AB News- နိုဝင်ဘာ ၄ ရက်
ချင်းပြည်နယ် ပလက်မြို့နယ် ဘားဝကျေးရွာတွင် စစ်ကောင်စီတပ်စခန်း ၁ ခုကို ဒေသခံ PDF အဖွဲ့က ဝင်တိုက်ခဲ့ပြီး၊ လက်နက်ကြီးကျည်ထိမှန်ကာ ဒေသခံရွာသား အမျိုးသမီးတစ်ဦး ဒဏ်ရာရရှိကြောင်း စုံစမ်းသိရှိရသည်။
၎င်းတို့ ၂ ဖွဲ့သည် မိနစ် ၃၀ ကြာခန့် ပစ်ခတ်မှုရှိခဲ့ပြီး ၈ နာရီတွင် ရပ်တန့်သွားခဲ့ကြောင်း နီးစပ်သူ တစ်ဦးက AB News သို့ပြောသည်။
“PDF နဲ့ စစ်ကောင်စီတပ်ဖွဲ့တွေနဲ့ဖြစ်တယ်၊ PDF တွေက စစ်ကောင်စီတပ် စခန်းဝင်သိမ်းတာထင်တယ်၊ လက်နက်ကြီးကျည်ထိလို့ အမျိုးသမီးတစ်ယောက် ဒဏ်ရာရသွားတယ် မိနစ် ၃၀ လောက်ကြာတယ် ၊ အခုရပ်သွားပါပြီ” ဟု ဆိုသည်။
လက်နက်ကြီးကျည်သည် ကလေးအမေတစ်ဦး၏ ပေါင်ကိုထိမှန်သွားပြီး ပလက်ဝမြို့နယ် ဆမီးဆေးရုံသို့ ပို့ဆောင်ထားရကြောင်း သိရသည်။
တိုက်ပွဲဖြစ်ပွားသည့်နေရာသည် ဆမီးမြို့နှင့် ၁ မိုင်ကျော်ဝေးကွာကြောင်း သိရသည်။
ဒေသခံ PDF အဖွဲ့နှင့် စစ်ကောင်စီတပ်တို့ တိုက်ပွဲ ဖြစ်ပွားသည်မှာ မှန်ကန်ကြောင်း ရက္ခိုင့်တပ်တော် ပြန်ကြားရေးတာဝန်ခံ ဦးခိုင်သုခကလည်း AB News သို့အတည်ပြုပြောသည်။
“ULA/AA နှင့် တိုက်ပွဲဖြစ်တာတော့ မရှိဘူး။ ဒါပေမယ့် ဒေသခံတွေဆီကသိရတာတော့ Local PDF တွေက ဆမီးဘက်မှာရှိတဲ့ မြန်မာစစ်တပ် စခန်းကို ဝင်ပစ်တာရှိတယ်လို့ သိရတယ်” ဟုဆိုသည်။
ကျရောက်ပေါက်ကွဲသည့်လက်နက်သည် မည်သည့်ဘက်က ပစ်ခတ်သည်ကို မသိရှိရသေးပေ။