ABN-ထက်မြတ်ခင်
ဇွန် ၁၄ရက်
ALPက ဖမ်းဆီးထားသည့် ရခိုင်ပြည် ပေါက်တောမြို့နယ် ငွေတွင်းတည်ကျေးရွာမှ ကလေး၂ဦး၏ မိခင် မသန်းသန်းဌေးအား ၁လကျော်ကြာမြင့်လာသည်အထိ မိသားစုများနှင့် တွေခွင့်မရသေးကြောင်းသိရသည်။
မသန်းသန်းဌေးမှာ ပြီးခဲ့သည့် မေလ ၃ရက်နေ့ နေ့လည် အချိန်တွင် ဖမ်းဆီးခံခဲ့ရပြီး ၁ လကျော်ကြာသည် အထိ မိသားစုနှင့် တွေ့ခွင့်မရဘဲ မိခင်ဖြစ်သူမှာလည်း ကလေး ၂ ယောက်နဲ့ အခက်ခဲများကြုံနေရသည်ဟု မသန်းသန်းဌေး၏ မိခင်ကပြောသည်။
“ကျမဘာလုပ်လို့ ဘာကိုင်ရမှန်းမသိဖြစ်နေပါတယ်၊ ကျမသမီးက ကျမတို့ကို လုပ်ကိုင်ကျွေးမွေးနေတာဆိုတော့ အခုကကျမတို့ စားဝတ်နေရေးအတွက် ဒုက္ခရောက်နေပါတယ် ၊ ကျမတို့တွေကိုလည်းတွေ့ခွင့်မပေးဘူး” ဟုပြောသည်။
မသန်းသန်းဌေးမိခင်မှာ ကလေး၂ဦးနှင့်အတူ စားဝတ်နေရေးနှင့် ကလေးငယ်များကျောင်းတက်နိုင်ရေးတို့အတွက် မှိုဟင်းခူး၍ ရောင်းစားနေရသည်ဟု ၎င်းကဆက်ပြောသည်။
“ကျမအခု ကလေး၂ယောက်နဲ့အတော်လေး ဒုက္ခရောက်နေပါတယ်။ ကလေးတွေကို ကျမ ကျူရှင်လည်း မထားပေးနိုင်ဘူး။ စားဝတ်နေရေးအတွက်ကျတော့ ကျမ မှိုဟင်းရောင်းပြီးစားနေရပါတယ်” ဟုပြောသည်။
မသန်းသန်းဌေးမိခင်မှာ မသန်းသန်းအားသွားရောက်ပြီး တွေ့ချင်သော်လည်း အခုအခါ ငွေကြေးမတတ်နိုင်သောကြောင့် ဇွန်လအကုန်တွင် လမ်းစရိတ်ငွေစုပြီး သွားမည်ဟု ပြောသည်။