AB News – မတ် ၂၉၊ ၂၀၂၆
မင်းအောင်လှိုင် ဦးဆောင်မည့် အစိုးရအဖွဲ့သစ်၏ ဒုတိယသမ္မတနှင့် ဝန်ကြီးရာထူးများတွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) မှ အမာခံအဖွဲ့ဝင်များ ပါဝင်ခွင့်ရရှိရန် အလားအလာ နည်းပါးနေခြင်းကြောင့် ပါတီအတွင်း မကျေနပ်မှုများ ပြင်းထန်နေကြောင်း ပါတီတွင်း သတင်းရင်းမြစ်များထံမှ သိရသည်။
အစိုးရအဖွဲ့သစ်တွင် လက်ရှိစစ်ကောင်စီနှင့် ကော်မရှင်အသီးသီး၌ တာဝန်ထမ်းဆောင်နေသည့် ဗိုလ်ချုပ်ဟောင်းများကိုသာ အဓိကထား ခန့်အပ်ရန် စီစဉ်နေခြင်းကြောင့် ပါတီတွင်းရှိ အရပ်သားအဖွဲ့ဝင်များ၊ ဗဟိုအလုပ်အမှုဆောင်များနှင့် ဗဟိုကော်မတီဝင်များမှာ ရာထူးနေရာများအတွက် ချန်လှပ်ခံထားရသည်ဟု သိရသည်။
”ပါတီမှာ နှစ်ရှည်လများ တာဝန်ထမ်းဆောင်ခဲ့တဲ့ အရပ်သားခေါင်းဆောင်တွေကို နေရာမပေးပဲ စစ်ဘက်နောက်ခံရှိသူတွေကိုပဲ ဦးစားပေးနေတဲ့အပေါ် ပါတီအတွင်း အမြင်ကွဲပြားမှုတွေ ရှိနေတယ်” ဟု သတင်းရင်းမြစ်တစ်ခုက ဆိုသည်။
ထို့ပြင် လွှတ်တော်ဆိုင်ရာ အဆင့်မြင့်ရာထူးနေရာများတွင်လည်း လူဟောင်းများကိုသာ ပြန်လည်ခန့်အပ်ရန် လျာထားခြင်းက ပါတီဝင်များအကြား ဝေဖန်မှုများကို ပိုမိုမြင့်တက်စေခဲ့သည်။
အစိုးရအဖွဲ့သစ်၏ ထက်ဝက်ခန့်မှာ လူဟောင်းများ ဖြစ်နိုင်ပြီး မင်းအောင်လှိုင်နှင့် နီးစပ်သည့် ဝန်ကြီးများနှင့် ဗိုလ်ချုပ်ဟောင်းများကိုသာ အဓိကထား ဖွဲ့စည်းသွားဖွယ်ရှိကြောင်း ခန့်မှန်းရသည်။
တစ်ချိန်တည်းမှာပင် အစိုးရအဖွဲ့ကို “အားလုံးပါဝင်သော အမျိုးသားညီညွတ်ရေးပုံစံ” ဖော်ဆောင်ရန်အတွက် ကြံ့ခိုင်ရေးပါတီမဟုတ်သည့် အခြားနိုင်ငံရေးပါတီများနှင့် တိုင်းရင်းသားပါတီခေါင်းဆောင်အချို့ကို ထည့်သွင်းရန် စီစဉ်နေခြင်းကြောင့် ပါတီ၏ အမာခံခေါင်းဆောင်များမှာ ပိုမိုဘေးရောက်သွားရသည်ဟု ပါတီတွင်း ဝေဖန်မှုများ ထွက်ပေါ်နေသည်။