ABN – မေလ (၃၁) ရက် ၊ ၂၀၂၃

ဘာသာပြန် – ကျော်ဇံ

နေတိုးဦးဆောင်သည့် ငြိမ်းချမ်းရေးတပ်များက စစ်သား ၃၀ ဦးကို ဒဏ်ရာ ရသွားစေသည့် ပြင်းထန်သော တိုက်ပွဲများဖြစ်ပွားပြီးနောက် Zevecan မြို့တော်ခန်းမ ရှေ့တွင် ဆာဗ့် လူမျိုးများ စုရုံးနေကြပြီး အင်္ဂါနေ့တွင် ကိုဆိုဗို မြောက်ပိုင်းတွင် အခြေအနေမှာ တင်းမာနေဆဲပင်ဖြစ်သည်။

နေတိုးဦးဆောင်သည့် ကိုဆိုဗိုတပ်ဖွဲ့ (KFOR) စစ်သားများသည် ယူနီဖောင်းအပြည့် ဝတ်ဆင်လျှက် Zvecan မြို့ရှိ မြူနီစီပယ် အဆောက်အဦး ဝန်းကျင်တွင် သတ္တုအတားအဆီးများ ချထားကာ အဆောက်အဦးထဲကို ဝင်ရောက်ရန် ကြိုးစားနေသော ရာနှင့်ချီသည့် ဆာဗ့် လူမျိုးများကို တားဆီးရန်ကြိုးစားနေကြသည် ဟု မြင်ကွင်းကို မြင်တွေ့ခဲ့ရသည့် AFP သတင်းထောက်တစ်ဦးက ဆိုသည်။

တိုင်းရင်းသား အာဘေးနီးယန်း ကိုဆိုဗို ရဲတို့၏ လက်နက်တပ်ဆင်ထားသည့် ကားသုံးစီးမှာ မြို့တော်ခန်းမ၏ ရှေ့တွင် ရပ်နားထားတုန်းပင် ဖြစ်ပြီး ၄င်းရဲကားများ ရောက်ရှိနေခြင်းက ဆာဗ့်လူမျိုး အများစုနေထိုင်သည့် မြောက်ပိုင်းဒေသများတွင် အငြင်းပွားမှုများဖြစ်အောင် လှုံ့ဆော်နေသည်။

ကိုဆိုဗိုနိုင်ငံ လူဦးရေ၏ ၆ ရာခိုင်နှုန်းခန့်ရှိသော ဆာဗ့်လူမျိုးများသည် သူတို့အများစု ရှိသည့် မြောက်ပိုင်းမြို့များတွင် လွန်ခဲ့သည့်လက ကျင်းပသည့် ရွေးကောက်ပွဲကို ဆန့်ကျင်သပိတ်မှောက်ကြသဖြင့် မဲပေးသူဦးရေမှာ ၃.၅ ရာခိုင်နှုန်း အောက်တွင်ရှိကာ မပြောပလောက်သော်လည်း အာဗေးနီးယန်းလူမျိုးများမှာ ဒေသတွင်း အုပ်ချုပ်ရေးကောင်စီများကို ထိန်းချုပ်နိုင်သွားသည်။

ဆာဗ့်လူမျိုးအများစုက သူတို့၏ စစ်မှန်သည့် ကိုယ်စားလှယ်များဖြစ်သည်ဟု မယုံကြည်ကြသော အာဗေးနီးယန်းမျိုးနွယ်စုဝင် မြို့တော်ဝန်များအပြင် ကိုဆိုဗိုရဲတပ်ဖွဲ့များကိုလည်း ထွက်သွားကြရန် တောင်းဆိုလျှက်ရှိသည်။

ဆာဗ့်လူမျိုးများက တင်္နလာနေ့တွင် Zvecan မြို့တော်ခန်းမသို့ အတင်းဝင်ရောက်ရန် ကြိုးစားရာမှ တင်းမာမှုများမြင့်တက်ခဲ့ပြီး ကိုဆိုဗို ရဲများက မျက်ရည်ယိုဗုံးများသုံးကာ လူစုခွဲရန် ကြိုးပမ်းသောအခါ ပြန်ဆုတ်သွားကြသည်။

နေတိုးဦးဆောင်သည့် ကိုဆိုဗိုတပ်(KFOR) သည် အစပိုင်းတွင် ရဲများနှင့် ဆန္ဒပြသူများကို ခွဲရန်သာ ကြိုးစားခဲ့သော်လည်း နောက်ပိုင်းတွင် ဒိုင်း နှင့် တုတ်များကို အသုံးပြုကာ လူအုပ်ကိုခွဲရန် ကြိုးစားခဲ့သည်။ ဆန္ဒပြသူများဘက်မှလည်း ကျောက်ခဲများ၊ ပုလင်းများ၊ ဓာတ်ဆီပုလင်းဗုံးများကို စစ်သားများထံသို့ ပြန်ပစ်ကာ တုံ့ပြန်ခဲ့ကြသည်။

ငြိမ်းချမ်ရေးတပ်ဖွဲ့ဝင် စုစုပေါင်း ၃၀ ဦး ၄င်း ထိတွေ့မှုများတွင် ဒဏ်ရာရရှိခဲ့ပြီး ပေါက်ကွဲစေတတ်သော ပစ္စည်းများကြောင့် အပူလောင်ခြင်း၊ အရိုးကျိုးခြင်းများရှိသည် ဟု KFOR ၏ ထုတ်ပြန်ချက်တွင် ဖော်ပြထားသည်။

ဆာဗ့်လူမျိုးသမ္မတ Aleksandar Vucic က ဆန္ဒပြသူ ၅၂ ဦး ဒဏ်ရာရရှိခဲ့ပြီး ၄င်းတို့ထဲမှ ၃ ဦးမှာ ဒဏ်ရာပြင်းထန်သည်ဟု ဆိုသည်။ ထိတွေ့မှုများတွင် ပါဝင်သောကြောင့် ဆာဗ့်လူမျိုး ၅ ဦးအဖမ်းခံထားရသည်ဟု ကိုဆိုဗို ရဲတပ်ဖွဲ့က ဆိုသည်။

KFOR အဖွဲ့က သူတို့စစ်သားများသည် အကြမ်းဖက်ပြီး အန္တရာယ်ရှိသော လူအုပ်၏ တိုက်ခိုက်မှုကို တုံ့ပြန်ခဲ့ကြပြီး သမာသမတ်ကျကျဖြင့် လုပ်ရမည့်အလုပ်ကို ဆောင်ရွက်ခြင်းသာ ဖြစ်သည် ဟု ဆိုထားသည်။

“ဒီလို နှစ်ဖက်ကြားက ထိတွေမှုတွေကို ရှောင်ရှားဖို့နဲ့ တင်းမားမှုတွေကို လျော့ချနိုင်ဖို့ KFOR ငြိမ်းချမ်းရေးစစ်သားတွေဟာ ကိုဆိုဗို ဆာဗ့်လူမျိုးတွေနဲ့ ကိုဆိုဗို အာဗေးနီးယန်းတွေရဲ့ အသက်အန္တရာယ်ခြိမ်းခြောက်ခံနေရတဲ့ အခြေအနေကို တားဆီးခဲ့ပါတယ်” ဟု KFOR က ဆိုသည်။

“မှားယွင်းတဲ့ ပြောကြားချက်တွေနောက်မှာ ပုန်းနေတာထက် နှစ်ဖက်စလုံးက ဖြစ်ခဲ့တဲ့ အရာတွေအတွက် အပြည့်အဝ တာဝန်ရှိပြီး နောက်ထပ်တင်းမာမှုတွေကို တားဆီးဖို့ လိုပါတယ်။”

KFOR တပ်ဖွဲ့များကို အလိုလို တိုက်ခိုက်ခြင်းကို အပြင်းအထန်ရှုံ့ချပြီး ဤကဲ့သို့ လုပ်ရပ်များမှာ လုံးဝ လက်ခံနိုင်စရာမရှိဟုလည်း NATO က ဆိုသည်။

တင်းမာမှုများ မြင့်တက်လာသည့် ပြီးခဲ့သည့် အပတ်အတွင်းက မြို့တော် Belgrade က စစ်တပ်ကို အသင့်အနေအထားရှိစေခဲ့ပြီး တပ်ဖွဲ့များကို ကိုဆိုဗိုနယ်စပ်သို့ စေလွှတ်ခဲ့သည်။

ဆာဗ့်လူမျိုးသမ္မတ Aleksandar Vucic က အင်္ဂါနေ့တွင် Quint ဟု ခေါ်သည့် သံအမတ်များအပါအဝင် တရုတ်၊ ရုရှားတို့မှ ကိုယ်စားလှယ်များကိုပါ Belgrade မြို့တွင် တွေ့ဆုံသွားမည်ဟု ကြေငြာခဲ့သည်။ Qunit အဖွဲ့သည် ဘော်လကန် အနောက်ပိုင်းကို အာရုံစိုက်သည့် အင်အားကြီး နေတိုးအဖွဲ့ဝင် ၅ နိုင်ငံမှ ကိုယ်စားလှယ်များဖြစ်သည်။

ကိုဆိုဗိုသည် ၂၀၀၈ ခုနှစ်တွင် ဆာဗီးယားမှ လွတ်လပ်ရေး ကြေငြာခဲ့သည်။ သို့ရာတွင် Belgrade နှင့် သူ၏ အဓိက မဟာမိတ်များဖြစ်သော တရုတ်နှင့် ရုရှားအစိုးရတို့က အသိအမှတ်ပြုရန် ငြင်းဆိုခဲ့သဖြင့် ကိုဆိုဗိုအတွက် ကုလသမဂ္ဂတွင် ကိုယ်စားလှယ်တစ်နေရာ ရရှိမှုကို တားဆီးပိတ်ပင်လျှက်ရှိသည်။

ကိုဆိုဗိုရှိ ဆာဗ့်များသည် Belgrade အစိုးရ ကို အလွန်အမင်းသစ္စာရှိပြီး အထူးသဖြင့် မြောက်ပိုင်း ဒေသများတွင် ဖြစ်သည်။ ကိုဆိုဗိုမြောက်ပိုင်းဒေသတွင် ဆာဗ့်လူမျိုးအများစု ရှိပြီး ဒေသတဝှမ်း ထိန်းချုပ်မှုကို ပြန်လည်စုစည်းရန် Pristina အစိုးရ အဖွဲ့၏ လှုပ်ရှားမှုတိုင်းကို ဆန့်ကျင်ကြသည်။

Bangkokpost သတင်းပါ Serbs gather in northern Kosovo after clashes ကို ကျော်ဇံ ဘာသာပြန်သည်။