AB News-ဧပြီ ၄၊ ၂၀၂၅

ငလျင်ဘေးသင့် မြန်မာပြည်သူများအတွက် ကူညီကယ်ဆယ်ရေးပြုလုပ်ရန် ရောက်ရှိလာသည့် အိန္ဒိယနိုင်ငံမှ စေတနာ့ဝန်ထမ်းတစ်ဦးဖြစ်သော Kiran Verma သည် စစ်ကောင်စီ၏ ဖိနှိပ်မှုကြောင့် အိန္ဒိယနိုင်ငံသို့ ပြန်လည်ထွက်ခွာသွားကြောင်း ၎င်း၏ Facebook လူမှုကွန်ရက်စာမျက်တွင် အသိပေးကြေညာထား သည်။

စစ်ကောင်စီတပ်၏ သေနတ်ပြောင်းဝရှေ့တွင် ကူညီကယ်ဆယ်ရေးများ လုပ်ကိုင်နေရခြင်း၊ ဒုက္ခရောက်နေသည့် အပြစ်မဲ့ပြည်သူများနှင့် အဆောက်အဦးအပျက်အစီးအောက်တွင် သေဆုံးနေသည့် ပြည်သူများကိုထားခဲ့ရသဖြင့် အလွန်စိတ်မကောင်းဖြစ်ကြောင်း မြန်မာပြည်သူများကို တောင်းပန်ထား သည်။

ယခုကဲ့သို့ ငလျင်ဘေးကြောင့် ဒုက္ခရောက်နေကြချိန် မြန်မာစစ်တပ်၏ လူသားချင်းစာနာမှု ကိုယ်ချင်းစာတရား အနည်းငယ်သာ မျော်လင့်မိထားကြောင်း ဆိုသည်။

ထို့အပြင် Kiran Verma သည် ငလျင်ဒဏ်အများဆုံးခံရသည့် စစ်ကိုင်းဖက်သို့ ကူညီကယ်ဆယ်ရေးသွားရာတွင် မန္တလေးတွင်အကြောင်းအရင်းမရှိဘဲ စစ်ကောင်စီ၏ တားဆီးပိတ်ပင် ခြင်းကို ခံခဲ့ရပြီး မန္တလေး၌ လူအနည်းငယ်ကိုသာ အစားအစာ တစ်ချို့ မျှဝေနိုင်ခဲ့သည်ဟုဆိုထားသည်။

မြန်မာနိုင်ငံက ပြည်သူများကို ကမ္ဘာကြီးနှင့် အဆက်အသွယ်ဖြတ်ထားသဖြင့် ပြည်သူများ၏ နာကျင်မှုကို မျှဝေနိုင်မှာ မဟုတ်ကြောင်းလည်း ပြောဆိုထားသည်။

အဓိက ကယ်ဆယ်ရေးလုပ်ရမည့် နေရာများတွင် စစ်ကိုင်း၊ နေပြည်တော်၊ ပဲခူး၊ မကွေး နှင့် ရှမ်းတို့ ပါဝင်ပြီး ကူညီကယ်ဆယ်ရေးနှင့် အထောက်အပံ့ရရှိမှုနည်းနေသည့် ဒေသများ ဖြစ်ကြောင်း ရေးသားဖော်ပြထားသည်။

စစ်ကောင်စီတပ်၏ ထိန်းချုပ်မှုအောက်တွင် ကူညီကယ်ဆယ်ရေးလုပ်ငန်းများ လုပ်ရန်အဆင်မပြေ တော့သဖြင့် မေလ ၃၁ ရက်နေ့တွင် ရောက်ရှိခဲ့သည့် ၎င်းသည် ဧပြီလ ၃ ရက်နေ့တွင် နေရပ်ပြန်ကာ မြန်မာပြည်သူများအတွက် ဆုတောင်းပေးပါဟုလည်း ရေးသားထားသည်။

Kiran Verma သည် အိန္ဒိယနိုင်ငံတွင် အကျိုးအမြတ်မယူဘဲ သွေးလှူဒါန်းသည့် ပရဟိတအဖွဲ့အစည်း (Simply Blood) ကို တည်ထောင်သူတစ်ဦးဖြစ်ပြီး လူမှုရေးလုပ်ငန်းများတွင် တက်တက်ကြွကြွ ပါဝင် လုပ်ဆောင်နေသူ တစ်ဦးလည်း ဖြစ်သည်။

ဓာတ်ပုံ – Kiran Verma (Facebook)