မှုမှာ ပြည်သူများ နေထိုင်သည့် အဆောက်အဦးများကို ရည်ရွယ်ချက်ရှိရှိ ပစ်ခတ်ဖျက်ဆီးခြင်းသာ ဖြစ်သည်ဟု စစ်ရှောင်နေသည့် မြို့ခံတစ်ဦးက ပြောသည်။
“စကမရဲ့ လက်နက်ကြီး၊ လေကြောင်း ပစ်ခတ်မှုတွေကြောင့် မြို့ပေါ်နေထိုင်ခွင့်ကို အာရက္ခတပ်တော်က ကန့်ကတ်ထားတာရှိတယ်။ အခုလို ပစ်ခတ်တာက ဘာသာရေးအဆောက်အဦးတွေနဲ့ ပြည်သူတွေ နေထိုင်တဲ့ နေအိမ်တွေကို ရည်ရွယ်ချက်ရှိရှိ ဖျက်ဆီးတာ ဖြစ်တယ်။ ပြည်သူတွေ မနေရဲအောင် အကြမ်းဖက်တာလို့ပဲ မြင်တယ်” ဟု ၎င်းက ဆိုသည်။
ရှမ်းမြောက်တွင် အပစ်ရပ်ထားသည့် စကမ သည် ယခုရက်ပိုင်းအတွင်း အာရက္ခတပ်တော် ထိန်းချုပ်မြို့နယ်များမှ လူစုလူဝေးရှိသည့် နေရာများ၊ ဆေးရုံ၊ ဆေးခန်းများ၊ ဘာသာရေးအဆောက်အဦးအပါအဝင် စစ်ရှောင်များ နေထိုင်သည့် နေရာများကို လေကြောင်း၊ လက်နက်ကြီး ပစ်ခတ်တိုက်ခိုက်မှုများ ယခုရက်ပိုင်းအတွင်း ဆက်တိုက်ပြုလုပ်လာကြောင်းတွေ့ရသည်။
စကမ သည် ယမန်နေ့ အောက်တိုဘာလ ၃၀ ရက်နေ့တွင် ရက္ခိုင်မှ အာရက္ခတပ်တော်ထိန်းချုပ်မြို့နယ် ၃ ခု လေကြောင်း နှင့် ရေကြောင်း အသုံးပြုကာတိုက်ခိုက်ခဲ့သည်။
ထိုတိုက်ခိုက်မှုကြောင့် ဒေသခံပြည်သူ ၉ ဦးသေဆုံးပြီး ၂၂ ဦးခန့် ထိခိုက်ဒဏ်ရာ ရရှိခဲ့ကြောင်း အာရက္ခတပ်တော်မှ ယနေ့အောက်တိုဘာလ ၃၁ ရက်နေ့တွင် ထုတ်ပြန်သည်။
အလားတူ ယနေ့ အောက်တိုဘာလ ၃၁ ရက်နေ့တွင်လည်း ပုဏ္ဏားကျွန်းမြို့ပေါ် နှင့် မြို့နယ်များကို စကမ က လေကြောင်းဗုံးကြဲတိုက်ခိုက်ခဲ့သောကြောင့် ပြည်သူ ၄ ဦးသေဆုံးပြီး ၉ ဦးထက်မနည်း ထိခိုက်ဒဏ်ရာ ရရှိခဲ့သည်။ သေဆုံးသူများထဲတွင် အသက်မပြည့်သည့် ကလေးငယ်များလည်း ပါဝင်ကြောင်း သိရသည်။
ထို့အပြင် စကမ မှ ပြည်သူများနေထိုင်သည့် နေရာများအား အချိန်မရွေး ရည်ရွယ်ချက်ရှိရှိ လေကြောင်း၊ ရေကြောင်းမှ ဗုံးကြဲမှု၊ လက်နက်ကြီးပစ်ခတ်တိုက်ခိုက်မှုကို အာရက္ခတပ်တော်မှ ပြင်းထန်စွာရှုတ်ချထားပြီး ပြည်သူများအနေဖြင့် ယခင်ထက်ပို၍ လုံခြုံရေးသတိရှိစေရန် တိုက်တွန်းပြောဆိုထားသည်။