ABN-ရှိုင်းမိုး
မြောက်ဦးမြို့ထဲတွင် ယနေ့မနက် ၁၁ နာရီခန့်က ရာသီဥတု အပူချိန်ပြင်းထန်သောကြောင့် သက်ကြီးပိုင်း အမျိုးသားတစ်ဦး လဲကျ၍ နေရာတွင် သေဆုံးသွားခဲ့ကြောင်း သိရသည်။
၎င်းမှာ မြောက်ဦးမြို့နယ် ပရီကုန်းမှ ဦးစိုးထွန်း အသက် ၆၂ နှစ် ဖြစ်သည်ဟုသိရသည်။
သူသည် မြောက်ဦးမြို့ဈေးထဲ၌ လမ်းလျှောက် ဈေးဝယ်နေစဥ် လဲကျ၍ နေရာ၌သေဆုံးသွားသည်ဟုမျက်မြင်သက်သေ ၁ ဦးက ABN သို့ပြောသည်။
” သူစျေးထဲသို့ဝင်လာတာကိုမြင်လိုက်ပါတယ်၊ ခဏကြာမှ သူလဲကျသွားတယ်၊ လဲကျတာနဲ့ဆုံးသွားပါတယ်၊ ကြည့်ရတာ အပူချိန်ပြင်းလို့ထင်ပါတယ်၊ ရာသီဥတုက တအားပူတယ်” ပြောသည်။
သေဆုံးသွားသူမှာ ရောဂါအခံလည်း မရှိကြောင်း သိရသည်။
ရခိုင်တွင် ရာသီဥတု အပူချိန်မြင့်တက်နေပြီး ခန္ဓာကိုယ် အရေပြားပေါ်တွင် အပူကြောင့် ဖြစ်တတ်သည့် အရေပြားရေရောဂါများလည်း ဖြစ်ပွားလျက်ရှိနေကြသည်ကိုတွေ့ရသည်။
ထို့အပြင် အပူချိန်မြင့်မားမှုကြောင့် ရေတွင်း ရေကန်များလည်း ခမ်းခြောက်လာကာ ရေအခက်အခဲဖြင့် ရင်ဆိုင်နေကြရသည်။
